盧萬得撰 「故林朝乾長老小傳」 《台灣教會公報》 983號 1966年6月1日 p.15-1 白話字譯為漢羅台語。

按：林朝乾醫師(1901-1966)，嘉義人，唸長老教中學，再進總督府醫學校(1922年畢業)，曾在大舅子陳宗惠之後，任彰化基督教醫院第二任台籍院長(1939-1941任院長)，嘉義東門教會長老。其妻陳全員是陳老英長老(1859-1938)三女。長子林慶秋曾利用陳老英宅開設「十全幼稚園」，嘉義東門教會長老。次子林慶中，國防醫學院畢業，在嘉義開「十全內外科」。三子林慶國，台灣大學醫學院畢業，在台北市開「十全小兒科」，台北第一教會長老。

故林朝乾長老是我(盧萬得)自囡仔時代朋友，相kap佇嘉義教會的主日學做學生，後來因為是同業的關係，常常有往來交陪的機會。因為伊頭腦才情真好，我常常受tioh8伊指導幫忙。

故林長老的令先尊是林守義翁，令堂李月女士。伊佇1901年5月23號出世做第二囝 ，嘉義的公學校（國民學校）畢業了，1915年tui3 嘉義有4人相kap 考入台南長老教中學(現在的長榮中學)。中間伊kap我也在內，伊的頭腦特別優秀，所以學業常常攏是排佇頭前。

隔轉年就koh 考入台北醫學專門學校。 這個醫專 thang講是當時聚集全台灣秀才的最高學府。伊佇醫專的時代，也熱心服事上帝，受人選做醫專青年會的會長，我本身後來也考入醫專，所以有機會常常受tioh8伊的指導kap幫忙。

到1922年醫專畢業了後，服務佇嘉義省立醫院，後來開業「十全醫院」。到1926年， chiah koh去到東京留學，佇日本醫專畢業，得遇著醫學士的學位。然後koh 轉來繼續開業十全醫院。做醫生的中間，因為伊的醫術精明，救人的生命濟(多)到boe7算得。

伊佇社會方面也gau5服務，貢獻不止濟，這 tiap8 列舉幾項:

日政時代佇醫師會擔當役員。光復後擔當彰化基督教醫院院長、當選嘉義縣醫師公會的理事長 kap理事、擔當本縣醫療合作社的理事、私立博愛救濟院的董事、嘉義盲人中心的董事。

佇教會方面有擔當嘉義東門長老教會長老，主日學校長等真久，也有當國際基甸會(「贈送聖經．領人歸主」的宗旨)嘉義分會的會長等。 對教會抑是事業服務貢獻真濟。

最後我ai3介紹這個實例證明朝乾先生自青年時，就有憐憫人，幫贊人的好德行。伊佇醫專時有的新生，入學了無偌久就退學，去郵便局食事務員的頭路。朝乾先生認-tioh8 這個學生，調查伊退學的原因，chiah知影就是因為家境song3-hiong，不得已chiah 退學去食頭路。 對 an2-ni，伊就kap兩，三個同學抽出家己的所費的一部分，每月幫贊這個學生 koh來讀冊得到畢業。以後照聽這個學生畢業後去南洋， 現時佇馬來西亞國真發展。

親像an2-ni，林朝乾先生是一位熱心服事上帝，做一個盡忠的基督徒，實行基督疼的精神的人