華語原著：曹永洋, 刊載於《台加月刊》Taiwanes CanadianMonthly 2016年台語翻譯：林俊育/Lîm Chùn-io̍k

序章

Ná親像大自然中其牠ê生物仝款，人是tùi孕育伊ê土地、空氣、陽光、教育形塑出來ê，kā chiah-ê抽離掉，伊就無koh完整à。

Chia咱beh來敘述有關林家ê故事，雖然一下看起來，這是一個家族，m̄-koh，林家ê運命kah台灣ê歷史以及chit塊咱生存ê土地，lóng有血肉相連ê密切關連，甚至ē-tàng kā它當做台灣一百年來運命ê縮影kah寫照。

Tī試探用文字來呈現林家ê故事chìn前，咱應該對家己出世tī chia、生長tī chia，時時刻刻lóng teh呼吸ê國家，有一個外形有khah明確ê認bat。

若是tùi三、四百年前荷蘭人佔領台灣算起，這將近四百年ê歷史，thang講是一段波濤（pho-tô）大湧、起伏不定ê歷史坎坷路。Tùi 1624年荷蘭人入侵台灣，tī台南建立殖民地開始，前後三十八年ê統治時間內，前十六年北台灣就án-ne由西班牙統治。

1662年，鄭成功ê部隊進入台灣，趕走荷蘭人，開啟鄭成功、鄭經、鄭克塽父kiáⁿ孫三代tī台灣為期22年ê統治，續落來是大約211年ê滿清統治年代。

1895年（光緒21年）4月17日，清廷因為清日戰爭失敗，李鴻章代表清廷kah日本簽落來出賣台灣ê賣身契「馬關條約」，就án-ne有長到半個世紀之久ê日本統治時代 。

二次大戰，全球絞（ká）入去彌天蓋地ê戰火中。後來，墨索里尼kah希特勒陸續節節敗退，終局全盤潰敗。一九四五年，美國試爆原子彈成功，日本首相東條英機猶原企圖做困獸之鬥。仝hit年，中、美、英三國聯合發表「波茨坦宣言」，極力促進日本無條件投降，日本當時對這並無任何回應。

仝hit年8月初6，美國第一粒原子彈投落去tī廣島。初9，第二粒投落去tī長崎，爆炸驚人ê殺傷力，全世界大tio̍h驚。日本帝國chit時已經走投無路à。8月15日，日本天皇裕仁向全世界廣播，宣布無條件投降。第二次世界大戰到chit時劃落休止符。台灣交由國民黨政府接管，並進入光復後ê戰後時代。

跟tòe大戰結束無久，大陸ê國共內戰卻熱滾滾teh展開，短短ê兩三年間，蔣介石ê軍隊兵敗ná山teh倒，kui個大陸全部淪陷，毛澤東tī大陸建立中華人民共和國，台灣以「中華民國」存在到今á日。

這to̍h是吳濁流先生用「亞細亞ê孤兒」當做冊名ê台灣一百年ê歷史坎坷路。 (繼續閱讀)