前馬偕紀念病院院長夏禮文夫人(Mrs. C. H. Hollemen),佇(1966年) 3月初 5 下午 5點10 分蒙主恩召,享壽74歲。聽著這個消息的人,大家真m̄甘。
夏夫人佇1892年9月10日出世佇美國 Overisel 的所在。伊佇1918年6月佮夏禮文醫生結婚,第二年就做宣教師來中國做醫療傳道的工作,頭尾 32年久。 夏醫生bat佇廈門, 龍巖,鼓浪嶼的救世病院擔任院長的職務。 夏夫人也真熱心幫贊病人解決困難的問題,也報傳基督的福音hōu in,每禮拜日伊攏幫贊傳教者主持禮拜佮 Y. W. C. A. 的工。當大陸淪陷了, in有轉去美國。到1957年, 院長夫婦受北部台灣基督長老教會的聘請,來到台灣做病院的工。 In盡最大的努力,將馬偕紀念病院逐方面整頓到真好勢, 夏夫人真gâu安慰病人, gâu傳福音, koh負責護士學校的英語教學,也主持查經班,直到1960年chiah退休。
In 回國以後,猶原真關心病院的進展,以及醫生,護士,職員靈性的進步, in真疼惜相連絡。聽著這個消息, hōu阮病院全體的員工攏真艱苦心。
告別禮拜佇3月10日下午1點半,已經佇美國託盧(Todd)紀念禮拜堂舉行了,有牧師,朋友真濟參加。
馬偕紀念病院佇3月30日(拜3) 下午 3點,佇二樓的禮拜廳舉行追思禮拜,來紀念這位一生奉事主koh協助醫療傳道的夏院長夫人。阮本院有決定beh將各界 the̍h來的悼慰金做夏禮文夫人紀念病床基金, thang來做幫贊貧苦患者的路用。