真性情ê好牧者 鄭兒玉牧師kah 牧師娘

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

鄭素珍口述 王靜雯整理 「真性情ê好牧者」《台灣教會公報》 3285期 2015年2月9-15日 p.25。 有 圖像 鄭兒玉牧師夫婦 (1992牧師娘中風2冬後,在台南神學院 撮 吳仁瑟提供)

我結婚了後,tī 1975年來到台南市 ê 社區之家(現今長老教會台南中會新興教會 ê 前身)聚會。認識開拓聚會所 ê 鄭李春鈴牧師娘。感謝上帝,我會當 kap 這呢疼主 ê 牧者同工、學習,tī 真濟 ê 回憶中,攏是美好,值得感恩,快樂、趣味 ê 代誌。
牧師娘對待我親像查某囝,伊常常講伊沒生查某囝,我 kap 鄭兒玉牧師同姓,所以我是 in ê 查某囝,in 也真疼痛阮 ê 家庭。確實,阮不但 chia̍p-chia̍p 來往,感情嘛真親密,伊一路看少年 ê 我變做二個囡仔 ê 老母。1991年阮全家 beh 移民阿根廷,牧師娘非常 m̄-kam,講: 「妳 kā 我二個金孫帶走,我以後看無孫仔 beh 按怎 khah 好?」in 夫婦對待會友就親像家己 ê 親人,是真性情 ê 牧者心腸。
牧師娘注重禮節,若有人來拜訪伊, beh 接待人客 chìn 前,著 ài 點 chi̍t-sut-á ê 胭脂,抹薄薄 ê 粉,hō͘ 自己看起來氣色 bē-bái,穿衫也真端莊。有一擺,伊 o-ló 我 ê 洋裝好看,我就去買一領類似 ê,koh 加一條圍巾,送 hō͘ 伊。牧師看著,問講:「妳今仔日穿這洋裝 koh 真水喔!」牧師娘笑笑 ê 回:「高尚 koh bē 漏氣。」牧師問講:「妳哪有錢買?」「Kap 你同姓 ê 查某囝送 ê 啦!」阮攏笑 kah péng-péng 過去。
In 夫婦 ê 感情真好,但是不時著愛逗嘴鼓。牧師娘中風後,行動無方便, 有一日我去看伊,牧師真歡喜招呼我: 「素珍,來,咱來吃水果,好好 á 開講一 leh !」牧師娘故意講:「有人客來就故意表現體貼,tī 素珍面前免演戲啦, 家己 ê 囝。」牧師應講:「人我攏有抱妳起床啊!」牧師娘隨應講:「啊無是 beh 放我 tī 眠床 kō-kō-lìn 喔?」
後來牧師娘 beh 去屏東內埔 ê 養護院住,指定 ài 我陪伊做伙前往,離開台南 chìn 前,牧師對伊講:「Ài 注意喔!」牧師娘:「Kám 按呢 niâ?」伊將頭探出車窗,牧師 kā 伊親一下,伊才笑咪咪講:「按呢 khah 差不多!」後來阮陪牧師去內埔探牧師娘,tú 好是情人節,牧師挽二蕊花 kat tī 牧師娘 ê 耳仔邊,kā 伊親一下,牧師娘就真歡喜。In 私底下就是按呢,相敬疼,真恩愛。
牧師娘個性幽默、愛講笑,hō͘ kap 伊交陪 ê 人攏感覺真親切、無距離,一直到最後,伊攏無變。最後一擺,我 kap 新興教會 ê 兄姊去內埔看伊,彼日 tú 好遇著淹大水,車 hō͘ 水淹著,阮攏落來 sak 車。賢煌長老看著牧師娘 ê 時, 將 tâm 漉漉 ê 袖 ńg-á 捲起來,牧師娘看著,就問一句:「你 beh 相打喔?」阮在場 ê 人,攏笑 kah 東倒西歪。無 jōa 久,伊就過身了,這是伊對阮講 ê 最後一句話,足趣味,hō͘ 阮印象真深。
阮真尊敬鄭兒玉牧師,伊是一個敢講敢做,不斷付出,tī 任何方面攏真超越 ê 牧師。Tī 生活上,伊也真信任我 kap 先生 ê 協助。
有一日,牧師打電話 hō͘ 我,講伊 ê 厝邊好親像精神有問題,常常三更半暝攪擾伊,伊 beh 換所在,需要租厝,叫我去幫伊看,看好勢伊才 beh 租。所以伊看厝、搬厝 ê 拚掃我攏去幫忙。牧師嘛是主內 ê 肢體,會當為牧師做淡薄 ê 代誌,阮也感覺真榮幸。
有一年中秋節,牧師打電話來講身體無爽快,但是診所攏休睏 ah。阮趕緊去載伊,帶伊看醫生了後,beh 找所在 hō͘ 伊吃晚頓。伊就真堅決講:「幫我買一個壽司便當 tō 好,我講 án-ne 就 án-ne。」我知影,伊是體貼,無想 beh 麻煩阮 khah 濟。牧師個性真直,有啥物失錯伊就馬上糾正。有一擺 tī 我 ê 面前, 對秘書講:「妳 kap 人講話 ê 時,要 kap 人面對面講,m̄ 通尻脊對著人講話,這是無禮貌。」我 sûi 對少年 ê 秘書講: 「妳真正有福氣,tòe 著牧師,妳會當學習著真濟作人 ê 道理。」
真濟人講牧師脾氣無好,講話直, 大聲,但是伊 tī 我 ê 心內,真正是疼人、付出愛心 ê 牧者。我 ê 查某孫出世了後,tī 教會我抱孫仔 hō͘ 伊看,伊馬上講:「Hō͘ 阿祖抱一 leh !」了後,伊就真少打電話請我協助,伊講伊知影我 beh 顧孫,一定真無閒。
最後我去看牧師,伊講吃啥物攏無滋味,問我:「素珍,妳帶什麼來 hō͘ 我吃?」我講我買三項水果,伊看了真歡喜,馬上就吩咐幫忙 ê 姊妹削 hō͘ 伊享用,一面吃一面講:「這好,妳買這-ê, 我愛吃。」會當 hō͘ 年老 ê 牧師歡喜,我嘛感覺真安慰。
所以沒 jōa 久,知影伊過身 ê 消息, 我非常艱苦、m̄ kam。一路 tùi 入殮到樹葬,我攏陪伴。特別 tī 樹葬 ê 時我 koh khah 感動,怎樣有這 nih 可貴 ê 人?Tī 世上 oh tit 找著按呢 ê 人,到臨終,連家己 ê 身軀攏 beh 做最後 ê 利用,真正堪稱是世上 ê 光、鹽。
鄭兒玉牧師無浪費上帝賜 hō͘ 伊 ê 職, 伊一生為主 ê 福音努力奔走無停,疼惜台灣這塊土地,為台灣人做多多 ê 事, 伊是真特別 ê 人,我最敬重 ê 好牧者, 深深感謝伊,無限懷念。

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述