高忠福盲人見證集  

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

 

高忠福口述 盧恩惠筆錄 《Toe3主e5人有幸福》1968年,有盧恩惠牧師「介紹e5話」。另有漢文。台語文數位典藏資料庫(第二階段),白話字/漢羅台語文並列刊出。玆錄其漢羅台語文如下。 按:盧恩惠牧師ti7 1965年畢業台南神學院,受派來到媽宮,1968年5月5日受封牧,1974年8月9日離開媽宮。


介紹e5話(盧恩惠牧師)

我真歡喜有份ti7 這個見證集。che是做媽宮教會e5牧師e5福份。

我ti7 3年前畢業台南神學院,受派來到媽宮e5 時tu2 tu2 in媽宮teh起新e5禮拜堂。我ti7生活不便e5中間也漸漸bat媽宮e5會友kap澎湖e5事情lah。Hit時高忠福君iau2 ti7新莊teh讀冊。我有聽著伊過去e5消息,總是iau2 m7 bat伊e5人。

我會記得伊tu2 tu2轉來e5 時我真歡喜;教會加一位勇士、鬥士。總是經過無久我就失望。因為伊e5 見證,亦是講道lo3 lo3-長,m7 知伊是teh講甚mih8,只有知伊是teh感謝主-na7 tiaN7。Tui3現在來ka7伊看,伊ai3見證e5真濟真濟講boe7了;總是愛講是愛講,講boe7好勢。

我hit 時也是tu2 tu2做傳道na7 tiaN7 m7 kaN2批評Sim2 mih8;只有伊若ai3做見證,我就lui2時間hou7伊,hou7伊e5熱情有路thang thau。也最後伊若用熱熱e5心情teh祈禱e5時,我也同一樣e5心kap伊講:阿們

無扑算伊ti7 這2年外e5中間ti7 信仰上,ti7 講話上進步到an2 ni . 這是我所歡喜e5。這確實是主hou7 伊e5恩賜。高忠福君是一位滿22歲e5年尾gin2仔。Ti7見證e5中間,咱就會thang知影,伊是一個目珠無自由e5人;算是一個可憐e5人。總是主e5疼chiah大ti7 伊e5身上,所以愛做見證,報答主e5恩;宣揚主e5福音,榮耀主e5名。請咱繼續為著這位青年祈禱,hou7伊e5信仰無折斬,會thang堅持伊所信e5 koh,無boe7記得主e5恩情到ti7久久。

請咱逐家koh關心一項:「咱teh讀伊e5見證e5時,請咱kap伊相kap ti7阮澎湖e5款式;若伊beh坐船e5 時,船teh搖,請咱也kap hit隻船搖起搖落;經驗著阮澎湖e5滋味。」請咱代先為著阮澎湖歡喜;有這款e5青年ti7阮chia,這是阮e5福氣。請逐家為著阮澎湖教會繼續祈禱。

我ti7 媽宮已經3年半久,也ti7 chia做牧師。我有囥一個異象,ai3阮澎湖e5教會自養、自立kap自治。

阮澎湖教會hou7台灣教會aiiN7 82年久,就是tui3甘牧師(甘為霖,Rev. William Campbell)來澎湖設立教會到現在,攏是倚靠咱台灣教會e5聖餐獻金來維持。今阮澎湖已經有3間獨立,也經過15年lah。這3間若合作,koh有澎湖出身者e5協助,應該會實現以上所講e5自養、自立kap自治才著。向望ti7 3-5年後這個事會實現。也向望咱e5祈禱ti7阮澎湖眾教會e5頂面。最後祝福逐家身體、靈魂得主平安!

Ti7媽宮教末 盧恩惠.A.D.. 1968, 12, 17


頭緒

我真歡喜我久久所期待e5見證集會thang印出來。我這個計劃是ti7新莊e5學校時代就有e5。Hit時雖然有teh寫,總是寫攏boe7出來;因為無時間,也所想e5表達boe7出來e5緣故。事實上,攏iau2未為主做著工,報答主e5恩情,所以若ti7 hit時寫一定是一本無完全e5見證集lah。

到畢業後,我ti7媽宮,ti7澎湖有努力為主teh做見證,所以主也祝福我ti7信仰上較有充足e5經驗-lah。我將主hou7我e5信仰上e5經過寫ti7這本見證集。向望各位兄弟姊妹,繼續指導,替我祈禱。

我是一個年歲iau2少e5人;ti7生活上,信仰上iau2經驗少少; koh beh來e5日子iau2真長,beh遇著甚mih災害,或是魔鬼e5試探iau2 m7知。向望ti7 hit時會thang得著逐家e5祈禱kap指導,hou7我會企在。

我到最近已經家己有寫(點)濟濟張起來,總是m7知beh怎樣出版。到今年(1968)歇熱去花宅e5時有遇著陳國新君,伊是將軍澳 e5人,ti7新竹teh讀醫專。伊聽著我e5事情就鼓舞我去台灣各所在做見證,也贊成我印出見證集。今我應該著ka7伊大大說多謝。Koh有濟濟人ka7我幫贊翻譯白話字kap國語,我也ai3多謝in e5幫忙。也感謝主,伊差濟濟人來幫忙我。最後祝逐家心神肉體健康。

Ti7澎湖,媽宮(見證人:高忠福)敬上 -----------------------------------------------------------------------------------------------------

見證--全家e5見證

列位青年兄姊,我今仔日真歡喜將我全家信主e5經過,以及我本身tui3信得著e5祝福,ti7 chia寫淡薄做見證hou7逐家知影。

三代前:

阮e5祖先真濟代攏是信佛教。而且,我所知影 e5-tui3-我e5祖、阿公、老父這3代攏是愛食酒。Ti7職業方面只有做苦工度過一生。後來阮e5生活真困難。

我e5阿媽一生生真濟囡仔;其中也有細漢就夭壽,koh有e5因為生活困難無可能培養,就送hou7別人做子;只有家己留2、3個查甫囡仔。最後也有將一個上細漢e5查某囡仔送hou7別人做養女。

Hit時阮全家當然攏iau2未bat主耶穌e5名字;也m7知影囡仔是上帝所賞賜e5,也m7知影囡仔是上帝所交托咱養飼e5。無親像現在e5人得著主e5光照;知thang家庭e5計劃,thang保惜主所交托e5囡仔。

阿姑e5遭遇:

時間過得真緊。Tui3我上細漢e5阿姑送hou7別人做養女了後,不知不覺已經過去真濟年。我e5 阿姑也已經大漢。有一日,我e5 阿姑e5養母忽然破病真傷重。無論問佛,請醫生治療攏無效果。無偌濟e5積聚攏用了,病猶原boe7好,而且一日一日那嚴重。我e5阿姑e5養母就迫我e5阿姑去設法錢。我e5 阿姑無法度thang設法到真好勢,所以受養母罵講是不孝。古早e5人若hou7序大人罵不孝是真艱苦e5事。總是我e5阿姑雖然m7是不孝,iau2確實無辦法thang去設法錢。經過無幾日我e5 阿姑e5養母就死去。當養母病真嚴重感覺真艱苦e5時就對我e5 阿姑講:「我死了後一定m7願你,beh做鬼來chhe7你。」

阿姑koh破病:

養母死了後家庭更加混亂,生活那困難。我e5 阿姑看見家庭已經家散人亡,伊e5 心真艱苦。後來伊就倒轉去生母e5所在。隔無幾日我e5 阿姑就起神經病,而且遍身生瘡;經過真濟醫生治療攏無效果。我e5 阿媽就去問佛。佛對我e5 阿媽講,我e5 阿姑是hou7鬼纏身-e5。我e5 阿媽知影了後心真艱苦,為著beh hou7我e5阿姑病好,就去問佛看beh用甚mih方法醫好我e5 阿姑e5病。佛ka7我e5 阿媽講濟濟方法;我e5阿媽就照an2 ni去做,而且koh獻真濟錢做廟e5路用。koh用真濟物件去拜佛,向佛下願講,佛若醫好我阿姑e5病,願意將我e5阿姑奉獻hou7 佛做伊e5路用。結果我e5阿姑e5病也無得著醫好。後來我e5阿媽koh去請真有名e5法師來ka7我e5阿姑趕鬼。總是攏無可能thang hou7伊好;反轉那嚴重親像beh死一樣。Hit時阮全家攏為著阮e5阿姑真傷心。

主e5使者到:

有一日忽然有一位查某人來阮厝。這個查某人是我e5阿媽e5好朋友;是一個信主,拜上帝e5人。我e5阿姑e5病暝日boe7食boe7睏tit,暝日擾亂家庭。Hit時hit個女信徒看見我e5阿姑這款情形,就問我e5阿媽是甚mih原因。我e5阿媽就ka7伊講。女信徒聽見我e5阿媽e5解說了後,就為著我e5阿姑祈禱;也順機會傳福音hou7我e5阿媽。女信徒講:「你e5查某子既然倚靠醫生,用種種治療e5方法,病猶原boe7好,今請你 m7免為著an2 ni心擘腹;倚靠世間e5醫生藥方雖然無向望,但是iau2有一位(救世主)耶穌基督。伊為著咱e5罪降生到世間專門醫病趕鬼kap解除人e5罪過。人boe7會做e5事伊攏會得做。伊也有權能thang hou7人tui3死koh活。伊是咱靈魂最大e5救主;肉體最大e5醫生。你e5查某子e5病算是小可。你若願意將你e5查某子e5病交代ti7這位真神耶穌e5手,伊就beh醫好伊。當咱進退無路e5時只有著chhe7救主耶穌;無論環境怎樣艱難、痛苦、病疼、憂愁kap煩惱,咱若信靠伊,伊就為咱解決一切問題

阿姑入信:

我e5阿媽聽了後,心受聖神e5感動,就決意beh hou7我e5阿姑信主耶穌。Hit位女信徒聽見我e5阿姑beh信耶穌,心真歡喜,無久就離開阮e5厝去媽宮教會請牧師來替我e5阿姑祈禱。這位女信徒是現在台南民族路教會e5許山潤牧師e5丈姆,名叫李陳多加 (李任敏嫂)。Hit時tu2 tu2林照牧師ti7媽宮教會做牧師e5時。多加姊就請牧師kap濟濟信徒到我e5家庭做聖別禮拜。我e5阿姑tui3 hit日聖別了後,得著主e5憐憫,病就漸漸減輕。我e5阿姑每暗beh睏e5時,hit位女信徒,多加姊,攏來為著伊祈禱。果然祈禱e5功效真大。經過無幾日,我e5阿姑e5病就完全好去。

魔鬼苦楚我e5阿姑:

我e5阿姑信主了後,魔鬼就m7 kaN2- koh苦楚伊。但是魔鬼真凶惡,m7願離開阮e5家庭。後來魔鬼就反轉苦楚我e5老母。我e5老母受魔鬼苦楚e5情形也是真厲害。當我e5老母受害e5時,我e5阿媽猶原是去問佛;看是甚mih原因,佛講,我e5老母是犯著鬼。Koh講hit e5鬼是我e5老母前世e5丈夫。Hit時我iau2真細漢,只有我e5阿媽用真濟e5方法beh趕鬼e5事我有記憶na7 tiaN7。但是攏無功效。後來有koh去請真濟趕鬼e5法師kap醫生來治療我e5老母e5病。總是攏無效果。有一日hit e5女信徒(多加姊)koh來阮e5厝。看見這款e5情形,就對我e5阿媽講,叫我e5阿媽著hou7我e5老母信耶穌。Hit時我e5阿媽才想起以前我e5阿姑e5事,就真願意hou7我e5老母信耶穌lah。Tui3 hit陣了後我e5老母e5病就好去。

Tioh8到我e5阿公:

經過無偌久我e5阿公出外工作e5時,無小心hou7 一枝大杉teh著一支腳e5指頭仔。情形真嚴重。後來得著媽宮教會e5信徒kap牧師e5關心kap幫贊,每日用車載我e5阿公去hou7 醫生治療。也常常到我e5家來探訪kap代禱。Tui3 an2 ni我e5阿公心受感動;有一日伊就beh決意信耶穌基督做伊e5主。多加姊liam5 piN知我e5阿公beh信耶穌,就順這個機會向阮全家傳福音。伊講,請lin2全家tui3今仔日起來信耶穌,魔鬼就無空縫thang來koh陷害lin2。全家聽了後心得著聖神e5感動, tui3 hit日起阮全家真歡喜迎接主耶穌進入阮e5家做家庭e5主。

全家歸主:

阮全家tui3林照牧師聖別禮拜了後就成做平安kap歡喜快樂,充滿調和氣氛e5家庭。全家受聖別有8個人,以外m7願意信主e5是我e5二叔一人。當聖別hit日伊tu2 tu2無ti7厝,出外做兵。Ti7休假e5時伊轉來厝,看見厝內一切偶像攏受除了了,就問我e5阿媽,看是甚mih原因。我e5阿媽就對伊講,咱全家信主,也將一切e5經過講hou7伊聽。總是我e5阿叔真受氣,而且反對阮去信耶穌,入教。

阿叔e5反對:

Hit日是農曆12月29日,in e5休假日,隔日就是正月初一。我e5阿叔就開始行動lah。伊決意愛beh koh繼續拜佛,就kap無信主一般e5人像款,貼聯、結彩。Koh去外面帶真濟偶像來厝nih beh--服事。奇妙無奇妙,29暗我e5老母beh睏e5時就koh受魔鬼苦楚開始艱苦lah。而且hit e5情形比以前較嚴重。Hit暗我e5老母攏通暝無睏,全家攏為著伊來驚惶。到天光e5時我e5阿公就去馬公教會將chiah e5事對牧師講。牧師就koh去阮兜,舉行第2遍e5除偶像e5禮拜;也為著我e5老母,全家跪落ti7主e5面前認罪祈禱。我e5老母就復到健康e5身體起來。

信主得平安:

我會記得我細漢e5時,我e5阿公對我講一個故事。伊講,當伊35歲, iau2未信主e5時有一遍破病真嚴重。伊認為無望lah。有一日伊就去問佛,看伊e5壽命會當活到幾年。佛講,我e5阿公最長壽命不過到72歲。總是我e5阿公信主了後,主祝福伊hou7 伊現在活到78歲iau2真健康。這雖然 m7是真偌好e5見證,但是我e5阿公相信伊信主了後,主確實有加添伊e5歲壽;也hou7 伊e5心平安無煩惱,凡事交代ti7主;確實身體有較勇健。阮全家歸主是民國40年(1951年)。也我e5 阿姑結婚是民國42年(1953年);嫁hou7一個醫生。無久我e5阿姑就搬徙到台灣去。

阿姑好額就離開主:

可惜,我e5阿姑搬到台灣了後,因為家庭e5束縛,生活又koh富裕,就漸漸boe7記得過去伊e5艱苦;也boe7記得主怎樣拯救伊脫出苦難e5日。伊ti7 hia boe7會感謝主,反轉ti7 hia漸漸放棄聚會,an2 ni伊kap主溝通e5時間漸漸少lah。相像an2 ni,阮ti7 chia e5全家,也經過一段時間了後漸漸boe7記得主e5恩惠。可憐,無可憐ah-!

M7 thang忘恩背義:

列位兄姊!這 kiam2是一個忘恩背義e5信徒mah?當一個人真疼咱e5時,咱若boe7會感謝伊,報答伊e5恩典,無常常kap伊來往,反轉當做無相bat e5人,我相信hit e5恩人一定傷心。Kiam2 chhai2 hit e5人beh灰心失志,想講,伊所做e5攏歸ti7 空空。親像an2 ni,上帝拯救咱脫離一切苦難,疼咱攏無煞。咱若boe7會感謝伊,報答敬拜伊,上帝e5神一定會憂悶。我相信我e5阿姑以及阮全家,以前e5艱苦若m7是主e5憐憫就m7知beh koh變成甚mih款歹e5遭遇。我向望咱逐家攏會thang知影主e5疼,同時也會thang知影主為著咱e5罪獻伊家己e5生命,受釘死ti7十字架頂,疼e5救贖。願咱逐家看見che小小e5見證也會thang想到主疼痛e5偉大來堅強咱e5信仰。An2 ni主就beh祝福咱。M7 thang親像阮e5 全家成做忘恩背義e5人。

主無放sak阮

佳哉主iau2疼阮全家。阮全家離開主了後到ti7民國50年(1961年)才koh得著主e5憐憫叫醒一家3人反悔,認罪,koh來赴聚會。雖然an2 ni我iau2向望主koh繼續叫醒阮全家,hou7 in一世人決心跟te3主。總是人e5所想若m7是主e5意思就攏boe7成。願主憐憫。願阮e5祈禱受主接納e5日ti7近近。

請咱來吟,聖詩275首:至好朋友就是耶穌 1.至好朋友就是耶穌,擔當罪過kap煩惱, 真正咱有大大福氣,萬事攏thang對伊討; 心肝常常失落平安,Tauh8 tauh8掛慮艱苦事, Che是對咱未有深信,未有放心交托主。 2. Kiam2 chhai2 tu2 tioh8憂悶試煉,抑是甚mih大煩惱, 的確m7 thang常常失志,Tioh8將逐項來祈禱; Kiam2有朋友到chiah盡忠,甘願體貼萬災禍, 耶穌知咱心e5軟弱,將che苦事來祈禱。 3.設使厭懶攏無氣力,親像擔擔beh跋倒, 至大救主咱thang親近,萬事攏thang對伊討; 朋友若有看輕iam3賤,Thang將che事來祈禱, 主會用手遮chah8、保護,心thang安然免煩惱。 阿們

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述