張海水的小傳

 　

 首頁/  English / Japanese Entries/ 本土信徒 / 史話 / 諸家論述 / 宣教師 / 外國神父修女 / 原住民 / 日人列傳 / 賴永祥著作/  馬偕周邊 / PCT/  劉家雜錄

郭水龍撰 《台灣教會公報》557號 《芥菜子》67號 1931年8月 p.20

木柵教會的長老張海水是貧寒的家庭出身，細漢的時父母就過身，伊予人倩做看牛囝仔，較大漢就共張鴻(迺鴻)做長工，伊看張鴻長老的熱心受感，後來娶某建立新家庭，果然熱心佇教會，勤勉佇家庭，淡薄講較詳細。

  1. 伊對教會，熱心守禮拜，題捐(獻金)攏是愛做模樣，所行守道理，教會就揀伊做長老，伊閣較盡職，會友若有破病逐日去看伊，幫贊伊，踮遐鬥照顧，閣較無閒亦撥工去，行到伊的病好chiah煞。會友若有不和伊盡力勤和，有少年人去放蕩，伊去勸勉伊到家己流目屎；為著教會的事閣較無閒亦放工去做，若會友冷心，伊常常去引chhoa7，若會友做毋著行歹，伊真好膽責備嫌伊，若熱心的兄弟伊真疼伊，所以全教會尊敬親像老父。 伊雖然無學問，情理真捌，教會若有代誌攏去問伊，伊若講著怎樣行，攏順趁伊，tui3按呢教會真諧和，不論好事，歹事攏齊到，親像一個家庭。教會20外年無加添，這5，6年對伊有引chhoa7 3家來信；木柵無派傳道去，伊哭3擺講：「我無煩惱食，無煩惱穿，只煩惱教會無先生」。 伊真 gau5疼傳教師，不論甚麼傳道毋捌嫌伊的是非。 伊去赴中會，大會毋是戇戇聽，逐項真明；倒轉報告教會真清楚。 伊對教會外真好信用，伊是拍石師傅，若伊做一工，就有別人工半的額，無激行，無食薰(煙)，無歇睏，早做晏煞，逐人愛倩伊，著量早共定，若無，倩無；別人無穡作，伊teh作boe7了。

  2. 伊的治家勤儉，白手成家，日時作別人的穡，暝時作家己的穡，伊的骨力是非常，禮拜日以外無一時歇睏。 經營到今卻有成功，衣、食、住，無煩惱。伊的家庭gau5治家，教囝，攏有熱心順趁道理。

伊3年以來治肺病漸漸傷重，兩年久boe7行到拜堂，猶久伊的熱心無差，伊的心真滿足，講上帝予伊真夠額，伊的心真平安過日。(1931年) 7月3日，叫人來叫我去，我去看伊真傷重，著流行感冒變肺炎，氣喘boe7離，只有共我講伊boe7好啦，愛我著共伊送葬，知我近日欲去花蓮港，講若電報去，著愛緊轉來。 後來閣兩日下晡4點予主召伊轉去，7日葬式，會友逐的傷心流目屎，棺材落囥的時，有一個會友名(張)迺妙60外歲，嘴鬚長長，雙手按佇路邊的樹仔開聲大哭，伊的聲會鑽人的心，聽的人心酸流目屎。 唉呀！ 木柵教會失落一個棟樑，傷心啊！ 伊的遺族一個某，一個囝14歲，一個新婦仔10歲。 願知己諸友常替in祈禱。

　

 首頁Home/ 本土信徒總檔 / 教會史話總檔 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述