黃彰輝寫 《台灣教會公報》 1024號 1968年2月15日 P.5 [白話字，改為漢羅台文]

黃彰輝牧師於1965年11月離開台灣 （他接了以倫敦為根據的Theological Education Fund副主任職）。

致敬佮請安佇主內敬愛的議長佮列位牧長。接著總幹事的批，愛我寫幾字請安大家，感覺光榮佮歡喜。離開故鄉已經2年外久，總是時常數念諸位主內同工，亦時常為著咱的教會祈禱。

聽著敬愛的同工，為著咱的主佮伊的教會的奮鬥，亦感激亦歡喜。願疼痛的主佮恁大家佇teh，引chhoā保守恁佮咱的教會。特別聽著咱所祈禱teh期待的「新世紀宣教運動」taⁿ（今）teh欲開始，閣較感激，閣較歡喜，願五旬節的聖神臨到諸位敬愛的同工佮咱的教會，激勵強壯恁，予恁所計劃所做的攏歸榮光咱佇天裡的父，亦講闊伊的國佇咱所疼的台灣，亦直到地極。主已經有祝福咱以前的倍加運動，我信伊亦欲祝福咱的新世紀宣教運動。伊所對咱要求的，只有愛咱徛在佇咱的信，咱的向望來盡忠伊所交代咱的使命。

列位敬愛的同工，我毋免講，咱攏知的，就是咱著佇主內實實在在相敬，相疼，相和。這是咱所傳的道理，咱的先賢亦是按呢教咱，天時地利，不如人和。容允我閣對咱的教會所講的一句「合者存，分者亡」。所以我深深向望閣祈禱，就是願賞賜合一的聖神時常佮咱佇teh，保守引chhoā咱，相佮進入伊所交代咱的這的新世紀宣教運動。

願教會的主，就是彼個為眾人死亦閣活的主耶穌佮咱相佮佇teh，祝福這屆的總會，予一切的討論佮議決攏會通歸榮光伊的名。

教末：黃彰輝敬寫。