追念李庥牧師

 

頁Home /本土信徒 / 日人列傳 /宣教師 / 洋神父 / 原住民 / A / B / C / D / E / F / G /  H / I-J / K /  L /  M  / N-O / P-Q / R / S / /  V / W  

卓道生《台灣教會報》530卷,1929年5月

按:李庥牧師(Rev. Hugh Ritchie,1840-1879)是受英國長老教會宣道會派來駐台的首任牧師,1867年12月13日,偕夫人抵達打狗 (參見《教會史話》113 首任駐台牧師李庥),而卓道生(1858-1933年)是李庥(Rev. Huge Ritchie) 早期學生之一 請參見《教會史話》378 談打狗傳道養成班 及380 卓道生述大學之始


牧師姓李名庥,英國蘇格蘭人,1867年奉差來台灣做頭一回e5牧師。伊做人老成、欣慕道理,救人e5心切;chhoa7 家眷離開伊e5本鄉,冒險萬里e5大海洋,直到廈門學台灣話;後來續招黃嘉智先生(參見《教會史話》 111 醫館管家黃嘉智)過來台灣e5打狗,就是現時e5高雄e5旗後街;暫toa3前馬醫生醫病e5宿舍,tiam3 兩座做福音堂禮拜所;請洋行e5萬醫生(即Dr. Patrick Manson,參見《教會史話》229 熱帶醫學之父萬巴德 ) kap黃嘉智先生料理行醫e5事。買地起洋樓做企家,謀設南神學女學;請澎湖林兼金先生參見《教會史話》160 自澎湖來的讀書人)幫贊教學生做傳教e5人。

論起頭就是黃深河、胡古、雷金、黃根源、劉沃,陳仰華;較後-來就是林中桂也名華,吳蒙楚(吳葛),koh有在學學生劉茂清、黃秀輝(黃信期)、徐春枝、陳新代、林添興、李福添、劉阿雞7人。常常去訪問hiah e5來醫病e5病人,續替in 祈禱。出外佈傳福音,巡視會友,續toa3藥件;若有破病e5人就分hou7-伊,回家入門教學生,罕tit停歇。

記tit小生(我卓道生)11歲拔馬 (就是現時e5左鎮),初立禮拜所ti7敝家e5時,牧師kap牧師娘以及伊兩個細子,大e5名But8 e3-,第二子軟骨病約3歲,無偌久死ti7旗後;in kap雷金先生來探看,招小生kap伊去旗後讀冊,hit時細漢m7肯;才chhoa7我e5胞兄卓基清去讀。

後來聽著台東(就是古早號做後山),因為有左鎮,溝坪e5會友移徙去hia toa3 kap, in e5厝邊鄉里欣慕道理e5迫切,伊無嫌盤山peh嶺,冒險生番e5危險,chhoa7 胡古先生對枋寮e5三條稜,盤過去後山視察;續設立蟳廣澳、新開園(又名石牌) 石雨傘、里弄chiah e5教會所;合併高雄管內,直到琉球20外個教會攏是李牧家己建設,家己巡視照料;kek in移轉變更古今名目e5不同。

到台南西教士買新樓地建築新大樓工明白;西教士共同議決合併。Ti7 1876年6月,李牧師chhoa7家眷對旗後移徙來台南,tiam3 ti7新大樓宿舍;續移轉伊e5學生頂面所記7人,因為建築新學校ti7新樓boe7完工,暫toa3 ti7二老口舊醫館;kap台南學生潘銘新、卓道生、盧三元(伊是廈門人)、林大然、許朝陽、潘永安、潘金台、潘明珠、雷大闢計16人合併共學;校長巴克禮,英教授李庥、甘為霖、施大闢。舍監盧榮康(盧良)、漢文師貢生王世傑,攏是廈門人,這就是台南部合併建立神學校e5起頭。

對chia協同做工、或是出外巡視鼓勵會友,入門分課程,輪流教學生,逐家真熱心cheng2 phiau技能促進e5氣象。李,教舊約各本e5要理,及地理天文,續用大望遠鏡hou7學生窺看土、木星、月seh8 teh行e5形狀。甘,分解新約每本各情形,及耶穌事蹟權能,譬如loe7 li2-。詩,說明創世記12 根源,20相對反,併地質學、物理。巴,教授出埃及會慕,羅馬1-8章,算術,保羅傳、書記、寫真,各行星軌道teh行e5款,與諸雜錄論文。

小生常kap業師李牧出外巡視教會,或有茶餅供食同伴,到所在入厝關門祈禱,聲出激動聽e5人e5感念,後--來才出來kap人交陪講話;這算是伊平常e5例。

看見有窮苦散hiong e5病人,就暗靜提出財物藥品送伊;禁戒伊m7 thang hou7人知。盤山peh嶺攏是步行;雖是甚然艱苦,boe7 bat坐轎,聽見伊e5平時也攏是an2 ni- e5款,因為古早e5時無有自轉、自動、輕鐵、火車chiah e5 koh; 道路狹細彎khiau、崎嶇;常看見伊腳指頭膨濟濟pha7,也是忍耐、慷慨進行;若大厭sian7 khian3天倒he7草埔,boe7 bat看見伊有貧憚憂苦e5面容;bat看見穿破衫褲伊也無嫌,kap作穡人食焦蕃藷簽飯,配菜頭chang2 干、破籽;伊也掠做真甜,真正有快樂道理救人無厭sian7,m7是簞瓢路項顏回hit 輩所會kap伊比-tit ah!

看伊teh款待學生,無各樣慈心e5老父teh款待子,有時tu2著hit號無理e5歹聲嗽teh 應答,boe bat7看伊有露出面容e5歹看;靜樣- thi5-su 勸誘,真正是所講博聞約禮e5好先生ah!

早小生16歲初登台,宣講ti7台南e5亭仔腳禮拜堂e5時,因為台座是枋做,siuN懸ko隘細,家己坐ti7椅頂,抱企倚伊e5胸前,真正親像子有愛顧e5表象。

後來因為教會南北街廳廣闊,教會e5代誌紛繁,出外巡視走盡北、趕落南;對東到西,過頭著磨,致冒熱症;回家療治,雖是有安彼得醫生(Dr. Peter Anderson)藥品早暗照應治療,罔見缺效;無滿週間。上主煞伊著磨e5艱苦。奉召安然歸天,享壽44歲。過世ti7新大樓右邊e5宿舍。

害-ah! Gau5疼人e5先生、好e5牧師-ah-!An choaN2- hiah緊無去-leh? Be7禁tit流目屎傷悲-ah!Hit 暝施牧師親做棺木,續收入身屍;隔日學生24人kap hiah -e5 牧師,攏送棺到安平聽候小貨船,相kap載到打狗,入港e5時7點外鐘,埋葬ti7現時高雄驛頭e5西爿邊山腳,kap伊e5子同穴。

小生筆記大略,hou7列位看伊e5努力奉事教會, phoe命擴張教會,盡忠到死,ai3顧教會,真正做好牧者e5好模範,咱這輩著追jip伊ka-chiah後e5腳步ah!所欽敬向望--e5。

追-eng7詩歌

冒險汪洋萬里重,

拋鄉離國倒台陽-,

宣傳救道欣然落,

跋嶺駕山不冠容--,

集募生徒設學宮,

人才增廣福音充,

諄諄善誘慈懷德,

- 貧人薄 - ,

Klam 巡會鄉,

傷身毒熱受ji5 chiong-,

興年四四蒙天召,

共子埋軀高驛宮。

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述