傳道胡肇基小傳

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

林緝熙(林世傳)撰 「胡肇基e5小傳」《台灣教會報》358卷,1915年1月 傳道胡古,儒名肇基,1849年生,1914年去世。 妻黃含是傳道黃深河次女,育二男八女,而長子胡再享續父志為牧師。請參見《教會史話》159 胡肇基傳道師  

傳道先生胡古,儒名肇基,本是台南廳曾文胡厝寮e5人,也是咱南部傳道e5老先生lah!出世ti7 1849年,對細漢e5時就失落父母,到10外歲e5時陣就hou7伊e5兄chhoa7伊落阿里港ka7人做長工,過無幾年kap李牧師(李庥,Rev. Hugh Richie) toa3,牧師省察伊信主好品行,就牽成伊當傳道e5職。
到25歲就娶傳道黃深河e5第2查某子名含來相幫贊,上帝也交帶伊培養8個查某子kap煞尾2個後生到成人,boe7 bat 1個無入學校讀冊。伊e5大子(胡再享)現時ti7福音書院讀冊,細子ti7醫館學醫生。當伊做傳道頭尾倚40外年,歷過真濟任所,boe7 bat聽著伊kap會內會外e5不和,hou7掌教務e5先生煩惱。無扑算ti7 1908 年先生娘(黃含)ti7鳳山過身。Hit時欠幫贊e5人,自然加添家事e5分心,又兼伊一生為主e5著磨,栽培子兒e5刻己。為chiah e5因端身軀暫lam2。
Hit時陣伊hiah- e5查某子請伊去稟停工,beh備辦hou7伊有thang開用,四界thit tho5養老e5機會,所以就寫批稟教士會。教士會就回批講甘願伊停工,不過伊對少年盡忠到老,議論歡喜每月8 箍hou7伊開用,出在伊ai3 to2位行徙,m7 ai3 koh派工pe2-pak8伊。對hit tiap8無在任,行東去西。雖然an2-ne,伊iau2-ku2常常toa3淡薄冊去到逐位be7煞佈道,有時歇ti7拜堂。有時ti7會友e5家,有時ti7查某子e5所在。無講空手去四界thit-tho5歇睏,伊e5子一下問伊:「你thai3 beh an2-ne?本向望你停睏hou7身体較輕鬆。」伊就應講:「食君祿,忠君事。」對an2-ne有時歷路受風霜,嘴礁欠滾水,枵餓欠物食。
到親友e5所在,na7 m7是順便,m7敢ka7人討,致身体愈lam2,到ti7 1914年10 月間,就重病ti7伊e5第4子婿劉良e5所在;be7 koh出門。伊幾若個查某子去看伊,看著伊消瘦無力到an2-ni就傷心流目屎,求伊著用冊還冊房;hit tiap8才允好。過10 數日身体有小可較輕鬆,就參詳盡人事,起來台南就近醫生,看會得著伊e5眾子e5 向望。
後來到醫館無tu2好所在,就去tiam3醫館後伊e5兄嫂再源姆e5厝,也續受伊利便照顧伊;ti7艱苦e5時,iau2-ku2提幾本冊nai7出去彌陀寺口講道hou7人聽,ti7 boe7過往e5 4日前也nai7去ti7中會nih出力來講起教會e5 要務;ti7 1日前iau2 ku2提冊出去彌陀寺口坐beh講道理,無甚mih機會就轉來,到hit暝,就連連叫伊e5兄嫂兩、三擺討嘴礁;天tu2 tu2光,就平安hou7主叫伊轉去,享壽66歲;正正親像雅各講,若頭尾一樣心,就得著基督所賞賜lah!
到隔日下晡4點鐘就埋葬ti7公塚,送葬e5人西國教士,大、中兩間學e5先生kap學生以及台南會友,kap伊e5親戚子兒孫倚200外人。想這個老先生ti7出外e5所在,有hiah濟人看顧著伊;真正是對伊平生盡忠,hou7人欽仰e5緣故lah!
鄙人ti7 10外年間kap伊來往,也成年久kap伊tiam3,看伊e5行動舉止 in,有幾項不止奇怪;因為細漢到老無入學校受先生e5栽培,iau2 ku2歷年傳道考,無落第,甚至到50外歲e5時,也koh hou7大會考進名,ti7 hit章程內有漢文論kap新舊約e5字音解說,伊也會thang及第。伊家內e5人就講,你hiah老lah,kiam2 iau2有人ai3請你;伊就講我m7是欣慕人請,不過是看欠進名e5,thang hou7教會請; chiah- e5 少年koh博學e5又lun2-neh m7去考,我刁工去考hou7想看我這 pan7人都去考lah,kiam2 chhai2 thang激動in e5心志來出頭,就教會免欠進名-e5。這是僕所奇怪。
又伊雖然當傳道e5職,iau2-ku2 ti7伊toa3 e5教會以及大學e5補助、慈善會、別所在起拜堂逐款e5好事,雖然m7是濟,iau2-ku2常看著伊e5 ian5項,也be7曉想咱都是傳道 e5較好推。Koh伊是當傳道無領賣冊e5責承,mih sai2著定定揹冊出外加開錢,又甚至老衰lam2都應該歇睏,也m7是有lah,iau2-ku2艱苦跑走到力盡才煞。
又伊一生當職,受教士派遣,無ai3 kap教士計較;當伊老mou7 e5時,1擺派伊去埔里社著盤山過嶺,又子兒1陣,家內e5人問講:「你雖然 m7 ai3違逆in,ma7 thang kap in參詳,請in ka7你換這較近平洋e5所在。」伊講:「M7 thang-,in是替上帝辦理教務,咱趁in所命令,就那準趁上帝e5命令neh。」
鄙人率直kiah8筆來寫chiah e5,不過是hou7平生,親愛chit e5老先生e5朋友,以及列位先生,koh 1擺聽著伊淡薄e5事由na7-tiaN7;其中若有不入耳空-e5,總向望原諒。  

 

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述