林俊育撰 《新使者雜誌》121期 2010年12月 p.58-61 （漢羅台語文）詳請讀PDF

林俊育說：現在是「網路的時代」，真歡喜來佮大家分享我的「公民記者佮網路福音」心路歷程。我佇 1972年投入台灣產品外銷的貿易，阮是台灣第二間使用「迷你電腦」的公司，電腦hō͘我的公司業務大發展。到1988年我佇雙連教會擔任服務委員會主委就開始盲人事工，使用電腦phah字寫「關懷視障」的文章投稿，也用電腦家己排版來出版「西羅亞通訊」，同時也推動教會週報的電腦化。「西羅亞合唱團」（團員攏是盲人）佇 1989年成立，我買一台錄影機來記錄，並製作錄影帶來將in 的見證廣傳。到數位錄影機上市，我就買一台來繼續錄影、製作DVD。2002年，蔡明峰先生就設立「台灣海外網」（ http://www.taiwanus.net ）。我學會曉「威力導演」（Power-Director）的製片軟體作業，就開始佇台灣海外網設口座來上網。台灣公共電視台的「PeoPo公民新聞平台」（ http://www.peopo.org ）佇 2007年開始營運，我也正式成做一位「公民記者」。在網路事工，2004年我佮信望愛網站合作成立「台語信望愛」（ http://taigi.fhl.net ），我也帶入現代科技的影音網路福音事工，將傳統的福音事工經過錄影製片上網。閣佇 2006成立「客語信望愛」（ http://hakka.fhl.net ），也佇 2007年成立「思羅安信望愛」（台語點字http://sloan.fhl.net ）。製作一片影音片，得上網台語信望愛、台灣海外網、公民新聞台（Peopo）kap Youtube等等免費影音平台，佇傳福音的功效來講是「一舉數得」koh「事半功倍」。能將傳統的傳福音方式用影音記錄落來，佇網路頂面延伸出去，「傳到天邊海角」去「hō͘萬民聽」，koh ē-tàng傳到萬世代，「何樂而不為」neh。詳請讀PDF