劉忠堅牧師遊猶太國 (1928)

 

頁Home /本土信徒 / 日人列傳 /宣教師 / 洋神父 / 原住民 / A / B / C / D / E / F / G /  H / I-J / K /  L /  M  / N-O / P-Q / R / S / /  V / W  

劉忠堅 ( Rev. Duncan Macleod) 撰 編輯室 「劉忠堅牧師佇猶太國」 《台灣教會報》521卷,1928年8月 p. 6-7 原文是白話字。 

阮滯佇埃及開羅(Cairo) 的所在5日久。有登佇大金字塔的尾溜,實在艱苦登,總是光景看真遠。也有去佇博物館看這今年開著的法老墓的寶物真希罕;彼個金類算袂(be7)了。
佇 (1928年) 3月16號坐暗車去東北,到天光就到佇迦撒 (就是早菲利士人的城),也頂晡10點鐘上耶路撒冷。因為現時有自動車(汽車),就旅行較利。頭一日阮有看回回教的大禮拜寺(Mosque of Omar)就是佇往過聖殿的地。也有去佇猶太人哀哭所,怹猶原teh哭本國所失落的榮光,聽了實在可憐。耶路撒冷比海面懸(高) 2000尺,阮對遐去佇死海,比海面低1400尺,離25英哩。有過耶利哥,也看約旦河。佇死海洗浴;試看沈,袂沈,因為水hiah nih鹹!
隔日去佇伯利恆;佇路裡看見拉結的墓。佇伯利恆有所掠做主出世的馬槽,怹知是抑毋是。可惜彼所在對佇羅馬教佮希臘教譴損的裝飾就攏失落彼的本來的面目。
轉來耶路撒冷就去迦拿山,chia因為有濟濟建築就oh得想像早日的狀態。也有看畢士大的池,佮彼個掠做主舉十字架的路 (Via Dolorosa)。 禮拜日去聖夢拜堂。這間雖然是圓圓的真大間,iau2-ku2佇邊仔有分幾若間, 予天主、希臘、士利亞、埃及 (Coptic)Chiah 的基督教像一時隨e7做家己的禮拜式!!真攪擾袂會莊嚴。也有英國的警察teh守,驚了有相爭!
離開遐去北勢。佇下晝時經過撒馬利亞,也有飲雅各的井的水,真涼。有倚基利心佮以巴的山腳,也有去示劍(Nablus,這所在佇近來的地動有大損害)。佇遐有古早撒馬利亞派的老祭司,伊有將極早摩西五經的文予阮看。閣過山就經過耶-su- liat的平洋。這是肥地,前袂 bat看肥地佇迦南!才到拿撒勒;佇chia所受的感觸oh得講。有thang看馬利亞的井,也有登彼爿的山。佇遐看見冊面所記的光景就是咱聖道有出名的所在。佇北爿離60英哩有赫文山蓋雪teh閃。
離拿撒勒過迦拿城就下晡4點到迦利利海的提比利亞,就是佇海的西南。這的地方是真低,比海面低682尺。佇主的時希律安提帕有伊的王宮佇近附的山邊;也有出名的硫黃泉佇遐。現時蘇格蘭的長老教有設醫館抵佇海墘,阮有滯佇遐佮宋姑娘(Hazel就是He-su3)做夥。阮對遐坐船仔佇海面也有去迦百農。閣不時teh看彼的玉山赫文。可惜時間真迫,就beh連鞭轉去地中海邊ai3過禮拜日佇迦蜜山。 (頂面chia 的是對劉忠堅牧師的批譯的。廉得烈牧師也佮伊去)  

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述