1948年12月29日，已經暗，忽然ti7樓腳有聲teh叫：「洪先生來坐。」「好ah， iau2有淡薄時間，我來去kap天和先生講一個話仔le3, kaN2 iau2未睏hoN3。」「Iau2未，請你起去， ti7樓頂頭到間。」 約有一分鐘久，就有慢慢e5腳步聲teh來。「天和先生！」「Ou3！洪先生，來坐。」「好，你bat聽著我e5履歷無？」「罕得聽著。」「我來講hou7你聽好無？」「好，請你講。」

我（洪金）15歲到21歲，患症頭，三日一倒， m7成人，細細漢，大腹肚桶，因為老父去ka7我看命，講是「死運，定著be7醫tit，加醫加了錢。」所以就攏m7 ka7我醫，只有放beh hou7死，我就一直拖命到21歲。阮是toa3 ti8和美賈堡（Ka2-po2）潭。Hit時厝邊潭叔患目珠病，招我講：「來去彰化hou7紅毛番仔醫，m7免錢。」我就toe3伊去領藥來食，藥水用麥仔酒矸te2,苦teh8-teh8,代先逐擺領藥都食無齊了，piaN3一寡hiat kak8；後來才知影法度，就攏食到了。去teh醫病hit時，潭叔bat ka7我講：「咱來kap伊入番仔教，伊就會較盡力ka7咱醫；若好，咱才mai3。」我ti7心底想講，A7好an2 ni hiau心；總是因為m7成人，有an2 ni teh想，也m7敢講出嘴。Hit時人iau2無啥敢去領藥，雖然m7免錢，一日也是二、三十人na7 tiaN7；因為講紅毛番仔會ka7人挖心肝kap挖目睭。

Ti7醫館聽著黃茂盛先生（現時ti7二水e5黃仁壽牧師e5老父）講，天地e5主若m7拜，就m7免拜。這句話刻tiau5 ti7我e5心，就決意信主。庄中無人信主，就家己一個逐禮拜恬恬偷來彰化禮拜。著行點外鐘e5路，中晝頓常常無食也無人知； m7 bat字，不過憨憨禮拜。

後來為著真愛讀羅馬字，想ai3 kap拜上帝人toa3； m7免錢無要緊，若會thang讀羅馬字就好。梁潛德，現時ti7東門梁秀德牧師的老父，就我引去kap in丈人，（梁秀德牧師e5外公，楊永治）toa3。頭家m7 na7教我羅馬字bat道理，koh講無錢be7用tit，就一月hou7我箍外銀。這ti7當時是真有錢。M7 na7 an2 ni，我去toa3 e5時，iau2真m7成人，頭家用真好hou7我食，尚且一日hou7我食5頓；我e5身体就一直大漢，也一直肥koh勇起來，拚勢做工也be7厭懶。人攏掠做奇怪。Toa3 hia5月日，羅馬字就攏會，頭家買聖經kap聖詩送我；我就kap伊相辭，就去台中、大里杙、溪心埔四界做粗工趁食。行到hia，趁食到hia。當時本鄉e5人非常gong5 ngiah8講，我一下入教身体變hiah勇，koh續行有路。Hit時本鄉e5人少人bat到台中。因為人若beh出門著poah8有筶才敢；若無就驚會沖著、煞著、犯著、土著，koh路中常常有搶劫e5危險。一般e5人實在是行無路，驚惶過日，真慘。總是我只有信主就無驚，真自由四界去，在ti7 hit時是一件奇事。也我到逐所在就愛講道理hou7人聽，無講擋be7 tiau5。

後來koh轉來彰化e5時，林學恭先生看著我有聖經kap聖詩，也會讀，就真歡喜；ka7我引kap蘭醫生toa3,發籤仔kap顧門。Hit時有蘭醫生e5學生高再得、吳希揚、劉振昌kap 加齡（顏振聲）先，以及醫館e5工人逐家做伙，逐日真心適。暗時我就招工人去附近e5田庄講道理。Koh有一個老進伯（許進傳長老），五日賣茶箍，六日講耶穌，七日守禮拜，我也常常kap伊出去到草屯、二水chiah e5田庄講道理。Iau2未有車，攏是步行。

也我ti7醫館e5工那做那慣勢，因為粗工只有我一人， m7 na7發籤仔kap顧門，也著管顧病室，設法病人e5入院，chan3藥間，藥局e5鎖匙也我teh交。醫館e5頭前管顧到後爿，天光做到e昏；我有老實，有勤 hou7人真信用。我兩擺對蘭醫生討ai3入大學（就是現在神學院）。頭擺蘭醫生tui3我e5 ka chiah phiaN tah tah講：「你toa3醫館真合用，平平是為主做工。」第2擺koh ka7伊討e5時，應我講：「我才ka7梅牧師講看。」兩擺攏無得著允准，因為我無學問，也無巧氣。

Toa3醫館5年後，蘭醫生轉去英國，我也辭。去大社，ti hia結婚，妻舅ka7我領一個行商牌hou7我去賣藥。好趁是好趁，m7 ku2心艱苦。因為當時e5賣藥仔gau5騙-人；leng5酸蘇打賣做英國e5大補藥，泡水一下滾，ka7人講：「你看，英國e5補藥，力真大…。」所以ti7當時賣藥仔無好名聲。我賣3年外，有一日tui3豐原行轉來彰化e5路中（當時無車），祈禱上帝ka7我換職業，真tu2好，來到彰化tu2著蘭醫生，叫我koh kap伊toa3。我講：「我已經有某子。」伊應講：「無要緊。」就kap伊toa3。Hit時33歲，有徐主恩，王金池、吳文良、黃振萬kap王慶隆做蘭醫生e5學生；其中徐主恩tauh tauh kap我出去講道理。3年後，看著太平境高金聲牧師出ti7《教會報》，beh募集「40日學」e5學生7名，心底家己想講無望。南部有百連間e5教會，才beh揀7名；我又無學問，koh家族5人leh。前某生一個就死，koh娶後e5。Ti7醫館3年久生3個，有5個頭嘴，thai3有法度thang讀甚mih學！王慶隆看著我，大聲問：「你是無讀著教會報lou3, beh koh toa3 chia到ti7時？」我應講：「有都有le3,今a7,iau2有法度？」

Hit時吳秋微也ti7 hia，伊是台北（醫學校）卒業e5,聽著就講：「你kiam2有ai3去？若ai2,我明仔日beh去台南ka7阮哥仔講。」伊hit時tu2才做秀圓（高秀圓，高長次女）定著若na7 tiaN7。我就應伊好。蘭醫生、醫生娘也歡喜。吳秋微來回答講好，我就去太平境講習40日，有高 lo3（身長）頭、洪朝抽、許振芳同學。後來就toa3教會——新市、阿里港、鹽埔、嘉義過溝（溝仔墘）、林杞埔、山豹、鹿麻產（又名為「鹿滿」，今屬竹崎鄉）、集集到水裡坑、竹山。

這中間有起3間拜堂；koh鹿麻產e5拜堂，tui3田庄設法移轉來街市。到今做信者16年，做傳道35年久。Koh 3日就72歲。上帝賜我勇健， iau2會四界走，現時一日行兩舖 iau2會堪tit。Tui3早到今，不過愛講道理；路中也講，ti7人家坐也講，只有講bi7 si7。無學問，黃酸tah meh e5人，今仔日會tit勇健做工，完全是上帝e5賞賜。若無拜上帝，十身也死lah！結婚前kap 蘭醫生平重百二斤，上重bat到148斤，現時iau2有130斤。

我是高金聲牧師e5學生，是「40日學」出來e5；這是我e5學歷。眾傳道中我排第1，第1無學問、第1愚憨。冊房若有發賣羅馬字e5冊，我就買，hia有e5,逐本我都有。不過暴擊以來就m7 bat koh買。信主50年間，m7 bat借一sian2（錢）五厘。無好額，也無欠缺；上帝hou7我夠額，也hou7我be7貪心。

「An2 ni好，請你歇睏，我著落去，約束e5時間7點半已經到。穆錫恩先生若來，就beh ti7下面做禮拜。」「真多謝，真好， hou7我續thang得著知早時信徒e5事情。石林（楊石林，楊天和之弟）這choa7過來有ti7 hia幫贊你e5工抑無？」「有ah。講兩擺」，「23坐飛機koh去lah，有閩南e5教會請伊聖誕節前轉去thang計劃明年e5工。」「Koh去廈門lah ou3?」「是lah，ti7鼓浪嶼。樓梯崎崎，請勻仔行。」「好。」

洪先生出去了後，筆者那想這個故事，愈想愈感激，不止有價值， teh想著寫伊。就有幾句話忽然tui3心底一直 chheng3起來，記ti7下面來做結尾。

一、  基督老精兵 始終一貫誠 至老無變心 洪金勝黃金

二、  篤志高牧師 育人傳報主 開學四十天 功效有顯然

三、  先代眾聖徒 六日講耶穌 道遠任又重 願咱再提唱

四、  全台歸主令 上帝己頒行 先烈在天靈 望咱快完成

感謝詞：天和ti7病床中聽見有濟濟屬主e5好朋友替我teh祈禱，koh有和美kap民族路，以及Liu2 teng 3個教會祈禱團，逐日將我e5事排列ti7天父面前；感激不盡。今已經有較好， ti7時會完全卻iau2未thang知，也iau2 m7 bat寫批請安朋友、親人；所以順這個好機會，佔用這個寶貴e5紙面，先對列位表敬意，深深說謝。願天父祝福列位，報賞列位e5疼心。Koh感謝公報編者先生ka7我登載e5。楊天和好意拜