盧賞牧師略傳 （1895-1963） 　

《台灣教會公報》923號 1963年12月1日 .P.16 [白話字原文，改為漢羅台文]

盧賞牧師出世佇里港，伊的老爸名叫做盧益，伊的老母名叫做邱妹。家庭耕農，伊佇1914年對廉德烈牧師 (Rev. A. B. Neilson)領洗禮。

伊的老母過身了後，伊的老爸有閣娶後母，名叫做許專，這个後母真疼伊，佇伊22歲的時，伊的後母有鼓勵伊入神學院，但是經濟袂拄好，所以伊的後母有賣伊的嫁妝，所帶來的金器予伊做學費來入神學校。

1922年3月23日，畢業了後，隨時受田中教會的聘請做傳道先生。1923年佮謝許朝長老的長女謝許鉗結婚。怹夫婦真相好，有得著三男二女，長男( 盧恩惠) 現在佇台南神學院，第二个後生恩盛現在佇美國紐約省做牧師，第三个後生(盧全獻) 佇中學教冊。

盧牧師為主做工39年久，捌踮佇田中、馬公、澄山、善化、看西街、歸仁等教會牧會。1955年踮看西街任內建築新的禮拜堂，非常出力，閣佇P.K.U.財務幹事任內幫贊大同、北門、漚汪、三一、新豐等教會的建堂，出真大的力量。為著題捐 暝日奔走貢獻非常，到會友的所在募捐，常常予人無歡迎，但是伊猶原無餒志，繼續為主盡忠。捌有一擺，佇一所在，有一個少年人當面出喙暴辱伊，邊仔的人聽了大未做得，差不多愛揣機會予伊共盧牧師正式會失禮。但是盧牧師猶原泰然自若，無一屑仔的受氣。通講伊是任勞任怨模範者。

盧牧師佇1963年10月31日，頂晡10點10分蒙主揀召，佇11月初7日下午佇看西街教會舉行教會葬。參葬的人坐滿禮拜堂，無毋攏大數念伊的做人。