高再祝長老小傳

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

《台灣教會公報》622號 .20-21頁,1937年1月刊 從白話字,翻寫做漢羅。按語是LES 所加。  

故高再祝長老ê小傳    岡山教會

長老高再祝,明治20年(1887) 11月15日出世tī台南市,老父高長,是台灣長老教會初代傳道師,老母朱氏鶯,有五個後生,三個查某囝,就是高金聲牧師,高篤行牧師,高再得長老,故高再祝長老,高再福長老,故黃秀輝(信期)教師娘高氏阿金,吳秋微先生娘高氏秀圓,李秉文先生娘故高氏秀理。

高再祝長老自細天資聰明,身體勇健,性情活潑,gâu運動做選手,就中走速力佮竹篙跳有特點。明治37年(1904)3月,得tiõh優秀ê成績卒業長老教中學。Hit時老父苦勸伊入神學,為tiõh老父做傳道家計困難,就志願做醫生來自給傳道。明治42年(1909)3月卒業台灣總督府醫學校,續來台南病院奉職一年。隔年(1910) 4月就來岡山開業,開建安醫院。高長老對患者親切,hō͘人親近,醫術高,致到名聲傳教四方。患者風評講:「若聽tiõh先生ê聲,病就好三分。」 對按呢患者逐日講數百名。

高長老到岡山開業ê時,岡山未有教會。Tùi長老ê熱心疼主,有招楠梓教會來援助。就明治43(1910) 12月,設成岡山基督教會。大正2(1913) 6月受揀做長老,來繼續盡力教會。有今仔日ê岡山教會,這是主ê恩典來成,也thang講是tùiê疼主直接間接ê援助,頭尾二十外年。

高長老m̄若盡力tī岡山教會,對外教會也真盡力。對各教派伊無分別,真有肚量,不論甚物教派ê先生到伊ê家,伊無惜金錢,歡迎好待,也真盡力佮伊合同做工。對國家、社會伊是一個功勞者。干單舉幾項:對長老教中學、女學、新樓病院、聖潔教會、日本赤十字社、在鄉軍人會,其他ê公共團體寄附金項bë少。昭和3年(1928) 2月21日,有得tiõh台灣總督府社會事業功勞者ê表彰。 

明治44年(1911) 4月21日,佮許翰ê長女許氏美結婚,成做幸福ê家庭,頭二十五年久;有七個後生,四個查某囝:耀東(1915生) tī日本齒科醫學專門學校,耀西(1917生) tī東京高等工學校,耀蒼(1918生) tī京都同志社中學部,耀星(1923生)tī長老教中學,耀明(1925生) tī岡山小學校,耀然(1930生)、耀民(1932生)猶細漢;智美(1912生)昭和10年(1935) 8月16日,佮醫學士洪雅烈結婚,慈美(1914生)是東京帝國音樂學校卒業,已經聘定台北李超然,雅美(1921生) tī下關梅光女學院,聖美(1927生)tī岡山小學校。

高長老平時是勇健,醫業以外有趣味濟濟項,其中最趣味是讀冊佮佈道。昭和8年(1933) 2月11日暗,忽然起盲腸炎,有經過台南病院、台北病院、東京聖路加病院,前後大手術6回,幾若擺受醫生宣言無望lah,,總是得tiõh主特別恩典,行權能h³伊平安koh倒來岡山照舊行醫。路加9:23,主講:「有信ê人逐項攏會。」

本年(1936) 5月10-17日,岡山拜堂有開連夜佈道會,長老雖然身體猶未十分勇,猶kú真出力鬥講演。Koh 6月2-4日大舉佈道,高長老佮長老娘攏出席鬥做工,歸榮光hō͘主。 

高長老有感念主ê恩,決心愛為主干證,熱心愛koh研究聖經,就tī 6月下旬過鼓浪嶼,beh赴查經會,了後也想beh去南京koh研究佈道ê工。可惜tī出外,天氣熱,活動勞過頭,身體漸弱,就tī 8月18日歸台。阮攏teh向望伊倒來thang koh  sa°-kap為主做工。無扑算主 ê旨意成,就tī(1936) 10月31日午前11點,soah伊世間ê tiõh磨,入tī主永遠快樂ê安息,享受50歲。 

可傷ah! 可傷!伊ê家庭失落一個寶貝ê頭人;教會失落一個靈界ê勇士;社會失落一個名醫。Ah! 高長老ah!!tī chit-ê非常時,岡山教會來失落你,koh ná猛人扑折伊ê弓,勇士失落伊ê箭。聽tiõh  ê人,逐個to ˜甘,有thang安慰伊ê遺族佮阮ê,是咱ê主。 當伊beh臨終ê時,有講:「Tiõh看,我ê心肝真平安,真歡喜,我beh倒來chhöe天父,吟聖詩第8首h³我聽。」 講soah,就安然佮主sa°-kap去。

隔日是11月1日,午前9點,tī高再得長老ê家做告別式(火葬)。同11日午後2點,tī太平境禮拜堂做葬式。會葬者一千外人,弔詞弔奠三百外通,花環聯軸真濟。式後,大家送伊ê遺骨到台南驛,5點外到岡山,6點tī家己ê家開追悼會,內台人二百外名出席。敝會簡記淡薄tī報紙上來siàu念故高再祝長老,求主安慰伊ê遺族,chhöan tòe伊ê腳步。 阿們。

 

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述