原斗陳周蚶長老小傳

謝福元記 「故陳周蚶長老的小傳」《台灣教會公報》854 號1960年2月 p.20-21及855號1960年3月 p.16-17 白話字改為漢羅台語文。

按：原斗教會周蚶是周乞食長老的長女，適陳玉，育4男4女；其長男陳敬乾在原斗教會當過長老(伊的長男陳義昭亦是長老)，次男陳昆，三男陳阿彬(伊的長男陳添設亦是長老)......。

故陳周蚶長老是原斗教會的長老。伊佇民國前27年2月4日出世佇埤頭，後來佮父母移轉來踮十三甲。1892年12月3日對宋忠堅牧師接洗禮。1901年5月12日，17歲對甘為霖牧師接納入教會，無久佮陳玉結婚。對伊的信仰佮gau5忍耐的精神，克服大難關，後來移轉來踮新結庄。佇 1935年10月27日，伊有紲接老父的腳步(老父周乞食長老是原斗教會建設者的一個，佇1935年9月30日別世。)受設立做原斗教會的執事，以後14年久盡職，到 1949年2月12日設立做長老到別世，11年久，上主賞賜伊健全的身體，共25年久做長執，暝日無lang3，常常佮牧師同工，是教會無袂用得重要的樑柱。可惜佇1959年11月14日暗佇土人厝庄新求道者顏財(Chai5)兄的家庭主持禮拜講道中腦充血，以後11日久不省人事，佇11月24日上午10點半才離開世間。伊有留4男，4女，共127名的內外孫，ka-na2孫；享壽75歲。全教會聽著伊的別世，攏流目屎傷心，袂睏得，捶胸講，taN失落一支大的天柱lah。佇11月26日下午2點，踮禮拜堂舉行盛大的告別式，有鎮公所，農會，學校，各機關人士留le7哀悼，參葬者有900外人，是原斗教會有史以來的盛況。也有伊囝佮孫接續做教會的長執teh活動。

TaN愛欲將伊的平生的好模樣排列，向望咱攏會綴伊的腳步來榮光主的聖名。

1. Gau5疼人。

1. 勤儉節省。對無半項來成家發展，伊的後裔攏比人較好過。用這款的精神來料理教會，予財政會得安定。

2. Gau5吞忍忍耐。對細漢就經過極困苦的生活，甚物苦著捌食著。真濟擺受人拍，侮辱，著忍受笑容，以德報怨。

3. 和平的人。毋捌佮厝邊親人相爭，冤家，反轉勸人著和好。

4. 溫柔謙遜。Gau5有孝序大人，敬重老人，聽少年，囡仔，常常買餅來分幼稚科的學生。

5.  Gau5做慈善的工作，若是聽著有甚物貧困的人，就暗中用物質，錢援助伊。

6. Gau5苦勸人。無分是對敵，抑是家己的，若聽著，看著家庭，會友的中間不和，不論是日暝，著去共in勸改。

7. Gau5疼傳教的人。牧師若厭倦，替伊做工，破病來探訪，替伊祈禱；提物，錢予伊，人搧動著放棄，伊毋聽，反轉愈愛協力來維持，

2. 疼上帝。

1. 熱心佇教會。不論是風雨不缺席禮拜日的禮拜，祈禱會，家庭禮拜，若有聚會攏會看著伊的出席。

2. 為上帝國奮鬥努力。捌有幾若擺受人侮辱，予人拍，也是喜樂笑容。

3. Gau5替人祈禱，安慰人。伊若有聽著甚物人破病艱苦，就隨時去替伊祈禱來安慰伊，不論是遠抑是近攏去。

4. Gau5招呼人。不論暝日也是叫人來禮拜信耶穌。忽然間有集會，伊就緊快去若看著某人無來禮拜，伊就去探訪，紲招伊著來禮拜。

5. 做工無倦。伊攏是掛慮教會的事，無teh掛慮伊本身，有時嘴齒疼，頭殼疼也是做上帝的工。伊無揀高貴的工，才欲做。不論是做主理講道理，抑是提援金攏無嫌，無推辭，看著禮拜堂的內外無清氣，伊就額掃帚來整頓，或是水溝也是清，甚至無人愛做的清便所，伊也去做。

3. 好的信仰。

不變的信心。伊的信仰始終一貫無變換，無浮漂，忠實佇主的教會。有人對感情就放棄教會，譭謗教會，講傳教者的歹話來妨害教會的大局。總是伊是保守伊所信的來擁護榮光教會。

留意佇囝孫的信仰問題。常常勉勵囝兒孫著熱心，有時寫批來勸勉。有時伊的囝孫teh失志，冷心，伊就勉勵著甘願為主奉獻，我老lah，恁著紲接我的工，親像我有紲接我的老父的工顧守上帝的聖會；伊逐擺若有聚會就是chhoa7遐的囝孫來赴聚會。

盡忠到死。有一擺伊的老父teh-beh死，佇床中大大掛慮教會的工甚物人欲紲接來做。伊好膽應講，阿爸ah！你毋免煩惱，我肯來做。果然伊照按呢來實行。為著信徒靈性圖謀in的得救，為著愛得著較揣的人來phoe命。為著新的求道者逐日熱心來做工。所以佇伊的做事，佇新求道者的家庭的說教中倒落去。Ah！伊雖然死了猶teh講話。到taN偌濟人teh數念伊的工作。伊是阮的保羅先生。願咱綴伊的腳步來行。請佇祈禱的中間相數念，求主的安慰佇伊的囝孫的頂面。以馬內利。