《台灣教會公報》915號 1963年8月 p.10 [原文是白話字]

按：宋泉龍長老是宋水琴長老和吳進治的三男，1923年11月5日出世佇台南，1963年7月17日去世；妻高惠珍(高德章次女)，夫婦育1��1女，即長女宋淑薰、長男宋秩宗。

佇 (1963年) 7月18號，佇安平教會有開台南中會的教員講習會。會中有一个真正嚴肅感動人的節目，就是佇17日忽然殉職過世的宋泉龍長老的講演辭。 題目是「主日學管理法，」原稿共欲到4000字，差不多逐句寫。因為宋長老兼南門主日學校長，對工作認真勤勉，受聘所備辦的講演，確實有夠額通啟發人。當日將伊備辦的講演稿讀予人聽，閣較予人感動，也相信「伊雖罔死猶過teh講話。」

今這个宋長老不幸佇7月17號，佇伊所主持的中國化學製藥公司台南營業所，因為業務上的事受部下誤解佮怨恨，紲用凶器共伊刺傷致死；消息一下傳出，予 親疏，遠近的人無毋為伊大毋甘哀惜。宋長老是本社 (台灣教會公報社) 前工場主任宋水琴先生的第3公子，鍾茂成牧師是伊的姊夫，高昭龍牧師是伊的妹婿，兄是宋泉璋長老，小弟宋泉盛牧師現時佇美國研究中，本身是本社高德章先生娘的第2囝婿。

伊做人溫純閣慷慨。對事不止有才能，而且對人有基督徒的好模樣。讀長榮中學煞，到今無論食頭路，無論做事業，都有真優秀的表現。佇中國化學公司台南營業所經理任中的業務成績特別優秀，有將營業所的月收約20萬提高到平均180萬，而且有捌到430萬箍（圓）。

對教會捌做台南南門教會青年團契會長，執事，長老，主日學校長，也當南中P. K. U. 會計佮長榮中學的董事，基甸會的理事等。所有擔當的工，毋捌一項無收成著好的成績。

今當年輕力壯41歲，猶過上主事先煞伊世間的工。著傷到死的2點外鐘久的中間，也吩咐毋通去報案，意思是無愛追究，愛赦免，因為看兇手所做的事出佇毋捌，閣連聲只有叫主啊，主啊，紲交代看顧細囝，就離開世間。遺族是(高)惠珍女士佮大漢女子 (宋淑薰，1953年1月7日生)11歲，細漢男子（宋秩宗 1957年6月4日生）7歲。

過身了才發見著無論公私，數項逐項都清清楚楚。P. K. U.的會計講赤字50幾箍，老爸講咱著提去共獻，毋通予 P. K. U. 開無夠；無拍算故人佇在生已經將紅字家己先整錢完清楚啦。

 (7月) 22號，佇南門教會告別式，參加的人欲到500人。逐人都為伊的死來流毋甘的目屎，也為伊所留的好模樣來感動。