日本傳道記

鄭連坤撰 「日本傳道記」 《台灣教會公報》 1040號 1968 年11月15日 p.21-22 原文是白話字。


本總會海外宣道會,頭一擺派5个牧師去日本培靈佈道。得著熱烈歡迎;建立華日兩國教會的進步親善關係。依照海宣的要求,請鄭牧師來寫去日本佈道的經過,做海宣的工作報告。(編者)
這陣接著主筆先生的命令,叫我著緊寫報告通出佇公報。我掠做阮這團的團長黃加盛牧師會寫,總是到這-陣攏無看著報告。因為受命令毋敢推辭,閣驚了時間經過傷久會失去彼个意義。所以好膽緊來寫幾字,恭敬向全台的諸位兄姊報告。
  1. 目的-1967年10月日本教團有正式頭一擺派7位牧師來台灣傳道,受咱各教會的好款待。今照當時的約束,咱也著派人去交換傳道。
  2. 受派的人-經過海外宣道會開會,黃加盛,陳蘭奇,郭東榮,郭東輝,鄭連坤5位牧師受選派。
  3. 期間-1968年7月1日郭東榮,郭東輝,鄭連坤3个先出發,彼暗佇東京目黑(Meguro)受教團總會議長以下傳道委員長,傳道總主事等10人的歡迎會,7月2-5日去八王子(Hachioji) 參加教團的第19屆夏季教師講習會。怹的主題叫做「教會制度的確立」,各教區派2名代表,所以正式會員30名。彼个會不止趣味閣真有內容。
7月5日半暝黃加盛牧師到位。7月6日起出發,個人做10日久的第一次傳道。所受派的教區:黃加盛-東京教區。郭東榮-北海教區佮神奈川 (Kanagawa) 教區。郭東輝,鄭連坤-京都,大阪,兵庫 3教區。7月17日佇教團事務所開中間報告會,18日閣出發去做第二次傳道。黃加盛,郭東榮-東北教區。郭東輝-奧羽教區。鄭連坤-關東教區。29日閣攏轉來東京。30日閣出發去富士山跤的 東山莊參加教團第一的信徒學校,到8月1日轉來東京。8月2日佇教團事務所開盛大的感謝會兼報告會,同時舉行解團式。按呢拄拄一月日較加的工作結束。
陳蘭奇牧師為著手續的關係到8月5日才到東京,就照前的計畫去北海道教區做工。
  1. 結果-對日本教團看,這个是頭一擺台灣教會派人進入怹的教會做工,所以大家真歡喜,閣彼个結果真好,因為日本拄拄1967年發出對第2次世界大戰爭責任告白後,有接著咱入去到真庄跤的教會去問安宣揚福音,對按呢加添兩國間佇主內的親密的交陪。
1967年,來台灣傳道彼7位牧師有寫一本真詳細的報告書,向望咱台灣教會有緣故的單位佮信徒來買彼本冊,的確會得著真大的利益。
我相信去做工的各位牧師有閣較詳細的報告佮感想才著,我只有用這个概要報予大家知,紲深深感謝大家的代禱佮關心。