台中的陳闖伯

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

安貧生(郭朝成)記 「信仰美談 故陳闖伯」《台灣教會公報》671號 1941年2月 p.10-11 [原文是白話字]


陳闖(Chhoàng)伯生長佇南投街,體材懸大,性情烈,看著予人會驚,愛得著厚利的事業,佇壯年的時就入王祿派。[人若欲入王祿派,著咒誓孤、貧、夭:(孤)孤獨(無妻子),(貧) 散赤(無財產),(夭)短歲壽(短命)]。這3項著領(選)一項,暗號的用語是用高深的王祿白,王祿派以外無人會捌。事業分做兩種。

  1. 經商性質。販賣丹膏,丸散,假鞭,假茸,假參,錢若the̍h 會來就好,毋管人用了按怎。

  2. 恐嚇性質。畫符,念咒,chhāi-koā,一般的迷信者真驚伊。In若拄著siāng途事業的人,就用高深的王祿白來問,若袂曉應的,就知伊是無入王祿派,擔頭所有的物就共伊沒收。

闖伯毋捌字,袂曉畫符作法,是teh賣藥。卻是真厚利,m̄-kú所趁的錢,攏是對嫖,賭,飲,鴉片遐去。真正是年頭khòng-khòng算,到年尾 chhun一條錢貫。到倚老年的時,就有悔悟的心,知所做的事業有逆天。就搬徙去台中做工頭,後來開販鴨間,家庭生活較好去。

常常來吳興(吳兆祥)仙的醫館坐,興仔叔就講道理予伊聽告伊著反悔信主,罪會得著救。闖伯聽了道理真好,講無拜偶像是無問題,若無拜祖先決定袂用得,是犯著不孝的罪,按呢人何苦娶某生囝傳後嗣。若是來入到閣會用得拜祖先,我就欲來聽道理,若祖先著棄sak,我到死毋入教,毋愛到拜堂。

原來闖伯是真躁性,伊的長男陳生也躁性。一日父囝起冤家,闖伯歹喙(惡言)chhoh囝,陳生也大受氣chhoh老父。闖伯到這時就慘chheh啼哭,ná想目屎ná流,喙講了然了然。Ai-oh!我所希望的,是我若年老,我的祖先通得著我的囝共伊祭祀,世傳世,通得著萬代香煙。Taⁿ我猶佇teh,我的囝敢歹喙chhoh我,我若離開世間,thái通向望伊共我祭祀neh?

決心來去信耶穌教,予伊無公無嬤。就走到興仔叔的醫館內,興仙ah!我欲佮恁入教,禮拜日請你來招我,興仔叔講,你kiám毋驚無公無嬤 He毋驚noh。

對遮起逐禮拜到拜堂誠心敬拜上帝,戒鴉片薰,讀字母,無久聖經會曉讀,不時愛講道理人聽,性情大改變,本性是嚴父,紲變成慈父,前是躁性,後來變成溫柔。闖姆佮伊的囝兒,新婦做一時加入教會。全家團圓信主,實在上帝的召人真奇妙。先父(養父郭添)是闖伯的好朋友,一擺鄙人佮先父欲去(台中)完納錢糧,拄著禮拜日,就去闖伯in兜,拄著伊去�����拜轉來,就招阮著敬上帝。到大理設教會的時,阮全家族就加入佇教會。闖伯也來做臨時義務的傳道,我的羅馬字是對伊學的。伊的口才無好,m̄-kú熱心愛傳道理,袂曉詩調,(養心神詩) 59首攏用一个詩調teh吟,彼時也是好聽。阮的家族信主是對闖伯的引chhoā。闖伯做台中的執��久久,獻工,獻金,獻精神真濟,白河教會(陳)光輝牧師就是伊的孫(陳生之子)。感謝上帝,予伊盡忠的奴僕的後裔通接續伊的信仰。

 

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述