數念葉金木牧師娘

《台灣教會公報》 907期 1963年4月1日 p.11

葉金木牧師娘，生於1885年5月25日，歿於1963年3月20日，享壽79歲；

請參見《教會史話》580 葉金木是陳熊女婿一文。

葉金木牧師娘，名陳麵女士，今(1963)年3月20號頂晡11點5分ti7馬偕病院受揀召，來結束伊ti7世間折磨e5生涯，享壽79歲。葉金木牧師ti7咱e5教會做主e5工到今有63年，現在猶勇健，是台北東門教會現任e5牧師，是咱教界e5元老，也是咱教會e5寶貝。東門教會為著數念牧師娘對光復以來kap葉牧師相kap苦心建設in 的教會，伊e5貢獻真正濟，所以決定用教會葬來共葉牧師娘舉行告別禮拜。

這个式ti7 3月23日拜6下晡1點半準時開始，東門教會陳朝景長老做主禮人，星中議長鄭君芳牧師講道。徐春生牧師講故人e5履歷，會葬者約400人，不止盛況。告別式中有總會代表陳惠南牧師，傳總代表郭和烈牧師，北大代表鄭連德牧師，北中代表鄭錦榮牧師，星中代表莊丁昌牧師，以外幾仔位講悼詞，悼電也不止濟，共100外通，對全省逐所在來，頭到尾用真嚴肅e5心前做式 來數念葉牧師娘。真濟人流毋甘e5目屎來kap伊相離別。葉牧師也題一首詩掛佇式場e5中央講：「六十年患難與共我安不哭 巳五代兒孫滿堂卿應無憾」三點半結束這个葬式，遺體安葬ti7汐止公墓，hit日氣象局發表會落雨，若是對上帝特別e5安排，毋若無落雨，閣也真好天，感謝主。會中葉牧師談話講：「凡事有上帝e5好旨意，上主代先揀召伊e5 內助歸天，煞伊ti7世間逐款e5著磨，伊已經到ti7主e5胸前，所以雖然ti7哀傷e5中間，也有受大e5安慰。

葉牧師娘e5名葉陳麵，是水返腳(汐止)教會陳熊長老e5大千金，主後1885年5月25日出世，19歲e5時kap葉金木牧師結婚，追隨葉牧師去牧會，toa3 ti7暖暖，苗栗，基隆，汐止，大甲，基隆kap台北東門chia e5教會。In結婚60年久，上帝賞賜in三男，三女。大囝葉大闢長老ti7彰化做運送店e5經理，第二囝葉增睿先生ti7花蓮做生理，第三囝葉仁勇先生也ti7花蓮做生理。長女警醒女士配花蓮梁阿標長老，(伊捌做花蓮縣縣議會副議長，現時做花蓮區合會總經理)，次女安心女士配西螺連本通醫學博士(現時ti7西螺開業)，三女美麗女士配新竹李春生先生(捌做東亞電器廠廠長)，以外內外孫32个，曾孫7个，共遺族52个。

牧師娘一生敬虔閣熱心服事主，勤勤讀聖經，雖然ti7病中伊也是真致意愛讀，也常常祈禱，為著葉牧師，教會kap會友來祈禱，關心教會e5代誌，好款待會友，是一个不止模範e5牧師娘，gau5幫贊葉牧師，予葉牧師63年久e5傳教生涯有真好e5成就。伊咧治家教囝有方，1954年母親節e5時受台北市政府表彰做模範母親，伊做人真勤儉，樸素，夠額予咱通數念，也夠額通做咱e5模樣。

這幾年來，牧師娘有患著高血壓e5病，半年前閣起，ti7厝請幾仔位醫生來醫治，無甚mih8較好，兩禮拜前去馬偕病院入院，到3月20號頂晡11點受主揀召離開世間，倒轉去祖家，享壽79歲。