林照撰 《台灣教會公報》988號 1966年8月15日 p.14-15

按：蕭勤是田中蕭興祥長老的長女，1907年生，是彰化高等女學校第2屆畢業生。1926年3月31日和林照(傳道，後牧師，1904-1967)在丈八斗(原斗)結婚；隨即跟夫婿在鹿港、豐原、楠梓、馬公、台南神學院、台中柳原、澎湖宣道會、橋仔頭服事。1966年7月17日去世，享年60歲。

蕭勤女士是彰化縣田中央(田中) Tok-nai2潭 e5人。老父叫做蕭興祥，是早前田中央教會e5長老。蕭長老自細漢就真聰明，有去台北讀醫學校到中途，因為家庭關係轉來厝-nih 開運送店幫贊家庭。

蕭勤女士是伊e5長女， 自細漢就真乖 koh真聰明， 19 歲畢業彰化高等女學校，是這間學校第二屆e5畢業生。做學生e5時代就真熱心ti7教會e5工，得tioh8當時田中教會e5牧師盧賞e5 介紹，就tui3牧師娘學風琴到高女畢業了， 20歲就kap我本人結婚， hit時tu2好是1926年3月31號，所在是ti7我e5故鄉丈八斗(原斗) e5教會。

結婚了，蕭女士就kap我抱 tioh8大e5向望kap遠大e5 異象， ti7  4月3號去到鹿港e5 教會開始工作，來代替新婚 e5旅行。上帝果然有聽阮e5祈禱，教勢大振興，信徒直直增加。伊也有鼓勵我hou7我學業大進步， ti7 隔轉年3月教師考試就及格， 23 科 e5科目攏通過， thang受設立做牧師。伊本身對婦女e5工作以及兒童主日學， a2是信徒e5招呼， to非常出力。

Ti7一生e5中間，所帶過5所在kap所做e5工，是親像an2-ni:

1. Ti7鹿港教會。 Tui3 1929年3月到1929年， hou7教會ke真大興起。

2. Ti7豐原教會。 Tui3 1929年到1933年。a)出力向日本人傳道理，因為伊ê日本話真gau5講：所以常常舉辦日人 e5婦女工作。 b)熱心ti7傳道，尤其是文字傳道，每禮拜發散 198 份 e5《神の國新聞》攏是伊一手所做e5。

3. 楠梓教會。 Tui3 1933年到1951年， 19年久ti7楠梓當幼稚園e5保母，無領薪勞， koh 鬥開拓教會:就是(1) 煉油廠， (2) 橋仔頭e5兩所在。

4. 馬公教會。 Tīi7 chia kap全教會同心， koh得tioh8上帝e5同工， hou7全澎湖搖choah，所有e5廟宇 kap童乩， 法師，廟中領袖來歸主，為tioh8 an2-ni患tioh8 肝癌， tioh8受手術，佳哉全體信徒同心祈禱， kap廟中e5神明鬥法，果然得tio8h勝利。一方面接待外國e5「遠東歸主」， a2是「佩帶聖經會」台灣e5出名e5牧師同工，過去澎湖協助佈道。蕭女士有一手煮菜 e5天才， hou7 chiah-e5佈道培靈 e5人員增加力量。凡若到澎湖去鬥應援 e5人會thang大精進實力。伊ti7 馬公是眾神明所bat，所忌剋 e5，照所流傳，廟中e5火爐常常會發爐，講若發爐，就是beh掠蕭勤女士kap我本人。

5. Ti7台南神學院。 Tui3 1954到1956年， ti7 chia幫贊本欄訓練聖經師院e5學生，招呼幾偌家庭來信主，soa3 ka7 in 除偶像。 Koh有組織實地訓練工作e5人，得tioh8利益真濟，致到受彰輝牧師真大稱讚。

6. Ti7台中柳原教會。 Tui3 1956到1959年，也是非常出力，用傳道做奉事，用工作做快樂， 不但tui3 有識階級e5人是an2-ni， tui3環境khah bai2 e5人也是an2-ni 表同情，到ti7最後ti7台中做葬式， koh有表現伊e5腳跡是何等e5 suì。

7. 擔當澎湖宣道會e5工。 Tui3 1959年到1963年，為tioh8 芥菜子會，有(1) 開孤兒院收容10 外 e5孤兒，為in施行教化工作，後來引chhoa7孤兒kap母親來信主， koh特別關心ti7孤兒e5學業kap健康。 (2) Koh免費幫忙醫療傳道，每日to出門傳福音，受tioh8 孫雅各牧師娘疼主，疼台灣e5心所感激，益發出力體貼主e5心情來做工，遍行到澎湖e5逐 e5島嶼，去傳福音。

8. Ti7 橋仔頭教會。 Tui3 1963到1966年，伊做事逐擺 to用感謝感激e5心，雖然身體厭倦，精神卻不時快樂。

本(1966)年正月kap長執相kap出去探訪會友e5時，身軀發病， iau2-ku2繼續工作，致到肝病koh 再發。病中幾偌月日久，總是攏m7-bat發出一句怨言。5月27日，經過外國醫生e5手術，宣佈講是boe7好e5破病， iau2-ku2心神非常鎮靜，時常tui5心底感謝主過去e5恩惠， koh tui3來訪問e5人sui5-e5 sui5-e5 表感謝 kap祝福。5月31號頂晡 9點，主耶穌出現來招呼，就大聲叫講："主耶穌來lah，主耶穌來lah！"阮相kap跪落祈禱迎接耶穌，氣就斷。後來經過一段時間koh 還魂，到7月17號主日。 主就koh來迎接伊koh去。
過身了後，得tioh8台中柳原教會長執會用前官禮遇e5方式， 組織治喪委員會來替設法一切， koh得tioh8 橋仔頭kap楠梓等教會100 外人坐專車來到台中參加火葬。實在是光榮到極；後來chiah葬ti7大肚山e5示範公墓。

我本身現時e5處境是非常悲痛， ti7 chia親像ti7死蔭e5山谷，現時失去天頂一粒e5光星，人生是失落一個調節機，一個營養師，一個謀士，已經離別我去lah。雖然明白主耶穌親身有來接納伊去，總是40年久e5好同伴離別我去lah，怎樣boe7-thang傷心痛心。總是望上主賜我新e5力量， koh再奮起，負起主e5付託，來前進就是。