懷念敬疼鄭兒玉牧師

Lîm Chùn-io̍k 林俊育撰 《台灣教會公報》 3277期 2014年12月15-21日 p.11。漢羅台語文。撰者為全民台語聖經發起人。

Tú收tio̍h台灣羅馬字協會第一屆理事長張復聚醫師ê e-mail，張醫師報咱知：「咱敬疼ê鄭兒玉牧師tī12月11日下晡4點55分蒙主恩召。」我kah所有台語白話字復興運動者仝款，感覺非常m̄甘！咱痛心失去咱白話字運動ê舵手！

我2002年參加台灣羅馬字協會to̍h知：創會會員lóng是鄭兒玉牧師tī台南神學院ê白話字班學員。Hit時，我參加協會主辦ê台語文化營已經是第8屆，成做鄭牧師ê追隨者有比別人khah慢，m̄-koh鄭牧師知影我有對白話字ê熱情kah使命感，不斷kā我指導、提攜。我就án-ne tī信望愛網站（http://fhl.net）ê支援之下，開設台語、客語、思羅安（盲用台語點字）信望愛網站，kā翻譯好勢ê《台日大辭典》上網了後，koh kā《巴克禮白話字聖經》kah《紅皮聖經》ê全羅版kah漢羅版上網。最近koh完成《全民台語聖經》全羅版、漢羅版、漢羅Ruby版ê上網tī全民台語聖經協會ê網站（http://ctb.fhl.net）。Chiah-ê khang-khòe lóng是tī鄭牧師ê鼓舞之下完成ê，咱tio̍h感謝o-ló鄭牧師！

我一直感覺，咱台語tī電腦時代需要有好ê輸入法chiah ē-tàng活落去。Tùi hotsys-haksys台語文系統、輕鬆輸入法、Kài輕鬆輸入法、也輕鬆輸入法，到信望愛台語客語輸入法ê過程中，lóng有鄭牧師ê陪伴。我每pái去台南，鄭牧師一定叫我去kā伊ê電腦安裝更新ê台語文輸入法，每pái伊lóng會hō͘我真chē需要改進ê寶貴意見。今á日咱有超強ê信望愛台語客語輸入法，tio̍h大大感謝鄭牧師ê投入kah指導。

一直kā我當做kah-ná家己ê kiáⁿ teh疼惜。我早期去台南lóng tòa王宗傑老師紹介ê「哥巴妻夫大飯店」，後來蔣為文教授hō͘ 我tòa in tau。蔣教授結婚了後，我kā鄭牧師講我以後m̄-thang koh去chak-chō蔣教授ê家庭，鄭牧師隨時講：「你若無棄嫌，來睏阮tau ê phòng椅。」這是我一生siōng感動ê時刻。

頂年tī「酒/守台語會」ê聚餐中，我kah台語文大師陳憲國先生有khah深入ê交陪。伊知影我回台期間lóng去租便宜ê學生宿舍tòa，伊講：「無chhái人ê錢，來tòa阮tau。」我感動kah隨時講好，因為我真需要伊chit款ê台語文大師來指導《全民台語聖經》ê台語文翻寫。今年11月初一beh去台南開全民台語聖經協會ê成立大會，伊叫我去tòa伊tī台南ê厝，就是鄭牧師ê隔壁間。

Taⁿ我真歡喜kah鄭牧師ē-tàng做厝邊，thang khah有機會來就近請教。我tī 11月11日kah蔣為文教授有beh邀請鄭牧師來聚餐，伊講伊無法度坐久，mā無法度食，阮就tī暗時7點半去伊ê府上探訪並請益。

Hit時，鄭牧師已經真衰弱，第一句話是「感謝lín兩人來看我」。續落來，伊真用力kā阮講起伊ê白話字奮鬥史，每句lóng打動我ê心。因為看伊身體bē堪得，我tī 8點kah伊告別。想bē到這是最後ê一面，m̄-koh，我有加強信心來續接鄭牧師ê腳步！願鄭牧師ē-tàng放心tńg去伊ê祖家！