葉金木巡宜蘭佮花蓮港教會 (1914年11月)

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

葉金木撰「巡宜蘭佮花蓮港教會」《台灣教會報》358卷 1915年1月 p.5-6


這pang吳牧師(吳威廉)有招我佮伊去赴宜蘭傳道會佮視察遐所屬教會的狀況。我將所經過排列佇下底:-

(1914年) 11月9日起身對路到頂雙溪的禮拜堂歇暗,到天光就閣起身到宜蘭街禮拜堂。日暗有佮會友相佮聚集禮拜。教會佮世俗總算有100外人來聽道理。11日有去羅東赴傳道會。有9个傳道師來赴,有議論教會的事,閣有予教士會試驗。頭尾有3日久。有兩暗相續佈道,機會不止好。頭一暗有100外人來聽,逐人真注意。第二暗有分做兩隊,一隊佇拜堂,一隊去街內佈道,有200 左右人來聽。這兩暗的機會不止好。有聽見講對這暗來聽道理的人有的不止受感激,干證道理是真的,閣有一家保正本是teh食菜,聽了也呵咾道理是好,對彼霎了後有佮伊家內常常來問道理。

13日阮有去八哩沙,羅東傳道,徐春生有佮阮去。日暗吳牧師有佮徐傳道,王傳道去街裡佈道,有200左右人來聽道理,閣有人顯明講伊欲常常來拜堂聽道理。我佇拜堂佮教會聚集,紲共in試驗主日學。有17人來試驗,有50外人來禮拜。

14日有起身對蘇澳坐船。天光就到花蓮港,佇遮佮in聚集禮拜。頂晡有50外人,下晡有守聖餐,人額佮頂晡差不多。有5个少年人接受聖餐,這5个攏是梁長老(梁阿亮長老)的孫,這是罕得看見有按呢。這位的教會現時有3種族的人,就是福佬,客人,平埔。佇遮有15人來試驗主日學,較濟會讀聖經。

16日閣坐船倒轉來。吳牧師就倒轉去淡水,因為伊無機會通延遷,我有對蘇澳上山閣去視察猶未有去的禮拜堂,佮試驗主日學。17日就到羅東。徐傳道有佮我做陣行路到武淵,到位有去探遐的會友,紲招in來禮拜。彼下晡有30人來相佮禮拜,有14人試驗主日學。下晡有佮武淵的傳道做陣去利澤簡,這所在也是新設的教會,街裡有2家的會友nā-tiāⁿ,其餘攏是佇平埔社。暗時有30外人來聽道理;有十數的囡仔試驗主日學,chiah 的攏是世俗的囡仔較濟。

18日頂晡我有去革流巴奇立板。彼下晡有20人來禮拜,有9人試驗主日學。下晡有到番社頭;日暗有30人來禮拜,有17人試驗主日學。19日有 去打馬煙,日暗有30外人來禮拜,有10外人來試驗主日學。20日有到宜蘭街,彼暗有60外人來禮拜,有23人試驗主日學。21日有到羅東。彼下晡有佮傳道做陣去探掃笏的教會,有10外人來相佮禮拜,這塊現時無傳道;chiah 的教會去羅東禮拜。日暗佇羅東拜堂禮拜有30外人tiâu-tî愛來聽道理;chiah 的人攏是異邦人。這塊現時不止好機會,22日頂晡有到南方澳佮in相佮禮拜。有20外人來禮拜,有8人試驗主日學。暗時禮拜,人額佮頂晡差不多。23日頂 晡就搭火船倒轉來。

這pang所試驗的成績第一好是宜蘭街佮花蓮港,因為遐的是大人較濟。逐人有讀不止熟,會讀聖經,新約問答,真道問答。逐人攏會讀幾若項。論教會通 講是宜蘭街,花蓮港,八哩沙這三位較活動。佇平埔社的中間算是擺里較成教會的款。In佇逐家攏會捌聖經;論題緣in也真出力。我佇宜蘭街試驗主日學,大半是屬這社的教會。In現時無傳道,攏是來宜蘭街禮拜,因為離開宜蘭街無偌遠。

宜蘭的教會攏是平埔較濟,taⁿ佇逐社的人有漸漸失落道理。閣有時徙來徙去無定著。有人ná親像無宗教的款式,有人閣去服事偶像;逐社的人額也是真少,看了予人的心真艱苦,因為in早是親像以色列的人予上帝揀召,總是in無致意道理,致到拄著予���帝放拺。所在攏予漢人得著,人種也ná少。

總是有一項好���就是本然佇遐漢人真看輕平埔,看這个道理是in 的教。漢人毋願來聽道理;佳哉現時佇宜蘭街已經有20外个漢人得著道理,佇白石山跤也有幾若家愛得著道理,in有欲請��佇in中間設講義所。閣平埔有濟濟人ná捌道理,較熱心。這是對近來chiah 的傳������有較熱心盡忠teh做工的效果,親像盡力teh教主日學,聯合佈道,鼓舞會友守家庭的禮拜。我所寫��愛���看報的兄弟姊妹會大略知彼塊教會的消息, 紲致意請恁佇祈禱的中間會替in祈禱,���主的道理得著闊大,予主的奴僕佇遐會得著聖神的力,盡忠做上帝的工��利益教會。

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述