懷念孫理蓮宣教師── 猴母導猴囝

 

頁Home /本土信徒 / 日人列傳 /宣教師 / 洋神父 / 原住民 / A / B / C / D / E / F / G /  H / I-J / K /  L /  M  / N-O / P-Q / R / S / /  V / W  

《台灣教會公報》 3089期 2011年5月9-15日 p.25 育惪 撰。

漢羅台語文。 連續tī《台灣教會公報》kap其他刊物,讀著思念女宣教師孫理蓮牧師娘ê文章,感觸時間過得有夠緊,若親像設立無久ê「基督教芥菜種會」連鞭60年,當濟濟人為「孫理蓮宣教師110歲感恩音樂紀念會」teh無閒ê時,我也進入回憶ê磅孔………..。
Tī青年時,bē少pái聽著孫雅各牧師講道,阮會注神聽,是欲聽他輕輕ê台語口音:猶太人kap撒瑪利亞人無「旺梨」(往來);彼得「咬死」(教示)人;「用驚」(勇健)ê人無「儉」(欠)醫生,若是破病ê就tio̍h………..。孫牧師講ê道理真淺白,阮lóng聽有,只是外國人講台語,古錐koh趣味。孫牧師夫婦同心為著原住民(當時lóng講山地人)ê付出,真感動人。
會記得我頭一pái聽著 Monkey’s Mother是teh指孫牧師娘ê時,不止阿gông愕koh艱苦知台灣話講著「猴」字,差不多無好話:猴囡仔(有人無口德,koh會加死字)、 m̄ 成猴、猴齊天,變猴báng/lāng、著猴che、猴性、老猴……….,因為按呢,感覺若親像teh侮辱ê款式。
後來,漸漸了解孫牧師娘是一個信心大大、疼心滿滿、做人直直、講話實實、祈禱切切、辦事熱熱、思維敏敏、行動緊緊、身軀勇勇、心神洋洋、恩賜濟濟、付出濟濟ê婦仁人,看她用生命疼台灣,這個「猴母」ê稱呼,反轉是真溫暖親切ê尊稱,莫怪濟濟人愛做「猴仔囝」,隨她四界傳福音。
孫牧師娘真愛彈手風琴,人無高,卻用大型ê樂器,看起來親像giâ枷,m̄ -koh彈起來雙手敏捷親像跳舞,姿勢優美,琴聲響亮,好聽無比。她一曲過一曲彈,阮一首過一首唱;她bē厭,阮Mā bē倦。無久,就一陣人圍倚來欲看a-tok-á表演。她為主拚命ê精神,實在hō͘人足感心。阮會曉將野外佈道kap野外主日學看做是重要ê事工,lóng是對她ê引導。感謝孫牧師娘,hō͘阮ê青年時期過了真有意義koh喜樂,留下真美好ê回憶。
孫牧師娘bat講:「無人叫我著做hiah-nih濟工,tio̍h hiah-nih無閒;我若無做, Mā無人會講話。是上帝ê疼,hō͘我tio̍h疼ê人真濟,tio̍h做ê代誌也有夠濟……..。」Chiah-ê話的確有影響bē少人,歡喜跟隨她來為主做聖工。
永遠懷念她──孫理蓮宣教師。

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述