學宋尚節博士的模樣

柯設偕撰 「宋尚節博士」 《台灣教會公報》611號 1936年2月 p.23-24 [白話字原文，改為漢羅台文]

宋尚節博士預訂欲來台灣，也成月日久的中間佇本島南、北部界內幾若位的大所在，傳報主的福音。向望這擺宋博士佇南、北部逐位（所在），會奮興已經信主的兄弟姊妹閣較熱心，也會引導(chhoa7)濟濟猶未信的人決心來信主。

���宋博士為主的工作，大家穩當已經有聽見，抑是有讀著，所以不止知影。

佇遮愛寫淡薄，予逐家做參考。

卻佇1933年3月的《教會報》，偕先生（偕叡廉）也已經有寫1篇「����學證書hiat落海」大家也已經讀了。宋博士是去美國留學，得著學士、博士的學位，也自有得著幾張���書。地位、錢財、名聲便便teh等伊，設使伊若欣慕遮的，就隨時會得著。總是伊有受主的召，為主傳福音，做主的干證。所以伊對美國欲轉去（返）中國的時，伊有將伊所得著的證書hiat落海，為愛專心佇傳福音的工，驚了遐的證書若猶提--leh，會阻擋伊。

宋博士這款的模樣，不止予咱通學。就是伊看傳報主的福音做第一，也將世間的學問、智識、地位、錢財看著無要緊。

咱記得保羅有講：「若是平素做我的利益的，我為著基督已經看伊做損害。呣若按呢，我真正看萬事做損害，因為我掠識我的主基督耶穌做第一好。我為著伊曾損失一切，也看做糞埽(pùn-sò)，是愛得著基督；來長長踮佇伊，毋是有家己的義出佇律法的，就是有對信基督的義，上帝為著信所賞賜的」---（腓 利 比 書 3:7-9）

宋尚節博士就是學保羅的模樣，放拺世間的地位、智識、學問遮的，專心為著主十字架的福音teh出力宣傳。無論是外國的宣教師，抑是本地的傳教師，以及為主做工佇濟濟方面，猶原也是按呢。

怹為著主的福音，無掠俗世間的學問、智識、地位、金錢做要緊，是一味專心為著主十字架的福音，甘願艱苦、出力工作。

毋是遐的人別方面無路通去，抑是無別項職業通做，才teh傳福音。毋是按呢！

是怹遐的人看主十字架的福音做第一要緊，才放拺其餘遐的。

咱既然做基督的學生，著看十字架福音做第一要緊，其餘的是做補助的路用若定。

毋是講學問、智識、地位、金錢、資格、證書遮的攏無路用，毋是按呢，遮的猶原不止做咱的路用。若有，無嫌；不過咱毋通過頭為著遮的來致意，煞來做咱的阻擋，抑是對按呢來受迷惑。

咱著會曉得gau利用遮的來做咱為著工作的補助的路用。若是按呢就咱的工作會真有意義，也真有價值。

撿彩外教的人，是愛誇口有甚物智識、地位、錢財抑是愛品資格、人物、勢頭。

總是咱基督徒就毋是按呢，十字架以外咱無欲誇口甚物。毋是咱無通品甚物別項，毋是按呢。咱若欲品，嘛是有通品。是咱著看主十字架的福音做第一。

佇這個年頭的好時期，也當大家teh歡喜迎接宋尚節博士的時期，向望咱大家學伊好模樣，相佮出力為主做工，予南北的教會發展，是所向望。