瘟疫是上帝所降ê 災厄，ài 叫醒人ê 心。親像在早以色列百姓 tī 曠野bat 抵著瘟疫（民25：9），大衛王 ê 時耶和華也bat 降瘟疫（II撒24：15）。Che攏是顯明人得罪上帝，上帝就受氣，降災厄tī in中間。

若是án-ni，信主 ê 人，上帝敢有受氣in--mah？這項我m̄敢決斷講。總--是我知信主ê 人若真正敬虔服事主，上帝的確無受氣in。今若是人敬虔服事主，in 猶原會抵著瘟疫--mah？會。主是救咱離開罪惡，iáu-boē hō͘ 咱離開世間（約翰17：15）。有一日伊會hō͘ 咱離開世間，佮伊永永相佮tiàm,攏無有病痛死失 ê 事誌。總--是hit個時iáu-boē到，咱猶tī世間 ê 時，猶原著佮世間ê人平平相佮抵著艱苦。我這擺來唐山，探聽這爿ê 消息，知這個烏死症，漳泉逐所在差不多攏有。廈門不止濟，同安也真濟；石馬真傷重。漳州抵仔teh 興。其餘親像泉州安海，以及過水 ê 鄉社，攏散散有。Tī 這個瘟疫 ê 中間，咱信主 ê 人失落無少。Che hō͘ 我ê 心痛疼，不得已著寫幾字，通知咱台灣 ê 兄弟姊妹。

我知台灣現時有瘟疫，也真歡喜bē有聽見信主 ê人死tī 這個瘟疫。總--是我想著真細膩，若無盡咱ê本份，就驚了咱也會染--著。照人所講究 ê 法度，有幾若項是人 ê 本份所著做。

第1項，著清氣相。我真奇怪這項逐人知，總--是唐人100人無1人甘願做。雖罔開藥店ê 人，第1明白這個理氣，koh 逐日 teh 勸別人清氣相，iáu-kú家己也是無清氣相。我家己也是un-thun ê 人，不過愛學nā-tiāⁿ。我知清氣相是好，所以我愛學。我teh學清氣相 ê 時，知beh 清氣相著骨力，koh著了淡薄錢。骨力就是著逐日慇懃拚掃，較m̄-bat用 ê 物著常常提出來曝日。門企 、屏堵 、眠床、椅桌，著常常揉洗。灶腳著常常拚，m̄-thang 柴抑是蔗粕 tiāⁿ-tiāⁿ下一位，攏無搬徙。塗腳著常常洗。厝頂一年著清塵兩擺；親像這號瘟疫 ê 時，一、兩月日就著清塵一擺。掃地著掃到逐位清氣，m̄-thang積聚lâ-sâm tī 厝內。身軀著常常洗，m̄-thang十外日才洗1 擺。衣裳也著常常洗，m̄-thang十外日才洗一擺衫。煮食 ê 人著責督，m̄-thang菜洗無清氣就落去煮。桌布汁m̄-thang滴落去鍋仔。拭碗 ê 桌布著不止清氣。內面消tháu ê 器具攏著真頂真，著洗真清氣，koh著蓋真bā。若會免--得，就著另外下一位，房內m̄-thang囥這號物。厝內ê溝âm 著常用水沖。M̄-nā厝內著清氣，厝外也著án-ni。門口m̄-thang積聚糞圾，m̄-thang hō͘ 人un-thun。若有溝仔，抑是臭水窟，著設法m̄-thang hō͘ 伊 ê 毒入咱ê 厝內。Chiah-ê事不過著骨力nā-tiāⁿ，攏m̄免了錢。若人扑算骨力艱苦，無骨力無的確會死，hit號人是無盡本份，我不止替伊驚。

論著了錢，就是親像頂面所講chiah-ê,若家己無夠額工thang做，就著倩人來幫贊。水著用較濟，若無夠著加淡薄錢倩人擔。身軀著用 iû-kho͘ 抑是雪文洗，才較會清氣。衫也著洗雪文抑是iû-kho͘。面布、桌布著較常換。消tháu ê 器具，若用傷久，著hiat-ka̍k,koh 買新--ê。厝內若無通風，著倩塗水師父來加開幾若個窗仔，才會通氣。若厝傷濕，lâ-sâm 有毒氣，著稅別間，雖罔較加錢也著hō͘--伊。Che 攏是著了淡薄錢ê 事誌。總--是生命是比錢較貴氣，ài保護生命 ê 人，的確著甘願了淡薄錢。頂面所講，攏是論清氣相 ê 事誌。

第2項，著用解毒 ê 藥。這號瘟疫 ê 毒氣，照人講究是有一種 ê 毒蟲，目珠看bē著，著用顯微鏡才有看見。這號毒蟲若入人 ê 身軀，就hit個人算是染著hit號症，liâm-piⁿ 發熱、發粒仔，無偌久就死。真厲害！今有藥thang thāu這號蟲 hō͘ 伊死，就是Ka-pò͘-le̍k-sng 佮幾若項別項 ê藥。若用這號藥hiù tī 塗腳，就厝內較無毒；若用這號藥洗身軀，就身軀無毒；若用這號藥洗衫，就無毒；若用這號藥piàⁿ tī 桶仔內就桶仔內無毒。設使人若有錢，就著買這號藥去用，真正是有利益，m̄是空空。Che 是閃避瘟疫 ê 第2項。

第3 項，著食飽，穿燒，做工m̄-thang過頭，睏m̄-thang無足眠。人若枵較 ài染--著，人若寒也較ài 染--著；人若出力過頭，抑是睏無夠眠，致到身軀 siān,也較 ài染--著。Chiah-ê也不止要緊。

第4項，若瘟疫傷重，就著走。走，第1穩當，無別物比這項較好。著走去無瘟疫 ê 所在，就穩平安。

第5項，著祈禱。若人真正照我頂面所講來行，盡本份已經盡，我穩當敢講hit個人較bē染--著。總--是我 m̄敢講伊決斷bē染--著，因為生命是 tī上帝 ê 手頭，生死攏是伊teh 掌管。所以著祈禱。咱有罪，著認。上帝是憐憫 ê上帝，咱若反悔罪，用誠實謙卑 ê 心來求伊，向望伊會煞伊 ê 受氣，來聽咱ê 祈禱。親像在早憐憫hiah-ê 其餘 ê 百姓，吩咐剿滅 ê 天使「停伊ê 手」，向望伊chit-tia̍p 也憐憫咱，hō͘ 這個瘟疫緊緊煞，無到tī信主ê 人 ê 中間。Che是我所大向望。