宋忠堅牧師娘伊利莎白過往

「宋牧師娘」《台南府城教會報》191卷 1901年2月 p.9-10

1901年新曆正月17號，宋先生娘佇台南城新樓過往。

宋先生娘姓 Christie，名伊利莎白；出世佇蘇格蘭該內斯城。伊踮佇祖家有讀冊，學醫生，進名，親像其餘hia-的醫生；若beh蹛hit- pêng行醫卻會堪得。總是因為已經配宋牧師(宋忠堅，Rev. Duncan Ferguson) 定著，所以tio̍h toè伊過來台灣。到1892 年踮佇香港合婚，後來到台南城。

Hit-tia̍p學台灣話就快進德，無偌久就出草地去揣姐妹，有時chham宋先生做伙去，有時家己蹛佇拜堂。Hit時伊所做的工，行醫，分藥，救人的性命，阮佇遮毋免講：恁眾人已經攏知。

後來濟濟人議論應該著設一間女醫館予先生娘hoāⁿ是較好；伊也甘願擔當，祖家的公會也准。 這間卻設猶未成，因為所在覓猶未好勢。總是對按呢無予醫館工程縛-teh，就較有閒通四界去予人請到in-的厝。所以城內外的人濟濟捌伊，是人常常來teh請伊。

佇 11月間伊佮伊三个囝去木柵，hit時牧師袂得佮伊去。佇遐染著病，chiàⁿ 閣倒轉來。伊的身體漸漸lám，因為物食袂tiâu腹，常常愛吐，hit時倒落床，無閣peh--起來。有請安醫生(安彼得醫生，Dr. Peter Anderson）來看，又閣請日本的醫生築山先生(築山揆一醫師)來參詳。大家用逐項好法度來著磨，總是無法醫。 佇拜四e-hng六點鐘氣斷，離開世間。

後來兄弟姐妹知消息，聽了真gông-ngia̍h 的款式，大家真憂悶煩惱，走來覓伊，看了袂禁得傷心流目屎；也有濟濟人歡喜送花環，花籃，綵，軸，hit號的物。

拜六下晡兩點鐘出山。佇樓頂也佇中學禮拜，彼時劉牧師也佇teh。後來出葬到北門外的公塚，有真濟人送；從中也有教會外的人koāⁿ物來送葬，表明感恩的 心。因為城內外的百姓濟濟捌伊，所以有人議論著ûn街予眾人知，親像佮人相辭的款式；宋牧師也准。對街路過，旁邊的人攏知影是甚乜代誌，實在通煩惱，因為 無通閣得著先生娘的好款待。到墓埔佇遐閣再禮拜，chiàⁿ倒去。

先生娘的歲壽34歲。 伊的父母猶佇-teh。卻無姐妹，有三个小弟，攏是學習醫法，兩个已經做醫生，一个猶過teh讀冊。

人 拄著這號代誌永愛問啥事著按呢。因為伊猶過少年，也罕得破病，逐人teh向望伊通蹛佇咱的中間濟濟年，大大利益艱苦人。總是這號代誌咱袂得通測度；上帝所做咱這tia̍p毋知，後來會知。較要緊是逐人著受勉勵，日時做咱的父的工，暝到就無甚乜通做。紲苦勸咱的姐妹著學伊的模樣，照in所ē 來盡本份。雖然袂得通逐人親像伊讀冊，捌醫道，毋過咱若照上帝所予咱的才調去服事，就到末日通予伊呵咾講：好矣(ah)，奴僕忠厚矣，通入你的主的快樂。