宋泉龍長老(1923-1963)五年忌

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

鄭兒玉撰 「故宋泉龍長老五年忌」 《台灣教會公報》 1033號 1968年7月1日 p. 17。

宋泉龍, 1923年11月5日生,1963年7月17日去世;遺下妻高惠珍、女宋淑薰、男宋秩宗。


宋泉龍先生佇主後1963年7月17日受忽然的災害來過身,已經滿5年啦。回顧當時的情形,猶過予咱的心會酸,到今猶過感覺毋甘。伊雖罔已經去世5年久,伊的做人,信仰佮工作值得咱數念,所以筆者才舉筆來寫幾句,不但予咱通追念若定,也對伊的人生予咱看會得通得著濟少的勉勵佮教示仔袂。

我這霎將伊生涯的經過寫佇遮,佇一項的中間來看出伊的做人。以及伊對教會佮社會的貢獻。

泉龍佇主後1923年(民國12年,大正12年)11月5日出世佇台南做宋水琴佮吳進治女士的第4查埔囝。伊的爸母得主照顧,到今猶康健。嬰仔3月日的時,佇台南東門教會對楊世註牧師受洗禮。4歲的時入東門教會主日學幼稚科。佇6歲的時,受敬虔的令堂的教示,就已經會曉得讀白話字的聖經,聖詩。8歲入台南師範學校附屬公學校,同時也入主日學聖經科。這是罕有的代誌,因為普通的囡仔著佇5,6年級才進入聖經科。

佇1936年(民國25年,昭和11年)入長榮中學。佇遮泉龍佮筆者(鄭兒玉)做2年久的同學。當時是伊班級中做第一細漢的。戰後有一擺佇火車內拄著伊的時,比我較大漢,予我不止昂愕。伊在學中的性質佮伊去世當時相款是溫柔的。

佇1941年(民國30年,昭和16年)3月畢業長榮中學,後來同學大家對伊才得著連絡。阮的班級同學會是伊發起的。伊過身了後,紲失去中心人物,5年久才只有開兩擺若定。這也是因為欲數念伊的期日的時開的。畢業長榮中學彼年的8月3日,佇東門教會予盧賞牧師接納就聖餐。

中學畢業隔年,伊就職佇台南市白米商組合佮台南糧食營團台南支所 4年久。佇1947年(民國36年)1月起到1956年1月,共9年久就職佇總爺糖廠,主辦採購業務。因為對業務誠實,得廠長的信任。佇廠中主持基督徒的聚會。這會通講是今仔日工業事工的開路先鋒。對這個聚會有10外人,後來佇台南南門教會領洗禮。佇宋先生在中,廠長(張開?)的信仰大復興,後來廠長榮轉去龍巖糖廠的時,佇廠內設禮拜堂,這是現在的嘉義中會龍巖教會。

佇總爺糖廠勤務中的時,佇主後1950年9月22日佇台南南門教會佮高德章夫人(林錄璁)的第二千金高惠珍小姐結婚。真會體貼伊的婦人人,家庭圓滿是人人所欣羨的。民國42年(1953年)1月7日查某囝淑薰出世,今年咧欲進入高中。民國46年(1957年)6月4日伊的查埔囝秩宗出世,現在佇附屬國校讀6年。感謝主予伊的兩的細囝有漸漸咧大漢閣得人疼。惠珍夫人到現在猶繼續伊的丈夫就職佇中國化學。

佇1956年(民國45年)1月30日就任中國化學製藥公司樹林工廠總務課長,這是伊佇中國化學服務的開始。佇這中間伊為彼個公司建立種種制度,閣主辦採購,共公司儉真濟錢。一年後的2月7日,榮升來台南營業所做經理,在任約6年半。佇這中間為中國化學佇南部建立醫藥界的信譽,事業大進步,抑興建公司的4層大樓。

主後1957年3月31日就任台南南門教會執事,後來紲接做建築會計,T.K.C.會長,主日學校長等職。佇這中間筆者也捌去幫贊伊的主日學。佇 1960年3月13日受按手做長老。

佇伊家己的南門教會以外,伊參加建立基甸會台南分會,後來受選做理事,中國分會理監事等職。其他伊也受請做台南痲瘋病救濟協會董事,母校長榮中學董事等要職。按呢予咱通知伊佇教會佮社會兩方面的貢獻怎樣的闊。

伊佇咧經營中國化學台南營業所的時,佇公司裡每週一擺舉行禮拜,不但以身作則,做光做鹽,也幫贊伊的同事來就近主。伊這款的經營方式予台南營業所做一個家族的款式。

伊雖罔這款,無論佇社會抑是教會來做光做鹽,行今仔日的教會工業事工的先鋒,可惜,猶過受伊一位工友的誤會,佇主後1963年7月17日14點15分受擦傷。因為刀傷深,閣著部位,佇16點50分叫一句「主啊」做煞尾,連邊就斷氣。

佇伊的墓牌裡有刻講,「爭戰好的爭戰,盡跑走的路站,守所信的道理」。實在有10分表示伊的信仰,做人佮事業。願主照顧伊的遺族。

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述