數念米真珠姑娘 Miss Margaret W. Beattie

吳瓅志姑娘記 《台灣教會公報》832號1958年4月 p. 12-13

本篇是吳瓅志姑娘（Miss J. W. Gault）佇(1955年)長榮女中70週年校慶舉行米姑娘記念圖書館獻館式的時講的。有米姑娘的功績，閣有吳姑娘好的評價，所記遮个相信欲利益大家真濟才著。

今仔日咱數念米真珠姑娘(Miss Margaret W. Beattie)，真有才能閣盡忠佇這間學校服務。

伊的爸母是英國長老教會著名的會員。伊的老爸是細菌學的教授；老母是一位佇基督教佮教育的工真活動的人。我這擺未離開英國以前有接著伊的老母米博士娘的批，叫我替伊共恁請安，也講伊今仔日的確欲數念咱。伊不時替這間學校祈禱，也用關心佮疼情teh看這間學校的 進步。

米姑娘佇阮英國一間siāng好的女學讀冊後來佇Girton 專科大學受教育，畢業劍橋大學的數學科，才閣研究教育學。佇英國女學高等學校做先生，然後獻身佇咱的教會做教育的宣教師。伊佇雪黎奧克(Selley Oak )的宣教師訓練學校( Carey Hall)準備做宣教師；就佇1933年來台灣。

我為著幾若項的因端(敢是因為學校的慈善市)soà 袂當去基隆迎接，也吳威廉牧師娘歡喜去等接伊。我有去到嘉義接伊，佮伊相佮坐火車來。會記得我頭一擺看著，伊是穿真chhiⁿ-chhioh媠媠的青衫，teh佮吳牧師娘講話。我行倚去，伊就舉目看我，真歡喜。

到台南伊就連鞭學台灣話，也佮眾職員以及學生熟似，愛知學校的狀況。我隨時知影伊是非常有智識的人。伊代先gâu忍耐到徹底明白事情，然後就用真明確的判斷來講出伊的意見。伊對佇學生真有趣味，忠實準備學課，也盡所會的來教。

1936年我倒去英國，彼時米姑娘佇東京 teh學日語；伊實在真gâu講日本話。我真歡喜，因為雖然我著離開女學，總是佳哉有一個比我較會，也比我較大路用的人通來學校接我的任，閣伊也已經成做我的好朋友。

米姑娘歇睏了，毋kú為著戰爭soà 袂得倒來台灣。伊佇英國代先佇一間高等學校教冊。然後受派做頭一个婦人宗教的教師，來照顧遐的佇軍隊工作的婦女。伊為著遐个婦人人來開設聖經班，也 chhoā in禮拜，予人真大尊敬。戰爭後伊盡所會緊倒來咱的女學。我1947年閣到遮的時，看著伊所做的工真感謝上帝。伊是一位有才能閣有良心的先生，非常賢明，真疼這間學校，做一位真重要的顧問。

伊真疼學生，也用全心疼耶穌基督。閣愛伊的學生猶原會得著知捌佮疼主的福氣。我所捌的人，我想只有米姑娘毋捌受人批評。伊是一位熱心親像聖徒有可愛的性格。

我無閣佮米姑娘見面到伊破病倒去英國才佇倫敦飛機場佮伊相見，也佮伊倒去in厝。彼霎以後，伊有時會寫批予我，常常寫關係這間女學佮伊的學生的代誌。雖然伊有病痛艱苦，iáu-kú伊有信靠上帝，心平安，死後通倒去上帝兜。

願主幫贊咱大家較gâu學伊的好模樣。