[高金聲撰] 「無講，無人知」 《台灣教會公報》 700號 1947年 4月 p.1-2 [白話字原文，改為漢羅台文]

欲講甚物？光復印書局的事業。

這間啥人設的？原本是巴克禮博士。伊家己會曉抾字，印冊，就買遮的印冊的器具種種來下佇新樓。差一人名沙仔（大樹腳人蘇沙）去廈門學印冊；以後得著一人孫耀雲來學習，對按呢起工印報紙（初名《台灣府城教會報》）。印冊的所在號名「聚珍堂」。到佇有一cham，幾若个報紙聯合做一个，這間才稱做「台灣教會公報社」。佇1941年4月，受日本人禁止，停刊，到1945年，11月2日，閣開辦，就改名「光復印書局」；對遮發刊的報紙，猶原名《台灣教會公報》。

現在是甚物人teh料理這間？是高金聲，個人。教會有偌濟資本助贊伊？無，常置委員會kan-ta講，將公報社印冊的家私佮厝，借某人（高金聲），來發行公報， 按呢若定。佇遮teh做工的人員有6名。宋水琴、林百萬、郭榮仁、鄭恩惠，會計兼販賣，高德章先生娘（林錄璁）；主筆高金聲。逐日營業的時間是8點。頂晡（上午）8點上工。 禮拜日歇睏。救主誕抑是過年正月猶原有停工。

論月給。做這款事業的人，佇台南市，師父每月工錢是2400箍，師仔1400箍。若是光復印書局的師父，現在才領1050；師仔領770箍。會計領1000箍。五人所領-的，總共4640箍。

領無外面人的一半錢。工錢無閣加添，定著袂用得。以外猶有種種的雜費。書局所收的，每月平均有5000箍。毋是無人買冊，是無冊通賣。愛印濟濟道理冊來供給台灣的教會，毋過水源細港，oh出水連鞭竭、連鞭礁。

頭一下著手，是一萬箍做資本，到這霎光復印書局的財產有16萬。看是大趁錢，實在是虛譀。前一萬實實是一萬，今16萬，lím- lím仔千六箍。按呢來比較我的本錢100箍開賰16箍，25箍消費21箍，猶賰4箍。錢直直無價，阮遮，一箍銀買無一條油食粿。光復印書局的危險佇目前啦！遮的人的月給，若照相當來算，逐月日，著發一萬銀予怹才著。總是本局所收，不共所出，今欲啥步？

教會公報的價錢，一年30箍，遐貴，按怎做工的人領少錢？舊年，人買報紙，一年3箍半，有趁抑無，毋免閣講，逐家明白。舊年人買報1850份，今年才有1300份。一份的報紙，紙錢著 2.25，12份是27箍。列位交30箍，恁想，有趁3箍。工錢無算，thài有通趁。準做趁3箍，就1300份，全年是趁3900箍，欲發做一月的工錢，都無夠。

按怎teh維持月月的所費？

1.對光復印書局，賣雜冊來添補。

2.遮的同著磨的朋友，甘願領少錢。

3.有志者寄付。佇舊年11月的報紙，有記朋友全年度送4525箍。舊年尾，上海的好朋友送8400箍，有攏分予怹做過年的慰勞。現在猶有朋友花花寄付。這慰安是好，猶��有根本的的治療。

現時開這間，是強強teh做，親像散鄉（貧）人，破衫破褲補補-leh。來遮身軀。欲閣整理好勢，著káng幾若十萬。到底這間咱看做甚物路用？艱難到按呢，門關起來，敢無較清心？欲講，這間的利益，話頭長，大略來講，是宣傳天國的文化，佇通台灣，無輸神學校，也無輸列位建設禮拜堂。對遮所賣出的冊，所發刊的報，若會予人心神平安，心轉向上帝，按呢阮就趁大錢。舊年11月的報紙第四面，有出芳苑教會的禮拜堂，予風颱扑倒，遐的會友無力通閣起。今佇台南黃春草兄，頂日寄付5000箍去助贊。伊講：「我生日毋愛做，做生日是虛華。欲將這條錢獻做教會的路用。」 我聽按呢，真歡喜。本局趁錢就是這。

早時拉撒路埋佇墓裡，耶穌徛佇墓前，kah人徙開墓石。人有徙，耶穌祈禱了，喝講：「拉撒路出來，」 死人就出來。手、跤、紮布，面包巾。主共怹講：「Tháu開予伊行 。」(約翰11:44)

猶太人的牧師，伊的查某囝死去。耶穌牽伊的手講：「查某囡仔，我命令你起來。」查某囡仔連鞭起來行。主吩咐著予查某囡仔食。(馬可 5：43)

今咱這个冊房，確實有死去，四年外工場荒廢。阮得著上帝幫贊，予伊閣活到這霎；拄著經濟困苦，親像頂面彼兩个人欠應援。甚物人有聽著主的聲講：「Tháu開予伊行」，閣講：「著予查某囡仔食。」有手的，著賰；有飯的，請捧來。主teh叫，著tháu，著予伊食。光復印書局是重要的佈教機關。請列位著來繼續辦理。已經活，予伊閣死去，敢無可憐代？