按：高哈拿姑娘 (Miss Hannah Connell) ,加拿大長老教會女宣教師，1869年1月6日生，1905年受派來台，1931.年9月10日於台南去世。
這霎愛代先共南部教會的教士會先生佮同屬主的列位請安佮說謝。因為阮的淡水女學，婦學的恩師高姑娘到貴地，雖然佮列位交陪無久，就佇遐破病過身。猶過列位 對基督的疼來好款待，事事好勢。論我實在有較僭權，總是對敬愛的姑娘的疼來逼，致到無小可攑筆袂用得。向望咱女學，婦學的先輩者，相體諒就是。
佇咱北部教會續接偕牧師的意志的功勞者，是真濟位。佇30年前北部有兩位姑娘頭一擺到台灣，是金姑娘(金仁理姑娘 Miss Jane Kinney，現時佇東京)，佮高姑娘。平平西洋人，只有偕牧師，吳牧師娘夫婦怹 5位若定（而已）。閣氣候，言語，風俗，實在真毋慣勢(彼時台灣的文化猶未發展)。
佇這號冷靜的時，只有上帝做伊的主，也得著伊所創造的淡水景緻，來加添感謝上帝的心。砲台埔的百合花的媠，閣芳味也是通做慰安佮奮志。閣想著英國出名文學家John Ruskin（1819 - 1900）所著的《胡麻佮百合》 (Sesame and lilies，著者用理想的的婦女來比並百合花的清白，媠閣純的芳味來闡明)。所以加添伊的使命觀念較強，就百般的艱苦看做無要緊；對所插的標一直向前。
-
對按呢鼓舞學校到今仔日的進步，實在是真大的功勞。彼時就佮金姑娘同心協力來設婦、女學堂佇淡水！金姑娘是文學士，伊是宗教音樂家，故人照伊的特長，後來就分女學，婦學。彼霎高姑娘佇女學教音樂，閣做婦學的校長。吳(威廉)牧師娘若倒（回）去加拿大，就替伊教神學校，所以怹兩位所培養的音樂家真濟佇咱的教會活動。佇教會工程，自然是盡伊所做會到來幫贊，閣佇暗中做真濟好事。
-
模範的的音樂家：(a)照咱所知，有的音樂家對無夠額的宗教觀念理性，致到無照道德，真遺憾；高姑娘通做模範。(b)溫柔謙遜，這是顯明學主耶穌。我幾若擺聽見淡水的人力車夫講，「高姑娘真好交陪，閣gâu體貼勞動者，真拍損。」 (c) Gâu幫贊，gâu做工，佮徹底的的疼（愛）心。
佮吳牧師娘真好的朋友，閣是好的伴奏者。會記得學生講，「一條曲，著學遐久，」毋過做音樂真好的教法，佮予人會曉揤一條曲完全。
這位人格者，過身3週年，特別愛淡水女學，婦學出身者，佇9月10日，用精神來追悼咱所敬愛的先生，也向望話學伊的精神來行。
P. S. 請恁若有去台南，的確著撥假去基督徒的塚墓地，來探伊的墓，是所向望。
