巴克禮 行遊恒春縣

 

頁Home /本土信徒 / 日人列傳 /宣教師 / 洋神父 / 原住民 / A / B / C / D / E / F / G /  H / I-J / K /  L /  M  / N-O / P-Q / R / S / /  V / W  

《台南府城教會報》第20張,1887年2月,由白話字改為漢羅台文。  

Ti7恒春縣行遊傳道 巴先生
舊年12月17,就是拜一,hit暝我對安平落船去東港,ti7 hia 參佟先生(佟牧師,Rev. W.R. Thompson),安醫生(安彼得, Dr. Peter Anderson),荊先生(Mr. kenmure, agent in South China of the British and Foreign Bible Society).取齊(荊先生就是祖家聖冊公會差e5,來中國料理賣聖冊e5事;hit tiap8 參荊先生娘有來府城相探。)到拜三暝昏,阮4個koh再搭一隻商船beh去南路尾,看hia hit個燈樓,也beh chhoa7 hit所在e5傀儡。拜五早起kau te3,代先去看燈樓,也有人叫做燈臺。這間樓是起ti7鵝鸞鼻,就是台灣海嶼極南e5所在,三面向海,一面靠山。樓是圓圓,差不多8丈懸,丈外闊,無人teh toa3,刁工起teh點燈做行船e5路用。hit支燈真光,離5、6舖路,也看會明;燈裡有6條心,心是圓環e5,內外分做6重,若攏總點,一暝著用一箱,就是兩桶e5土炭油。有暝tu2著無茫霧,點3條心也會足光;燈e5 chhang kng2真大支,每支買著5箍銀,逐暝對日落點到日出,歸暝定著有人相輪流 teh顧,ti7 hia有3個外國人teh做hit間樓e5主事,也有請幾若個唐人 teh鬥腳手,in e5厝起倚hit個樓腳,到今起有4年外e5久,hit時因為驚傀儡,所以起到不止堅固cham am5,親像砲臺e5款式。樓是用鐵板做e5,內外大細各位e5銃真濟,扑算通台灣e5生番去扑,也無要緊。起hit間e5所費攏總開有3、40萬銀,是對海關出e5。
阮ti7 hia拜五歇一日,hou7主事e5人好禮款待;拜六過來恒春縣,縣城起已經7、8年久,到今boe7有偌濟人toa3 ti7 hia,ti7 hia過禮拜,拜一早起,去傀儡庄,瓠hia e5傀儡已經歸化幾若年,從中濟濟個會曉tit講白話,也照例剃頭,也有厝宅,內面眠床、椅桌、碗碟箸攏便,總是iau2 boe7有人bat字。In hit族,人叫做排灣,卻無偌濟人,照in講,in chham後山知本e5傀儡是像族,向時有分拆,ti7 hia e5人額較濟。Iau2有一族號做A-mi5-a2,是teh hou7 in差用,若beh叫伊做工, m7免出錢hou7伊,伊家己攏無種作,kan ta對唐人來收租,去食用。
阮去,代先對Siau-ma2-li5到Chi-la-soh,hia e5頭人號做文傑,阮ti7 hia hou7伊請,也淡薄物送伊,伊不止好款待阮,只有無歡喜阮無參in做伙食酒,因為阮知 hit個酒真厲害,決斷m7 hou7伊請。到hit暝過--來港口, hia e5頭人號做kap teng,講是文傑e5母舅。Hit暝有chhoa7十外個來ti7 hia,唱曲跳舞,就是歡喜阮去e5意思,阮也有吟詩hou7 in聽,後來我順機會講道理,in大家恬恬teh聽,這個文傑有將我e5話翻譯hou7 in知,in講道理是好,in愛聽;因為唐人逼伊著奉事公媽佛,in不止m7愛,講是hiang3,問阮奉事上帝著怎樣,阮就講hou7 in聽,過明仔早起iau2 boe7起身,佟先生也順機會koh ki7 in講;hit時講無偌濟話,因為無機會thang toa3較久,想beh冊送in, in都m7 bat字,是無路用,kan-ta苦勸in m7 thang拜佛,也有請in來府城,in講向望二月間愛beh來,hit tiap8若到,阮就thang較詳細教示in。阮teh想,beh差人toa3 ti7 in中間傳道理,可惜不止欠工,因為新設e5所在已經濟位;若無差人去,又驚了in漸漸 hou7人引誘去趁khian3-sng2歹風俗,kiam2 m7是失了機會?請逐位e5兄弟因為這個代誌求上帝開路;咱m7 thang kan ta想家己得著救就好,的確著愛眾人得著救。
阮拜二e昏到車城;拜三到枋寮;拜四到東港,攏平安。

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述