洪龔夜合 : 我的牧師娘生活
 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

洪龔夜合撰 《台灣教會公報》925號 1964年1月1日 P.6-7、20


受主筆的託,叫我寫牧師娘生活:我在來是袂曉寫文,總是因為我受苦特別濟,得著主的恩典也特別大,所以毋敢隱囥,寫幾字來見證主恩.

1) 對世俗到信主。

我出世佇世俗家庭,老母對神明熱心是罕有的;食長齋幾若十年。佇囡仔時代常常予伊chhoa7去拜神像, 收驚;將替身loah8身軀,食爐丹佮符仔水。到讀小學的時,得著朋友招去教會赴主日學,得著吳秋微先生娘(高秀圓)真疼惜,印象真深。佇hit時我小心靈感覺老母所拜的是毋著,每擺迎媽祖的時舉掃手掃街路,舉香綴神明隨轎後,我看著hit號情形,不禁流傷心的目屎。

小學畢業後,就考入長老教女學,佇女學時代對劉主安先生的感化特別深,我決心一生beh跟綴主。所以佇女中四年就去東門教會問道理,若是為著我是世俗家庭,牧師毋肯接納,予我真傷心。 Siang7 hit年,佇太平境教會做主日學教員,參加逐款聚會,有一暗,陳思聰牧師叫我著去問道理。我歡喜到流目屎,果然佇hit擺領洗禮做主正式學生,是佇 1930年10月12日,hit-的感激一生無袂記得。

2) 結婚做傳教師娘.

1935年7月8日,是我結婚的日,做新娘4日,就去蹛台中教會做傳教師娘,到現在將近29年久,所歷過的教會是台中,鳳山,嘉義北榮.佇台中教會時代, 長執,會友真和睦,三年久佇真和平的中間經過。後來鳳山教會來聘請(1938年5月就任),hit時教會有問題,chiah感覺牧師娘飯碗oh捧,有小部份會友beh佮in相借問,烏目對白目, 知影in對長執有不滿; ka-chai3這號現象連鞭無去,變做真gau5疼傳教者的教會。感謝主,流目屎掖種子,的確有歡喜的收成!

3) 憲兵事件。

總是佇遮有一項事件發生予我的家庭拄著大打擊。佇1941年12月8日,日本空軍去偷襲珍珠灣,也正式對英美宣戰,hit tiap8了後,官廳對教會特別注意。In看基督教是西洋傳來的宗教,所以用真濟難堪的法度來壓迫教會,禮拜前著行國民儀禮, 向皇官遙拜。強制chhai3大麻,強迫拜神社等等。

1942年6月15日,有兩位日本牧師來鳳山教會講演,有請濟濟未信者來聽,經過三日後,憲兵佇教會的壁裡發見三字「愛英美」的字,就hip相起來。In 看事件重大,連鞭發動緊急的搜查,為著這件事,台北憲兵司令官佮全島主要都市的憲兵隊長攏���到現場鑑察,閣對各地方召13名的憲兵,密探鬥調查。

鳳山憲兵隊長講這件事已��報告到東條首相的所在,所以若無揣出寫的人,查明究竟,我做治安的首長kiam2-chhai2著引責自殺(切腹),因為佇台灣家己的領土內有這款叛逆者是袂容允得。牧師佮我是做中心人物���所受的威脅,壓迫真正大,牧師有時去憲兵隊遐,到暗時11點chiah轉來,我佇厝裡也著應付紮��拜堂的憲兵。

不論如何,著愛揣出寫的人。教會迫切為著這件事祈禱,後來想著憲兵發見hit三字的進前有日本牧師的講演會,可能是hit暗聽講的人所寫的,已經經過兩月外日,真oh得記起啥物人有來聽,結局叫hiah-的來聽的人坐in 的位,想出in隔壁的人佮in 的動態,到尾果然查出有一個郡役所的職員可疑,調查結果,無毋著,按呢經過4月外日,不眠不休的調查到遮結束。列位讀者穩當愛知hit-的寫的人的結局怎樣?只有拘留29日na7-tiaN7,因為講伊會寫hit三字的原因,in祖公代代是佛教徒,所以伊看基督教的人是愛英美的人。

Hit時教會啥物款式:

  1. 聚會人數大減少,200外壬減賰5, 60人。因為每禮拜日憲兵伏佇門裡,看有可疑的人就chhoa7去客廳調查,認手筆哄喝.

  2. 慕道友驚到毋敢來禮拜,對門口過,毋敢舉頭看禮拜堂,毋敢予牧師去探in 的家。

  3. 長執逐日愛出去鬥調查,探聽,街頭巷尾teh講啥物愛來報告, 毋過hit時拄東港事件發生,掠真濟人去關,受刑,喪失性命的也袂少。所以街仔路靜chauh-chauh,無人敢講啥物。

4) 相接續來的試煉。

牧師因為過頭緊張,過勞, tauh8-tauh8 無睏,無食,致到身體破病倒床,日過日,月過月,身體na2衰弱袂會做工,又閣時局na2緊張,就轉去牧師的故鄉沙山 (現在的芳苑),蹛佇禮拜堂的舊厝,落雨的時會漏雨,透風的日對壁縫吹入刺骨的冷風,佇這號環境中生活。身邊有年老的 ta-ke,破病的丈夫,四個袂曉分別好歹的細囝,佇家教囝,做護士,閣beh佇農業會食頭路。Hit年做大風颱,倒厝險予厝teh死,佳哉主備辦一个衫仔櫉遮閘。天光起來看著一支的煙筒予風拍折teh佇衫仔櫉的頂面,好危險ah! 知影主佇暗中teh保護。厝既然倒,成做無家可歸,賰淡薄錢設法起兩間,起好,我紲破病倒床,hit時是佇空襲中,逐日有空襲,掃射; hit時的處境實在悽慘,前無救兵,後無糧草,舉目無親,只有仰望天頂的上帝。心內常常teh吟,「我目舉起向天,上帝所踮所在,顧我到攏無害.」感謝天父奇妙的攝理,無久台灣光復,我就去台中省立醫院入院,醫生講營養失調,主內的醫生楊天和先生去ka7 乾恩(Khiân-un)嫂講:Khian-un嫂叫我去in兜蹛,受in ta-ke,媳婦不止疼痛,好款待一月外日,體重加10外斤,就勇健轉去。後來牧師也去台中入院。我得著(陳)彩龍先生娘的介紹佇育幼院食頭路,這攏是天父好的安排,感謝主。牧師身體恢復健康,就閣轉去鳳山教會做工,總是無偌久閣胃出血幾若擺,到尾去手術chiah復原。

1957年2月8日轉任來嘉義北榮教會,最初4, 5年真順事經過,到最近2, 3年會友經商失敗,倒閉連累教會慘重。牧會者的立場,看著會友失敗相連累,心內痛苦萬份.

1962年,牧師頷頸有一粒細細粒的瘤,佇5月3日去彰化基督教病院手術,檢查結果是癌(甲狀腺癌),聽著癌,親像晴天霹靂,因為是死症。醫生講著第二擺的手術,後來檢查講有清氣。總是無拍算,一年後的今年5月閣再發, 6月4日閣入院手術,軟弱的人實在oh得擔當相紲來的試煉。

5) 主恩無限。

雖然相接紲來的試煉,若是踮佇賞賜阮氣力的事事攏會。雖然經過流目屎的山谷,猶過伊chhoa7阮的腳踏入希望的門,也拭起阮目睭攏總的目屎。聖經講:恁所拄著的試無毋是人的常事,上帝是信實,無beh予恁拄著試過頭佇恁所會擔;就是佇受試的時,beh紲開脫出的路,予恁擔會起(I 哥 10:13)。奇妙的主有救阮一家經過chiah-nih大的試煉,猶過徛得chai7,若毋是主的恩典,就阮已經早早對地上消滅lah! 實在人生一切的困苦,患難,是至仁愛天父所派來恩典的使者,beh予伊所疼的囝兒得著造就佮利益。這是阮的家切實的體驗。

向望敬愛的讀者為著阮祈禱。

 

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述