安彼得醫生娘過往

安彼得醫生娘過往

 

頁Home /本土信徒 / 日人列傳 /宣教師 / 洋神父 / 原住民 / A / B / C / D / E / F / G /  H / I-J / K /  L /  M  / N-O / P-Q / R / S / /  V / W  

「安醫生娘」《台南府城教會報》274卷 1907年3月 p.17

按:安醫生娘(Mrs. Peter Anderson), 1882年12月29日來臺,1906年9月20日因病離開台灣,而於同年12月27日在愛丁堡(Edinburgh) 過往。


(1906年)12月27號(舊曆11月12日),安醫生娘佇蘇格蘭過往。

安醫生娘是蘇格蘭人,佇1847出世。伊少年的時gâu讀冊,學做先生;雖然後來著料理家事,伊猶過有愛教冊的心。親像佇旗後teh教日本人,到致病的時猶過愛教,通解悶。佇1882出來台灣匹配安醫生。對彼時不止致意鼓舞醫館的代誌。

原本佇舊樓設法予病人學白話字,以及鬥贊醫生做幾nā項零星的工。日本來的時有得著一塊地,通起新醫館; hit-tia̍p伊不止出力鬥料理起造新醫館的事。起了真歡喜,閣較通照心所愛;毋nā看顧病人,也有照顧學生的品行。

起好無偌久醫生佮醫生娘倒去祖家歇睏。到閣來台灣就去旗後開設醫生館,向望較有機會通去看逐位的教會。佇遐暫蹛梅醫生的樓(Dr. Myers’House)。無偌久拄著風颱雨,樓倒壞, 著閃避別位歇。舊年佇海墘起一座樓,醫生娘猶原鬥發落;佇遐較有通安歇。也致意揣 hit-tah 的姊妹,勉勵in來禮拜;每拜二下晡幾nā十人聚集聽伊的教示,ná久ná濟。

不幸樓起好,醫生娘就破病沉重,著來府城予醫生刣割。 醫了無斷根;大家議論著chhoā伊倒去祖家較好,通去安慰伊的囝。 到位症頭ná傷重。伊的心真平安,身軀真艱苦;毋敢求加活幾nā年,甘願予上帝召伊倒去。彼時託重伊的丈夫著致意請安台灣chiah的朋友;也毋通袂記得人所寄in買幾nā項小可的物。就佮伊全家相辭,安然過往。

出山的時陣伊的朋友攏來送葬。 從中宋牧師,梅牧師,佮蘭醫生也來;請梅牧師佇公塚禮拜。

伊有六个囡仔,三个後生三个查某囝;一个查某囝細漢死,葬佇台南的公塚。

伊蹛佇台灣二十外年久,常常teh想怎樣通利益台灣的百姓。「教示恁的人,恁著數念in,著想in行按呢的功效,也著趁in 的信主。」

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述