鄭兒玉講 「苦難中的恩典」 講於「恩典的足跡」感恩禮拜暨高李麗珍女士口述實錄新書分享會

 2010年12月10日長老教會總會事務所

道理三思ê方向

讀高俊明牧師娘李麗珍姊妹ê口述新書《恩典足跡》，看她一生最有意義ê時段，應該是對1979年12月高雄事件開始，在一連串ê大事件中，用信仰所面對ê經過這一段。人生是意義，不是享受。所以今仔日咱beh對這角度相合來三思：牧師娘ê生涯在苦難中之意義，kap在此中間這對夫婦由上帝所得著ê恩典。

接續美麗島事件後，今年2010湊抵坎(chhàu-tú-khám)不但是高俊明事件、亦是林家 血案30週年，再幾日仔過年亦是2011陳文成事件30週年。會得通講是台灣近代史上，二二八起義以來最第一悽慘ê一段時間。今仔日，就是紀念世界人權ê日，台灣基督長老教會總會來 主辦此個感恩禮拜是意義深沉。大家所知，當時受流亡到台灣ê國民黨政權所迫害之受難者，不只高牧師ê家庭。在此個禮拜現場，亦有不少當時ê政治受難者kap in ê家族，以及拚命走蹌解救ê人士。

30年啦，感謝主台灣無被人舞到沉落去太平洋，咱亦死無去。今下午聚集在此beh kap麗珍姊妹作伙三思主恩。此個感恩禮拜，我beh用這新書引起，請大家互相來分享：當時咱在此段苦難中，上主如何施恩給咱大家，使咱會得通克服來逃生。

福音ê二面性質

耶穌為要拯救世間人ê愛，所傳ê福音有二面性質。一面是用 「言ê傳道」；另外一面是用「行ê服務」。譬喻講，馬太5章的「山頂ê教示」kap約翰10章的「我就是好ê牧者」之信息，就是典型「用言 宣揚ê福音」。又出在路加10章之「好ê撒馬利亞人」之故事、kap設立「最後ê晚餐」(可14)、 以及「十字架」(太27)是以行為代表「用服務ê福音」。

「服務ê福音」之信息

主講「人子來不是要被人服務，反轉是要給人服務，甚至犧牲自己的生命 來贖回眾人。」(馬太20) 基督欲世間人 「接納祂ê愛」(約15)， 就是希望in在上帝kap眾人ê面前，公開以「言」作信仰祂ê告白。(太09,16)。然後耶穌要求in「實行福音」，講「我用新ê誡命給恁，就是恁著相愛；親像 我曾愛恁，恁亦著按呢相愛。恁若相愛，眾人將對án-ni知恁是我ê學生。」

服務「羊寮外ê羊」

若是基督再進一步講，「我猶有羊不是屬於此寮的；我的確著導in來，in亦將聽我的聲；又將成做一群，歸一個牧者。」（約10:16）這「羊寮外ê羊」就是咱此時teh beh三思ê道理之對象。

服務ê 內涵

耶穌要學生不但彼此相愛，亦要 照祂án-ni關懷猶未歸屬於主寮ê「羊寮外ê羊」。這群亦是主ê羊，是尚未認識耶穌是救主若定。基督講「我就是好ê牧者；好ê牧者為著羊服務放棄生命。」（約10:16）古今以來普天下無數ê書籍中，只有聖經見證：kan-ta上帝持有此種「聖愛agape」，就是無條件白白服務他人的 愛。

自從耶路撒冷ê原始教會起，福音傳到天邊海角，二千年來基督徒跟從耶穌，無條件白白服務別人到今。社會有一句常用ê俗語講，「天下無白食之午餐」，若在「基督信仰ê服務精神」前，此句俗語是不成立的。

不若kan-ta無條件白白服務若定，甚至無點數、無學分、koh無功德的，不但是甘願的、寧可是應該的。基督徒liahh這服務作歡喜、甚至感謝作上主所賜的。如此他宗教所求功德ê到達點，就是基督徒要服務他人ê出發點。

基督徒服務社會ê報酬？

若是按呢基督徒服務別人，豈攏無報酬？會記得30年前ê此個月，當時嘉文嫂清玉姊妹最高票當選「增額國大」。翌1981年春天她要開始社會服務站，在艋舺教會舉行開工感恩禮拜。彼時我斷言講：「社會服務ê報酬是十字架。」

到底耶穌服務人類ê結尾，十字架以外得著什麼報酬？高俊明牧師、kap二位姊妹、以及數位青年，為著收留一位被高壓政權追捕ê社運人士，入獄；而所受ê慘境，nā beh講，in是基督徒應該著備辦心面對十字架。總是當時猶未識耶穌的義雄兄、嘉文兄、以及文成教授，in為著爭取台灣人ê尊嚴，豈有teh期待任何報酬？無！照聖經ê教示(以斯拉1)，這是上主所起用ê「羊寮外ê羊」，作祂ê工具來啟示「赦免、包容、kap拯救」之聖愛(agape)。

苦難中的恩典

若是按呢或者(kiám-chhái)外界有人會講，「啥人敢信耶穌ah，啥人敢服務社會ah？」 是！主耶穌有品咧：「天裡ê飛鳥有巢，山裡ê狐狸有穴，若是人子無掛頭殼ê所在」(太8)，恁若好才來，這是被揀選者ê恩典。看啊！麗珍姊妹kap她ê丈夫俊明牧師，以及咱中間幾若人已經有接著這苦難中ê恩典lah。人生是意義，不是享受。其意義ê內涵是：無條件服務別人，甚至十字架ê報酬亦甘願接受。這是恩典，是在逆理中所得ê真理(Grace given in the paradoxical truth)。 主耶穌講：「人為著朋友放棄生命，愛無比此個較大的」(約15)。