許進傳長老小傳

許進傳e5小傳編輯室 《台南教會報》第291卷，1909年6月 

長老出世ti7 1840年12月26日，企起ti7彰化街。長老自細做工就不止殷勤，也盡有孝父母。Bat一擺老母病沈重偌久，伊就服事無離身邊，進奉茶湯。有時捧藥beh hou7老母食，老母的確m7食；伊看老母hiah艱苦，家己想beh ka7伊分hit e5艱苦是be7會，就續替伊食藥；是beh hou7老母e5心歡喜。也食初一、十五齋，kiam2大頓hou7老母食，是因為家內散hiong。

較早tang時伊bat聽見傳道吳文彬（吳雞母）講道理，伊e5心想ai3 beh趁， m7 ku2老母teh阻擋，所以m7敢koh去。差不多hit時tu2著家內kau7病痛續死3、4個囡仔，be7免tit大煩惱激心。總是那kau7代誌就續那熱心去服務。

有一日出去買金香，即beh轉來tu2好ti7路nih聽見傳道黃茂盛，teh講真理。Tu2 hit tiap8黃先生teh講起頭一首e5詩講：「天中所飛e5鳥隻，上帝創hou7食夠額」。Tui3 an2 ni聽了受感激，想講，鳥隻無種作，上帝hou7伊食到肥lut lut，攏無欠缺半項，我做到無暝共無日，也真欠缺，是hou7柴頭佛仔搶到欠缺。隨時將手nih所提e5金香，即去還店nih。Tui an2 ni決意反悔來信主；hit時伊56歲。

Tu2到59歲入聖會。Ti7教會不止熱心，過無偌久就hou7會友揀伊當長老e5職。到當職就不止出力teh利益教會。會友若一兩禮拜無來，伊就liam5 piN到in兜去勉勵伊。凡若會友e5所在伊罕tit lang3一月日無到；雖然是路遠伊也無嫌著磨了工。

長老是做販肥料e5頭路；聽道理無偌久，伊就越途做雜貨仔生理，今teh四界賣續干證咱e5主e5福音。Tu2著若有機會，就續be7顧tit賣物，專務講道理。有時講到物hou7人偷提偌濟去；有時講到暗摸摸才入門。伊koh有立一個願就是5日久做生理，到第6日（拜六）就專工koaN7一面鑼四界摃，叫人來聽伊講耶穌。有時姑不chiong hou7工程縛teh趁錢，be7 tit去佈道，伊就將hit日所趁e5錢一盡獻ti7教會。伊teh賣雜貨仔中間也有茶箍,後來人攏講伊：「五日賣茶箍,六日講耶穌。」（按：林學恭談梅監務時云有一日，阮ti7彰化e5廟口teh佈道，tu2有一個老人beh來燒金，聽著梅牧師teh講道理，受感動，立刻反悔信主，以後熱心佈道，救人濟濟。人bat流傳講：「6日賣茶箍，7日講耶穌」，就是這個人，伊e5名叫做「老進伯」）

伊也常常kap梅牧師、林牧師（去佈道。Bat一擺kap蘭醫生去佈道poah8落深水，卻真艱苦。Tui3 tu2著危險就那知世間m7是久久e5所在，就koh較出力做主e5工。

彰化起一間禮拜堂，算是咱台灣第一大間仔。長老無離暝日關心teh鬥設法起拜堂e5代誌。也有拾十幾個銀錢原tu2 beh做棺材本。到起拜堂時續將hiah e5銀贊起拜堂e5所費。平素伊也常常歡喜出錢獻做教會e5路用。

進傳伯雖然59歲就入教，原本攏m7 bat字，iau2 ku2出力學白話字到真熟。往往較早起來存辦工來看聖冊、吟詩、祈禱。

到1907年3月間就起破病， be7 tit去做生理。總是猶原勉強去探會友。查考長老起病e5因端是tui3 lek8 lou7過頭所致。到4月間就be7出門，病勢那傷重，食藥無功效。Ti7這時家內e5人問伊看有beh吩咐甚mih話？伊講無甚mih別物話thang吩咐，只有一句做第一要緊，就是：「Lin著做耶穌真實e5學生，toe3我行天路」。到5月1日就平安hou7主接納轉去伊e5聖國。「伊煞伊e5著磨，功勞也toe3伊」。