表揚宋忠堅牧師娘伊利莎白

宋伊利莎醫生(Dr. Elizabeth Christie Ferguson)

 

頁Home /本土信徒 / 日人列傳 /宣教師 / 洋神父 / 原住民 / A / B / C / D / E / F / G /  H / I-J / K /  L /  M  / N-O / P-Q / R / S / /  V / W  

[劉俊臣等撰] 「宋牧師娘的小傳」《台灣府城教會報》192卷1901年3月 p.19-20

宋伊利莎白醫生(Dr. Elizabeth Christie Ferguson)是宋忠堅牧師(Rev. Duncan Ferguson)的元配,1864年4月3日生,1892年2月19日到臺,1901年1月17日在臺去世。


基督女徒以利莎白,就是牧師宋忠堅的賢內助。當主後1864年4月初3出世佇英國蘇格蘭的該內斯城。伊所得著的性質不止伶俐,拄仔5歲就學業;有歷過小,中,大這3間學校;到19歲伊所學習的就成就。見若歷年考試,出榜攏是排佇懸(高)的等級。

後來就紲入醫院講究醫學,佇遐攏共講究5年久,醫術也有不止精光。到beh卒業的時男女做伙考試,赴考的共有80人,總是考了伊做頭名。Hit時拄仔24歲。 Siāng 彼年伊有過來台灣,出力學台灣的腔口;到過年台灣話就不止gau5講gau5聽,人情世事也嶄然知影。為著體貼上帝好生的恩德致到真無閒,施格外的恩典致到真遠的人也得著。彼時伊teh打揲(治療)人的病疼攏無嫌著磨;將藥發予人,也無收人的錢。論到這算是平常的事。總是佇這款去共人拾囡仔的代誌閣較顯出伊的疼痛,就是無論三更半暝,á是凊彩時陣見叫見行;對按呢致到常常無睏,常常袂記得食。這是伊用盡忠服事主,克己待人有到親像按呢。

佇1897年就倒去in祖家,佇遐停睏兩年久。連鞭就閣來台灣猶原戴月moa星四界去拯救人。按呢攏共7, 8年久救活幾na7萬人。

論到破病危險得著伊拯救的講oh得了;taⁿ 毋免詳細記;kan-ta將舊年受打揲(治療)的人額來算伊,一年的中間計共5160人。對按呢來推其餘的就通知lah。

可惜上帝有命令beh召伊倒去,所以不幸佇舊年12月初拄著破病,攏共破病40外日久,到佇今年正月17日(舊曆12月27日)就過身。享受34歲。

唉(HaiN7) -ah!慘ah! 這个人來死去,無論婦仁人囡仔逐个都捌伊,所以一下聽見伊死,濟濟流目屎。總是現時靈魂已經倒去天堂。雖然有人未捌見伊的面,毋過伊的功勞有著現 佇台南的所在,甚乜人的無數念伊的恩德leh? 今(TaN)無甚乜通報答伊,kan-ta將伊的代誌寫淡薄來予人記念無袂記得,就是。

論宋牧師娘過身的事實在真大可惜,也是咱台南的薄福。這pang為著這層事,阮濟濟人teh參詳咱台南的教會受著伊的利益真大,應該著來共伊徛石碑,通紀念伊的仁德。總是這的代誌毋na7阮府城的兄弟歡喜按呢做,各教會的兄弟姐妹的確也相同有這个意思;所以致意通知列位,通相kap同心出力,khioh零聚總來做成。要緊咱著知beh徛這个石碑,卻毋是用隨便的石;的確是著買外國的,chiah e7看得,上少也著幾na7百銀chiah好。所以請各教會的兄弟姐妹若有人愛贊成這層事,著將恁所歡喜出的濟少交代一兩人通轉寄來府城。著開一張單看計共收偌濟銀,也是偌濟人出的,毋免的確著記逐人的名,kan-ta記有偌濟人出就好。後來阮beh予恁知某堂會出偌濟,計共收偌濟。也請恁將恁所出的就緊寄來交府城的執事,存養堂吳道源收;伊甘願料理這一層的數項。

紲致意請安眾兄弟姐妹;願新年得著主大恩賜。

發起人:牧師,劉俊臣;長老,林燕臣;傳道,汪培英,;兄弟,顏振聲;執事,吳道源 同啟 


對先生娘過身的了後宋牧師有接著濟濟位的兄弟姊妹寫批來共伊體貼安慰。伊現今無閒通回批予恁逐人收。總是伊接著恁的批心真歡喜;今愛ka7恁大家說多謝。

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述