連瑪玉:初訪霧社

初訪霧社.巴蘭

 

頁Home /本土信徒 / 日人列傳 /宣教師 / 洋神父 / 原住民 / A / B / C / D / E / F / G /  H / I-J / K /  L /  M  / N-O / P-Q / R / S / /  V / W  

 

蘭連瑪玉(Marjorie Landsborough) 「霧社e5生番」 《台南教會報》 433卷,1921年4月
按:此文是撰者夫婦偕同傳道王倚(後為牧師,1887-1969)往訪霧社(今屬南投縣仁愛鄉)、訪當時霧社群最大部落的巴蘭(今南投縣仁愛鄉大同村高峰附近)時的見聞。  

埔社傳道王占魁(王倚)先生有kap阮兩人去霧社(今屬南投縣仁愛鄉),路對埔社街,是四舖e5遠 ,有輕便車三舖,直直上崎入東,其餘一舖著步lian2, hit站e5路是愈崎,路尾站著直直peh,非常崎。 阮teh坐hit張車,有兩個台灣苦力teh sak,m7 ku2 ti7路nih有真濟生番teh倒轉去山nih,伊看規陣輕便車來,真歡喜,in掠做sak車比空空行路較心適,轉去也會較緊,所以in幾若人鬥出力sak, in真gau5走,身軀也扭掠真好看,真可惜有兩人酒醉,因為ti7埔社過暝,無抵好e5所在thang睏,致到ti7店nih直直lim酒到半暝,然後倒ti7 chhin7-chhai2塗腳睏。
Sak阮hit張車有一個16、7歲e5查某囡仔、真sui2,伊讀霧社e5生番學校,才會曉講日本話,王先生就kap伊相借問,續有順機會hou7查某囡仔知有疼世間人e5上帝。
阮hit早起8點半起身,下晡3點到霧社,阮袋仔內e5方針看了,就知是3400呎懸(高),論hit e5光景是不止好看,可惜hit日有雲霧真厚,致到阮看be7明。
Ti7霧社有歇ti7日本旅館,逐項攏利便,hit下晡真夠額看,也四圍攏霧霧,路對面e5厝也看be7現,所以阮無出去,kan-ta坐塗腳烘火,相交陪,王先生後來出去設法beh hou7阮去生番庄社。
過暝,阮就早早起來,食飯飽有警察來chhoe7 阮去一庄,名叫巴蘭,離霧社兩、三里na7-tiaN7 Peh到hia,阮koh看方針,就知是lim 4000呎懸(高),好佳哉hit早起較無霧,四圍有看著懸懸e5山,山頂有雪蓋teh,白白、sui2-sui2,實在真好景緻。去hit庄社e5路邊有真濟樹,上好看是日本對重e5櫻花樹,抵hit陣有攏開花,是水紅色真sui2。
到巴蘭社有四界行,看真濟項真心適e5事誌,in e5厝是起柴e5,一枝一枝than2企,小可lang3縫hou7風thang吹,厝是一間一間。廳、房間、灶腳做夥一間,塗腳有起火,無灶也無煙筒,逐間有粗粗鋪枋e5眠床兩位,低低,抵抵ti7火e5兩爿,hou7人thang烘燒。真奇怪,雖罔非常e5懸,生番攏無蓋被,in所穿e5也真少,腳無穿褲,衫也開開,無鈕,暝時若寒,著添火愈焰。阮有入幾若間,王先生直直問警察,也有翻譯hou7阮知生番e5風俗。
Ti7一間有teh食早起頓,in無飯thang食,較濟是食蕃薯、菜kap黍仔米。生番有飼豬kap水牛,m7-ku2較少,若有thai5,才有肉;有時ti7 山nih有扑鹿,抑是山豬,若扑著,就逐家分分來食,照聽無賣。Hit早起頓teh食,阮看真心適,有蕃薯kap青菜參做夥ti7鼎nih煮熟,鼎就下ti7塗腳,生番是khu5 teh食,in攏無舉箸抑是匙,kan-ta用手來食。蕃薯無削皮,食e5時就擘,蕃薯kap菜雖罔燒滾滾,伊也be7 hou7 in燙著手,敢是為著慣勢。In煮菜e5時無參鹽,食飽就食鹽,真奇怪。
生番攏歡喜阮入in e5厝,也有kap阮行禮。查某人e5面攏有刺字(黥面),iau2未出嫁有刺ti7頭額na7-tiaN7,嫁了連雙爿嘴phoe2也刺,所刺e5字是藍色,現時日本人m7准koh刺(按:1913年9月,當時隸屬霧社轄區的南投廳,下達了廳下全面禁止黥面的命令),總是生番看真sui2,所以有時偷刺,查甫人kan-ta刺一塊仔ti7頭額。
阮iau2未去三月日前,ti7內山e5庄有反,也有thai5日本警察佮家內共8人,對an2-ni官府有勉強巴蘭e5生番去扑hit內山e5庄,巴蘭生番真歡喜,因為若thai5著頭人e5,官府beh賞5百箍。
一月日前,文姑娘(文安,Miss Annie E. Butler) kap洪姑娘(Miss PeggyArthur,後來嫁梅監務牧師)有去霧社,抵hit陣官府m7准in去巴蘭,因為hit時 25人e5頭殼有縛ti7竹篙,m7敢hou7人客看。阮這pang去,頭殼已經埋了,m7 ku2竹篙猶ti7 hia,照警察hit陣ka7阮2講生番有信神明,縛頭殼e5所在有一個台仔,台仔頂有排黍仔、蕃薯、肉hou7神thang食,竹篙也有縛草一絪一絪,意思是做樓梯hou7 hiah e5已經死e5人thang peh上做成神。 生番若是thai5人,就有提頭殼內e5腦髓出來食,意思是向望會較勇猛,較有氣力,koh有食一塊仔嘴phoe 抑是頷頸e5肉,顯明in會koh再thai5別人。現時這款e5歹,官府m7准,m7 ku2有時有偷thai5。
論其餘e5風俗真好,生番一概無偷提別人e5物,第七條誡也罕得犯著。若抵著,hit人e5親人真受氣, m7認伊,趕伊出,扑傷重,thai5伊也敢。查甫人也m7 bat娶兩個某,娶e5禮數kap台灣e5略仔相像,不過若娶了,翁某就離開in父母厝,另外起一間thang toa3
阮對巴蘭轉來霧社有停ti7 學校,這間學校有設已經14年e5久,先生也有e5 對設教到今, in生番e5話真gau5講,連hia e5警察也著會曉,才會thang 擔當in e5責成。現時學nih8 e5學生有百出個,查甫查某攏有。Hit早起iau2 boe7到點,所以囡仔ti7外面teh chhit-tho5,先生用好禮款待阮,阮就請伊叫學生入學hou7阮看,囡仔代先有唱日本歌幾若條,後來先生就寫幾若款e5算術ti7烏pai5,叫學生一人一人來算。囡仔活動,真歡喜,也是gau5算,攏無錯,碼子也sui2,Koh再後來先生有問國語幾若項e5事誌,這款四年生真gau5應,國語(日語)gau5講。阮坐ti7囡仔e5對面,看in e5面紅紅sui2-sui2,in也真致意真活動,真愛讀冊。
到9點,阮有起身轉去埔社,hit日四舖e5路有步lian2,到下晡4、5點有到位。Hit日ti7 路nih8,王先生佮阮e5心be7免得憂悶,大煩惱,因為阮看chiah e5生番無路thang bat上帝,照阮hit日議論e5,咱教會敢無thang分咱e5道理hou7 in聽?咱已經得著真實e5道理、咱敢m7著hou7 chiah e5山nih e5-生番有機會thang聽?Kiam2 chhai2有看報e5人愛講:「M7 ku2-咱無夠額傳道,咱e5台灣iau2未有齊備聽著道理、咱thai3會hou7內山e5生番聽?」
兄姊啊!咱台灣人其實iau2 boe7有齊備聽,m7 ku2-咱海嶼聽道理e5台灣人約略有三萬人,敢無thang家己直直傳,直直引chhoa7到世俗人會攏聽著?
今咱e5救主耶穌有講:「Lin去普天下傳福音hou7萬百姓。」咱有趁伊e5命令抑未?照想iau2 boe7,因為生番m7 bat聽耶穌e5名,Koh馬太24章14節有講:「這個天國e5福音be傳到通天下,做干證ti7萬邦;hit時末期就到。」所以咱若無趁耶穌e5命令hou7生番thang聽,耶穌著ian5 chhian5,耶穌e5話明明,驚了咱若m7甘願傳hou7生番聽,是若親像阻擋耶穌koh來。 抑是來講,耶穌若liam5-piN koh來,咱an2 chaiN2樣有面thag接納伊,因為咱e5道理囥teh閒,無分hou7生番thang得著救。 咱e5牧師、傳道以及同著磨e5會友,若本身去看霧社e5生番,我敢講liam5-piN有大欣慕beh hou7 in有份ti7咱得著道理e5福氣。致意請咱教會求上帝開路,向望有好膽熱心e5人歡喜獻身去傳播。「我是世間e5光,Lin 是世間e5光。」  

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述