陳柏壽 我的母語人生

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

陳柏壽撰 「我的母語人生」 聰美姊記念基金會網站 2019年8月12日;漢羅台語文見於《台灣教會公報》 3525期 2019年 9月15-22 日 p.25 

阮老爸對日本讀冊轉來,揣無頭路。伊的一生可以講是佇政治的衝擊及家己內心的抵抗中 經過。因為一直毋願加入國民黨,所以伊做國民學校教員45冬,互雲林縣的「督學」每 年給伊調遷到深山林內的學校:將伊看做眼中釘。每年伊chhōa阮這六的囝,對溪邊厝予 人調到古坑、崁頭厝、大湖底、樟湖、草嶺、棋盤厝、麻園仔,最後佇石牌仔國校退休。 我國民學校六年讀五間學校。逐年的同學攏生份面,但是hia-ê童年經過的山野,是留佇 我生命的一部分。老爸的學生有人轉來做伊的學校校長,有人做台大教授,但是伊猶是做 最低級的教員,只教生物及化學。chím-má我發現伊「抵抗」的生涯,煞傳互我。「抵抗 」變做我生命基因的一部分,是我人生的動力。
畢業以後,開始去長榮大學教冊,我就用台語教學,要求學生用台語文寫作業,用母語討 論、發表心得。起初雖然反抗真大,但是經過一、二學期了後,學生一個一個發現因使用 母語會chhōa因轉來,揣著因家己心靈及靈魂的母胎。佇離開的時的紀念冊內面,因寫真 濟真予我感動的留言,互我看著因一個一個良心發現,看著因青年心靈的生長的過程 。chia-ê攏是咱通安慰的台灣種子。
及阮阿爸仝款,對紐約哥大畢業,開始嘛是揣無頭路。chhōa牧師娘及四個囝,佇紐約的 街路濛濛渺渺,毋知欲行去叼位。但是天公疼戇人,上帝安排我去做台灣人長老教會的牧 師。封立做牧師以後到今嘛已經30幾冬啦。 開始會曉用電腦寫台語文是對鄭良光兄的開竅。彼時開始到今無論週報、禮拜、講道以及 所有行事,攏用台語文。有好處mā有歹處。好處是我活佇良心內面,離開上帝較近;歹 處是會友較少,有人看著台語就驚。我彼本教會羅馬字聖經,永遠是我最信賴的寶貝。 佇衛鄉教會我及黃聲宏醫師設立聰美記念基金會(www.chhongbi.org),從事台語活動: 包括1993年11月到2006一月12年中間對良光兄轉來接辦的「台文通訊」,總共117期 (25-142期);500幾期的「台灣青年」雜誌,以及各種台語生活座談會文章等等。遮的 事工到今仔日猶佇賴柏年兄及黃宮元兄手下,每日繼續拍拚。
對現此時台灣來講,台語文運動是屬佇反抗運動的一部分 ─ 反抗既成的政治及文化的霸 權。執政者掌權家庭、社會、教育的機器,產生一代一代袂記母語的無根的台灣人。
母語是咱一生生活的最重要工具,也是咱生命的內涵。我一生用母語交朋友、寫作、教冊 、傳道理。台語文就是道理。我嘛相信有一日咱轉去上帝遐,我一定會用咱的母語台灣話 及上帝講話,因為我知影咱的上帝聽台灣話,聽卡有。願上帝賜福台灣母國、台灣文化、 台灣母語早日出頭天。
陳柏壽牧師敬 聰美記念基金會 主席 kap 朋友分享