林俊育撰 《台灣教會公報》 3422期 2017年 9月25 日-10月1日 p.2p

邱善雄牧師， 1936年11月21日生，2016年10月8日去世 。

時間過了真緊，敬疼ê邱善雄牧師蒙主恩召已經一週年。Chit-má我iáu感覺非常m̄甘！邱善雄牧師是我ê客語老師，mā是我ê信仰導師kah好朋友。

回憶起來，2005年我受聘去中山醫學大學台語系教「台語電腦」課，邱牧師to̍h tī hia teh教「客語」，我把握chit-ê好機會tùi伊學習客語。伊ê客語課是早起時8：00開始，伊lóng前一暗去tòa彰化基督教病院ê來賓宿舍。因為伊是tùi彰基ê院牧退休，所以伊mā替我安排前一暝去tòa彰基ê來賓宿舍，隔工早起to̍h做伙坐火車ê區間車去tī台中市大慶路ê中山醫學大學上課。

邱牧師是hō͘-ló人，tùi客語白話字開發者方廣生牧師學習客語羅馬字，就án-ne成做台灣siōng優秀ê客語老師。伊為台灣基督長老教會總會編著《台灣客家話基本教材》來利益客語教學，我有kā它改編做影音片，掛tī客語信望愛網站http://hakka.fhl.net，方便大家上網使用。我mā有kā邱牧師tī中山醫學大學ê客語教學實況錄影製片，mā是掛tī客語信望愛網站。Chit-má kā它開來看，有無限ê懷念kah感念邱牧師ê用心教學。

邱牧師支持koh幫助我架設客語信望愛網站，hit時伊ê目睭漸漸變bái，m̄-koh伊有推薦中山醫大台語系第一屆ê幾位優等生來協助，其中siōng優秀ê劉敏貞小姐tī伊ê教導之下，後來就洗禮成做基督徒。為tio̍h beh充實客語信望愛網站ê內容，伊安排劉小姐kah我去拜訪李喬大師，請伊同意阮kā伊ê大作—《寒夜》、《荒村》、《孤燈》翻寫做「漢羅版」來上網，伊ê用心hō͘ 阮永遠bē bē記得。

根據我所知：邱牧師1936年11月21日生，1969年7月台南神學院畢業to̍h受差派做傳道師，1972年10月封牧。牧過太麻里、六龜、竹田、萬巒、公館（竹中）、銅鑼，擔任過彰化基督教病院院牧、新竹中會議長、台灣基督長老教會總會客家宣教中心主任、台灣《客語聖經—現代台灣客語譯本》翻譯小組委員、台灣神學院kah中山醫學大學台語系ê客語老師、台灣羅馬字協會理事等等。

全民台語聖經協會開始招「共同發起人」ê時，邱牧師一聲to̍h答應，每pái開會lóng有來參加，tī成立大會ê時mā受選做「理事」，phah拚推廣《全民台語聖經》。阮有一個共同ê夢：ǹg望有一工ē-tàng出版《全民客語聖經》，真可惜tī伊有生之年無法度實現。

2015年11月全民台語聖經《新舊約全書》出版了後，我去探訪tòa tī馬偕病院竹圍分院附近ê邱牧師，順續送伊一本《新舊約全書》漢羅版，伊收tio̍h hit本聖經非常歡喜。Hit時伊ê身體非常bái，m̄-koh我講beh去探訪hit時tòa tī馬偕竹圍分院養護病房ê駱維仁博士，伊mā帶病kah我做伙去。「病人」探訪「病人」ê情景，hō͘ 我深深感受tio̍h tī上帝ê面前，人雖然軟弱iáu會互相關心，互相疼惜，我深深受感動。

邱牧師，我感謝你對我ê疼惜kah信仰ê教導，願你soah你tī世間美好ê工，ē-tàng放心tńg去你ê祖家，安息主懷！ （作者為台語聖經工作者）