|
傳道許朝陽小傳 |
|
首頁/ English / Japanese Entries/ 本土信徒 / 史話 / 諸家論述 / 宣教師 / 外國神父修女 / 原住民 / 日人列傳 / 賴永祥著作/ 馬偕周邊 / PCT/ 劉家雜錄 |
|
許朝陽,1855-1907。請參見《教會史話》143 及383 許朝陽傳道師小傳 下文原載於《台南教會報》271號 1907年6月,p.78。從白話字改為漢羅台文,略附按語。 許先生朝陽ê小傳 許先生朝陽是屬ti7嘉義縣e5官埔,ti7嘉義城得著道理。 Hit-時ti7-hia少少來禮拜,ti7台南城e5北旁漢人e5中間只有ti7嘉義設禮拜堂,別位攏無;也攏無漢人入聖教。 然後伊來toa3 ti7府城,1876年12月31日受洗禮入教。Hit時抵抵20歲,無loa7久續去傳道理。Ti7 1884惟有停工3 年久,後來入大學讀兩年冊,才koh去當傳道。照伊講,第二擺出去傳道理伊嶄然較知道理,本然是出力勸人m7-thang拜佛,著拜上帝,著反悔改變,望上帝接納。後來較知影恩典e5道理,常常勸人著反悔罪,靠救主耶穌,tui3 an2-ni得著赦罪成聖e5福氣。 先生有toa3 ti7劉厝庄(1889年3月受派)、拔馬(1890年5月受派)、嘉義(1891年12月受派)傳道理;tui3嘉義來麻豆街(1893年年11月受派)。Hit時ti7麻豆少少人受洗禮。伊ti7 hia e5時,人額勻勻仔加添,計共有8人入教。 伊toa3 ti7 hia較無兩年久才抵著攪擾,hit時日本來phah台灣,人e5心真 phaiN2,生起僥疑e5意思,嫌咱e5兄弟teh通日本,放tiau beh掠先生去thai5;伊聽知就閃避去toa3 ti7內山兄弟 e5厝;人出賞價beh掠伊,佳哉掠無著。可惜後來街裡e5人,無因無端,忽然間起,掠著十goa7個趁道理e5 兄弟姊妹,真殘忍ka7 in7 thai5死。Tui3 hit-時幾若年久無人ti7-hia聚集禮拜。 Hit時(1895年12月)許先生去toa3 ti7拔馬傳道理;ti7 1896年hou7兄弟揀伊做長老。 到後來地方較安靜e5時,人koh聚集ti7麻豆禮拜,許先生koh去toa3 ti7-hia。Hit-時禮拜堂kap小厝攏拆phaiN2去;就起三間傳道e5厝,ti7頭前搭一個涼亭,會容允得chiaN5百人入去坐。 Tui3 hit-tiap8人額直直加添,先生不止著磨佈道,也下昏時去人家禮拜。就議定著另外設一間ti7蕭壟街,兩位攏有百goa7人teh聚集。 又koh一所在,就是西埔內( Sai-pou-lai7)有幾若十人逐禮拜ti7-hia聚集。 Ti7舊年e5中間,麻豆e5兄弟出氣力te5銀,beh起禮拜堂,祖家e5公會也siau3念in所經過e5試煉就歡喜贊;大家同心起一間禮拜堂,達一千四百khou;ti7今年3月9號才開設,hit-時伊e5心真歡喜。 到今年許先生e5身體較 lam2,有來府城toa3醫館幾若禮拜久才轉去麻豆。 總是na2久na2 lam2,ti7 8月14號(舊曆7月6號) ti7-hia過往。伊當傳道e5職二十goa7年久;ti7幾若位著磨利益教會。 伊有娶府城張銘司e5查某囝,生13個囝,從中7個猶 ti7-teh。大e5查某囝(名恩瑟)嫁hou7傳道先生卓偉臣(1905年2月9日結婚,消息見於《台南府城教會報》240號,1905年3月, p.32),現今toa3 ti7嘉義。
首頁Home/ 本土信徒總檔 / 教會史話總檔 / 宣教師人物總檔 / 外國神父修女列傳 / 日人列傳總檔 / 原住民信徒 / 諸家論述
|