懷念敬疼ê周聯華牧師

林俊育撰 《台灣教會公報》 3366期 2016年8月29日～9月4日 p.11。周聯華牧師於2016年8月6日蒙主恩召。

慟聞敬疼ê周聯華牧師蒙主恩召，我感覺非常m̄甘！我kah周聯華牧師雖然無久長ê交往，m̄-koh kah伊短短ê一段時間做伙，伊ê工作精神kah真實基督徒ê態度影響我一世人。

回憶起來，kah周聯華牧師第一pái見面是tī 1980年。Hit當時，台灣聖經公會為「雅美蘭嶼」達悟族人出版一部「ㄅㄆㄇㄈ注音」ê新約摘譯單行本，由加拿大宣教師魏克琳女士獨立翻譯，雙連教會捐獻10萬kho͘ 做出版費用。Hit時我tú受選做執事，beh讀台語聖經非常困擾，開始走chhōe「人人讀有koh愛讀ê台語聖經」。我to̍h報名參加台灣聖經公會主辦ê「雅美蘭嶼族語聖經出版感恩禮拜」，開啟我第一pái ê蘭嶼之旅，tī hia tú-tio̍h台灣聖經公會ê眾董事，其中一位hō͘ 我到taⁿ iáu teh深深數（siàu）念ê，to̍h是人人敬疼ê周聯華牧師。

除了「聖經出版感恩禮拜」ê正事以外，主辦單位有安排「環島旅遊」。大家lóng歡歡喜喜出去chhit-thô，kan-taⁿ周牧師無去。環島旅遊ê中間，我聽tio̍h大家講起周牧師對基督教會ê貢獻，我有生出「敬佩」之心。旅遊tńg來食暗頓ê時，我去kah周牧師坐仝桌。食飯配話ê中間，我請教周牧師：「周牧師，我真敬佩你為基督教會做出hiah chē貢獻，請問你是án怎teh做？」伊笑笑á講：「人出去旅遊chhit-thô，我留tī房間做khang- khoè to̍h是án-ne nā-tiāⁿ。」

周牧師ê工作精神hō͘我敬佩，我mā tio̍h學伊「為主做工」ê精神。M̄-koh，ài chhit-thô ê我無法度效法伊「留tī 房間做khang-khoè」，我tio̍h án怎chiah好？Tiāⁿ-tiāⁿ為tio̍h chit項事自我譴責。感謝慈悲ê上帝憐憫我ê軟弱，特別引chhōa我kah信望愛網站合作架設台語信望愛網站（http://taigi.fhl.net）、客語信望愛網站（http://hakka.fhl.net）、思羅安（台語點字）網站（http://sloan.fhl.net）kah全民台語聖經網站（http://ctb.fhl.net），koh開發所有需要ê工具，thang透過網路作業來完成真chē「無可能ê任務」（Mission Impossibe）

周牧師koh有一項對基督徒ê信仰堅持影響我真大。Kā我洗禮ê賴俊明牧師bat kā我講過周牧師「驚上帝，m̄驚人」ê故事：周牧師tī蔣介石80歲生日ê感恩禮拜中傳講信息講：「四維（禮義廉恥）八德（忠孝仁愛信義和平），3歲小孩都知道，80老翁做不到！」

我是第一代ê基督徒，時常感覺tio̍h體制內有真chē「驚人，m̄ 驚上帝」ê人，m̄ 敢「誠心講真實話」，致使教會機構日日墮落、腐化，已經偏離聖經ê教示/上帝ê話jú來jú遠。

周聯華牧師，我感謝你真實基督徒ê作為對我ê啟蒙，mā ǹg望這會成做台灣基督徒ê啟示。願你soah你tī 世間美好ê工，ē-tàng放心tńg去你ê祖家，安息主