追念高天成博士  

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

 

《台灣教會公報》941號 1964年9月P.14

高天成,1904年12月12日生, 1964年8月13日過世。


高天成博士是咱教界的元老故高金聲牧師的令長郎。出身長榮中學,同志社中學,日本第8高等學校,東京帝大醫學部,有得著細菌學的醫學博士,閣是外科的專家。日本時代捌受派遣到南京做院長(同仁會南京醫院外科主任)的工。光復後對日本回國,受聘請做台灣醫學院的教授,閣做台大病院的院長也已經12年lah。伊佇(1964年)8月13號過世,享壽 61歲。因為伊做國家做重要的一間病院的院長12年久,貢獻真正大。所以過世的時,總統也題字「績學清獻」來kā伊表弔意,以外自副總統以下,國家濟濟元勲顯要,攏有來弔慰,通知伊的存在佇國家是偌nih重要。

伊的做人,照新聞報導,毋若是學問懸,醫術好,就是誠懇,仁愛,待人親切,到佇幾年來,家己的身軀有病,應該著專工休息,猶過當局一再挽留伊任職,愛伊病體復原親像前按呢服務來貢獻。最後聽講猶過拖病去赴一个獎學金會議,替伊所服務機關爭取一筆數額可觀的獎學金,了後自按呢沉重無閣起床。到佇伊過世的時,因為平素對伊的部屬上下級的人員都一律仁愛親切,所以hiah-的受著疼痛的人,無論是護士,á是付添的ou-ba-sang都攏傷心,流目屎吼來毋甘。

台大醫院拄拄光復後若有看著的人就攏知影,是一片又大,又lah-sap 的所在,內面的護士有人叫伊做「白衫的孝女,」意思是護士的地位真低。總是高博士當院長了,醫術也beh提高,人才也愛登用挽留,待遇,地位也beh提高,設備也beh改善,閣beh爭取外援佮預算來建設收築。若毋是真正有才能,閣有高尚的精神的人,實在無法度按呢做。高博士就是佇這款情形下做到不止理想的人才。

捌有濟濟記者拄著特別的病例,三更半暝,á是透早透暗去向伊採訪,伊都親切應接,甚至病人的情形毋免閣看診斷記錄,會通指出數字向記者說明,予新聞界的人也真欽佩閣數念。

過世以前有遺言交代講:願意捐獻遺骸做解剖研究的路用,到過世了,伊的遺族果然欣然答應將伊的內臟久長留起來做研究的標本。

(1964年8月)19號告別典禮的時,有1-2千人參加,通講是過世猶過有賰的光榮。

高博士無後嗣,所留只有夫人故林獻堂先生的令嬡(林關關),總是生前受伊疼痛的人真濟,也有濟濟予伊��義子,義女,其實通講伊的基督的精神所結真濟的果子,都攏是伊的後嗣兒女。

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述