安貧生(郭朝成)記 「數念洪南執事」《台灣教會公報》678號1941年9月 p.15

按：洪南執事是草屯洪漏振長男，弟有洪用、洪茂德，洪金江 。 （參見草屯洪茂德長老, 洪茂德長老裔譜, 草屯洪金江長老略傳 ）

洪南執事生長佇草屯街的過溪仔。家族的傳統是耕農。伊細漢的時，有入書房讀漢文，後來也佮人研究看風水的術，就是耕農兼看風水。彼時草屯起初設教會，黃烏皮長老來做頭任的傳教者，伊是熱心的人，四界佈道。南仔叔一日去街裡，聽著烏皮長老teh講道理，受感動，自遮起，暗靜常常到拜堂禮拜，紲引chhoa7伊的老爸，三个小弟，以及伊的親戚幾若戶來敬拜上帝。伊的小弟，茂德，金江攏當長老。對伊引chhoa7的親族，現時大細有百外人，是草屯教會的信徒數四份一較加。

南仔叔所引chhoa7的親人濟濟攏入聖會了，若是伊猶teh延chhian5，毋敢進前受洗禮，就是伊的生活佮事業。伊是貧寒的農夫，共人格經(keh-ke)是真厚利。信道理，兼格經，邪佮正，袂鬥得，幾若年久心內不時起交戰。結局信心堅固，決心信耶穌，放拺羅經(lô-keⁿ),，揹聖經走天路。

記幾項來數念伊，撿彩會通做後輩的標準 也拘敢。

1. 伊是愛守禮拜的。伊的厝到拜堂著行50分鐘久，除起破病以外，無論風雨，伊都到拜堂守禮拜。

2. 伊是勤讀聖經的。伊是不時teh讀聖經。聖經也真熟，會用聖經的理，來推出世界的大勢。

3. 伊是盡職的執事。伊做執事倚20年久，伊所負擔的部，有盡伊所會來辨理。

4. 伊是溫純的。伊逐時有笑容的面色，一下看，就知伊的道行滿滿，對少年到老，毋捌用歹喙罵某囝，罕得佮人加話，凡事讓人。伊有四个後生，三个查某囝，現時猶是可取的信徒。內外孫一大群。

最後，伊帶腦衰弱的症頭，倒床成年久。伊是讀聖經祈禱，若揣伊坐，伊也顯出笑容的面色佮人談論，講伊逐項都備辦好勢，teh聽候主。到主的旨意成，就笑容離別憂慮的世間，享受74歲。福氣啊！