邱天登撰 「故李乘鰲牧師」《台灣教會公報》960號 1965年6月 p.30

李乘鰲牧師（1893-1965），原名歪頭，是「鼎昌」的一支李趖的長子；娶蔡金葉(蔡得一長老長女)為妻。請參見《教會史話》 397, 445, 446 等。

李乘鰲牧師佇(1965年)5月4日下晡4點40分，佇自己的厝受主恩召息勞凱旋歸天家，享壽73歲，5月10日下晡1點佇鹽埕教會舉行鹽埕教會葬，會葬者有800外人。

故李牧師佇1893年11月12日，出世佇屏東縣萬丹鄉鼎昌家內，有去台南長老教中學讀冊。畢業了後就進入台南神學院，後來就去日本國東京都明治學院神學部深造。 該院畢業了後tng2來台灣，受傳道局派伊佇田中教會一年，溝坪教會半年，潮州教會6年，萬丹教會1年。佇1929年5月7日赴任高雄市北野町教會牧師，(現在的鹽埕教會) 兼任高雄中會巡迴牧師職務，後來專任鹽埕教會牧會，到 1953年，逕停退休。An2-ni做主的工有32年半，其中toa3鹽埕教會牧會有24年久。

故李牧師1929年5月7日來高雄赴任 hit時，教會se3一間店做禮拜堂，當時會友真少，教會只有旗後kap 這一間na7-tiaN7。李牧師熱心做工，教會信徒漸漸加添，就設法買北野町的禮拜堂土地，建築禮拜堂kap牧師館。教會漸漸加添人額，需要主日學教室，就將牧師館 改 thah8二樓，樓頂做牧師館，樓腳做主日學教室，就開辦幼稚園。Hit時辦了真好成績，受著地方的人士真歡迎。到光復後，就佇瀨南街 53號起 現時堂皇的鹽埕教會禮拜堂，對 an2-ni教會名稱改換做鹽埕教會。Hit時tu2-a2光復， beh 起這間禮拜堂實在有真大苦心，會友對 疏開地tu2-a2-tng2 來，事業be7 穩定經濟bai2， 物價 teh 波動。 這款的情形下，beh 起這間禮拜堂kap牧師館實在真大苦心。總是故李牧師的信心真堅定，克服當時的一切的困苦，來完成這間堂皇禮拜堂kap牧師館，實在是真偉大。到佇1953年就退休，toa3家己的厝，做自由的工。

遺族李牧師娘身體健全，有三個後生，兩個查某囝，內外孫有12個。大囝李信行， 對美國深造 tng2來服務台北美國學校任教， koh 兼任台灣神學院的教授。第二囝李信彰，台南成功大學畢業，是一位真優秀鞋工程師。若是受主的選召，就歡喜獻身hou7主，現時佇遠東 歸主teh 為主做工。第三囝李信助牧師，台南神學院畢業，bat 佇嘉義中會的大林教會就任做牧師，現時服務佇遠東歸主teh做主ê 工。大查某囝李秀玉，畢業日本國東京藥專是一個藥劑師， 嫁楊東茂醫生現時斗六 teh 開業。第二查某囝李慈玉，嫁詹益丕醫生，現時服務佇省立高雄病院，擔任內科 kap檢驗主任。 故李牧師佇病床中常常對去探伊的人講：伊的心真平安，koh真滿足，感受上帝的施恩賜福。Koh講真感謝上帝，囝兒歡喜續接伊的工作，獻身做主的工，囝兒，媳婦攏真有孝，所以真感謝上帝。

到 5月4日早起，kā牧師娘 kap teh看顧的人講：主來lah心就非常的歡喜，an2-ni經過無久，到 hit下晡4點40分，就安然離開世間。