蘇振輝暫代彰化醫館院長 就任的話

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

蘇振輝撰 「我的聲明 彰化醫館院長事務取扱」《台灣教會公報》 646期 1939年1月 p.8-9。蘇振輝醫師 (1907-1997),1938年10月至1939年5月間代理彰化醫館的院長。 

佇(1938年)10月13號,接著南部大會的公文佮議長劉振芳牧師的來訪,交涉講陳宗惠先生為著家事上的都合,限到10月20日,愛辭彰化醫館院長的職,所以愛我著暫時來擔當這个工,到新任院長的出世。總是我知家己的不才,毋是會做這个工的器具,也家己有一間病院都合上也是袂拄好,又閣佇病床的家父(蘇育才牧師)聽著這个消息,數次寫批來表示反對,所以就對大會議長告辭。
毋過後來閣得著議長以外數名牧師,宣教師的激勵講,「舊年你佇死線的中間得著上主的恩惠來復生,佇這時上主欲用你,敢通推辭?」然後閣想著: (1) 來年南部大會的平和; (2) 彰化教會佮醫館40年來的密切關係著保持; (3) 家己前佇這間醫館奉職3年久的中間,有受蘭醫生的愛顧真大,佇這時檢采是淡薄報恩的機會。所以孤不將就親身到佇台北帝大病院,入院中家父的病床來說明,求伊的諒解,後來就好膽對大會議長來應錄這个工。
到佇10月20日,有受大會議長佮理事的立會對陳宗惠先生引繼院務一般明白好勢。彼霎了後,我佇自己健康上所允准的限度內,每早起8點就去醫館赴職員禮拜,煞就倒來我的病院,到下晡2點至3點的中間閣去佇遐辦事務。
今佇這个受交代的期間中,我欲用甚物方針來hoāⁿ這間醫館。這个前日捌對職員講了,就是愛大家誠心紲接學偉大的人格者蘭醫生經營這間醫館的精神,要約來講,就是下記3項。
(1)援助傳教佮教會的精神-我佇醫館奉職的時,有擔當主日學,青年會的工,每禮拜早起著佮蘭醫生回診,佇彼時雖罔我所受持的患者巡猶袂了,猶久若是主日學的時間到,伊就逼我著隨時去教會,這層事,卻是小可,猶久佮以外濟濟的例,通知伊真愛職員著有幫贊傳教佮教會的心。
(2) 節省無濫費-因為愛達成慈善的目的,蘭醫生真愛職員著儉省,有一擺我對家私店注文一个媠媠新的點眼盤的架,來欲換幾十年久所咧用舊式柴的架。蘭醫生看了講,「咱著較儉,舊的罔用,毋通加開這个錢。」伊也常常講,「無牛駛馬。」意思講若會通代用的物著罔用,毋通愛用好的物來致到加開錢。抑是伊對職員物質上的待遇毋是真好,猶久職員無異議降服伊,愛予醫館的經濟下量lēng的意思。又閣蘭醫生去往診的時,人送伊的往診料,伊攏是提來交予醫館。這款對金錢淡薄的心,實在是佇慈善事業咧服務的人,真媠的態度。
(3)職員的言行風紀著有真實基督徒的款式佮仁愛的心-這層是當然的事,猶久蘭醫生對這層真嚴重對職員注意。因為若無按呢守,會留真毋好的影響佮印象予患者。
以上3項的精神是我有直接看著的事實,所以這時愛紲接按呢來辨理這間醫館,向望無偌大拍lâ-sâm先輩所留的跤跡。
現時內面逐項攏有好勢咧進行,無有誤著患者的事。醫務方面歐陽兆明先生,是9年前畢業慈惠醫科大學,最近佇大學病院經驗外科久久,伊做醫局長咧設法。以外有謝,張,陳,3个醫院,真和氣咧出力佇診療的工,十分會通應患者的利便。
宗教部有蘇添明先生佮女傳道,傳道補助等,咧出力做工佇職員佮患者的中間,成績真好。
論財政的事有小可通寒心。佇20日引繼當時的現今是Y1876.76,隔日21日有發月給等Y1977.77。按呢看,大會經營一年外久,是無通偆偌濟的款。又閣現時藥品材料攏總大起價,所以對這个財政的事,若毋是對支出來節約,就驚了會拄著赤字也無的確。 Taⁿ我竟然應承這个工,就決心愛忠實佇大會的命令,無驚毀譽褒貶佇正義的信念來辦事。毋久知人袂通完全,所以欲行使院長的職務有想著較慎重。就請佇這市內彰化教會王守勇牧師,沈毅敦宣教師,陳英方理事做我的顧問,予我通參詳才來進行逐項,向望所做無有偌大的錯誤。
以上簡單寫按呢做我就任的話。大向望全南部所敬愛的兄姊關心佇這間醫館,對阮咧做工的人指導佮援助,又閣替阮祈禱,向望得著上主的恩惠,這个事業欲得著真大的成功。  

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述