陳柏壽 : 向頭前ê過去

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

陳柏壽 撰 《台灣教會公報》 3155期 2012年8月119日 p.25 台文世界。漢羅台語文。 “教會kap咱ê人生仝款,攏是不斷向前行;情勢愈䆀,咱tio̍h 愈勇敢。過去ê回憶,就是the叫咱,tio̍h繼續一山搬過一山

歷史是咱人群ê liâm-che(粘著劑),對過去深刻ê認識kap體驗,會促成咱對過去chhōe-tio̍h向前ê進路。過去促成一群東北三州ê有志,結連做伙ê動力,hō͘ chiah-ê平凡大眾ê廚師、洗衫店ê頭家、技術者、會計師、建築師、醫師、律師、牧師、家庭主婦來起造「衞鄉」ê歷史,伊ê基礎就是對真理ê追求,對上帝ê信賴,以及對台灣故鄉無限ê關心。
1986年對日本搬來協和神學院以後,受派去恩惠教會工作,有一段時間kap黃武東牧師、王成章牧師做伙輪流主持禮拜。後來,王牧師轉去台灣神學院教冊,阮嘛有參加Brooklyn ê台灣三一教會。每禮拜透早,我就載牧師娘kap 3個囝(後來koh生1個查某囝),全家親像日耳曼民族大移動,經過Whitestone Bridge去Flushing,中晝食了趕去Brooklyn禮拜,轉來到厝攏7、8點,囡仔kaiⁿ-kaiⁿ叫,大人嘛le̍k kah叫天叫地。同時,我愛koh準備考試、寫論文、顧教會,逐日攏無閒kah若狗蟻。我ê身軀因為按呢變bái去,m̄ 是暗時袂睏,就是膀胱結石、放尿流血,後來甚至膽囊去hō͘醫師手術掉,hō͘我變做「無膽ê人」。佳哉,後來Jane Lai有教牧師娘駛車,伊考著駕駛執照,會��家己駛車去買菜、送囡仔去學校。
在地生根 點to̍h台灣精神
為著路途遙遠ê thoa-bôa,koh看著大New York北旁,Westchester地區無半間台灣人教會,親像保羅去hō͘北旁ê馬其頓叫著,阮決心欲tī北方「在地生根」。Tī台灣白色恐怖ê年代,咱給伊號名叫做「衞鄉」教會。1988年,代先tī阮厝2禮拜聚會一擺,後來改做逐禮拜,但是人無濟。耀勳兄講,咱有決心,tō準講只有「3个人」,嘛欲kā伊禮拜落去。感謝主,後來真濟兄姊駛真遠ê車來做禮拜。
1989年1月24日,我去Tarrytown歸正教會總部chhōe總幹事Dr. Rev. John Hiemstra,伊叫我去chhōe Greenville Community Reformed Church。教會牧師Dr. Rev. Jack Elliott, Jr.真古意,隨叫阮去Social Hall(交誼廳)做禮拜,講m̄ 免錢。順賢兄做一個布條寫「上帝是愛」,榮二兄用綠色布條仔寫教會ê名,吊tī講台前,阮tō親像廟口做王祿仔賣膏藥,嘛親像路邊teh排擔喝lin-long,就按呢大聲唱歌祈禱,開始做禮拜。
後來,賴長老因全家嘛對恩惠「歸正」轉���,真濟兄姊嘛攏「歸隊��,hō͘衞鄉教會成做大紐約地區,敬拜上帝兼台灣精神ê火�����。
自從我受封立美國歸正教會牧師以來,衞鄉教會kap其他教會最大ê分別,就是堅持「人��皆祭司、人人皆先知」ê路德馬丁宗教改革最高理想。Tī我ê日記內會當發現,所有較久出���ê會友,攏bat khiā tī講壇頂司會或講道。無形中,教會帶有反對利用宗教kap教會產生ê階����kap權威。
每人每日仝款攏只有24點鐘,上帝hō͘人天賦ê智慧kap人生經驗雖然種類不同,卻攏有平等ê價值kap地位。教會ê兄姊,一个一个,攏是戰場ê勇士。所以,教會ê牧師袂使bô-sî-bô-chūn to̍h-sī欲「教示」人、「教導」人。無人會當利用上帝ê名,提升家己比別人khah高。
最近我koh轉去ê時,有深深感覺著大家攏真正有嚴謹ê人智觀念kap西方ê自由精神,經過集體智慧ê捶煉,產生特有ê教會文化。所以,咱教會應該是上帝教會ê典型。
堅持立場 敢向強權示威
過去連續幾年ê大紐約區228國殤祭日,攏是衞鄉教會teh主導;中國人向台灣射飛彈ê時,咱去示威;江澤民來美國ê時,咱去示威;為著加入聯合國,咱嘛去示威。
另外,為著推展台語,咱tī美東夏令會去排擔賣《台文通訊》。除了chiah-ê,耀勳兄嘛代表教會贈送記念牌hō͘伊籐邦幸醫師,記念伊ê婦人人黃聰美姊ê精神,後來koh設立聰美姊記念基金會,記念這位台灣女性ê故事。基金會發行100期ê《台文通訊》,現在繼續tī網站「發行」古早獨盟tī東京出版ê500本《台灣青年》雜誌(www.chhongbi.org)。當時,基金會有故黃聲宏醫師做主席,我做總幹事,黃圭如姊做會計,黃耀勳兄做監賬委員,賴柏年兄、張啟典兄做理事、秀蘭姊做打工……。
1994年,為著抗議中國教會ê丁光訓對台灣ê拗蠻,衞鄉教會全體去協和神學院示威。丁光訓是協和ê畢業生,現在是南京金陵神學院院長,同時是中國三自愛國教會主教,中國全國人民政治協商會主席。彼時,我是協和學生會會長。伊來訪問學校ê時,身邊tòe歸群ka-choah(虼蠽),我tī會中問伊:「你用做一位牧師ê觀點,對台灣人追求獨立ê看法如何?」伊thi-thi-thū-thū講袂清,最後煞講:「台灣是祖國ê一部分,祖國必須統一!」對彼陣以後,阮就決心欲阻擋協和頒最高獎章hō͘伊,決心tī頒獎彼日發動示威行動。學校恐嚇我,講欲kā我退學,講一切結果攏我負責。
但是無想到彼日,衞鄉教會全體、在地同鄉、哥倫比亞大同學共約100人,將協和ê大門封起來,沿Broadway歸路攏插綠色ê台灣國國旗,以及「One Taiwan, One China」ê旗仔,大家分傳單hō͘過路人。真濟重要ê教會界人物,包括台灣人ê教會人物,遠遠看著按呢就oat轉頭過,m̄ 敢參加。雖然有幾位對後尾門溜入去會場,結果會場非常冷清,真少人參加。
這是表現教會ê立場kap意志真好ê機會。咱ê示威引起神學院,以及真濟紐約kap台灣媒體ê注目。這項代誌以後,學校不但無kā我開除,甚至過一禮拜後,神學院院長Dr. Donald Shriver, Jr. khà電話hō͘我,講咱來頒一個仝款ê獎hō͘高俊明牧師好無?我問高牧師,伊講:「我已經有chiah-nih濟榮譽神學博士,m̄ 通koh再增加啦!」後來,這位神學院院長親自主持我ê封牧典禮。
勇敢向前 靈魂精神起來
教會kap咱人生仝款,不斷teh向前行。情勢愈bái,咱tio̍h愈勇敢。台灣chit-má親像拄著寒天,但是保羅kā伊ê囝提摩太講:「Tī寒天來以前,請你tio̍h緊緊來,koh拜託你將我彼領外套順續帶來!」(提摩太後書4章7~22節)「寒天」ê意思就是講叫咱靈魂tio̍h精神起來ê時陣,人生就是不斷要求叫醒咱家己ê過程。
咱台灣人ê獨立建國,一山poâⁿ過一山,過去ê回憶就是teh繼續喉叫,叫咱今仔日tio̍h koh poâⁿ過,poâⁿ過另外彼個山頭,hit領皮ê外套moa咧,充滿著信心,轉來台灣老母ê身邊。M知你猶記得文夏ê歌聲?「白雲啊!你若欲去,請你帶著我ê心情,送去hō͘伊,我ê阿母……」「免掛意請妳放心,我ê阿母!我也來到他鄉ê這个省都,不過我是真勇健ê。媽媽請妳也保重…….」