廖得撰 原題「台灣聖神 世間攏總不值耶穌」《台灣教會公報》 811卷 1956年7月 p.26

 [白話字原文，改為漢羅台文] 漢譯見於《廖得牧師紀念文集》，p. 22 -24 。

請參見 林謹慎寫故廖丞丕翁、《教會史話》338西螺廖陳明鏡長老 等。

有一日敝堂叔（廖承丕）出去， hiah的歹囝仔看著講："入教仔囝" 敝堂叔應講， "我m̄是入教仔囝" ，hiah-的歹囝仔喝講："若m̄是入教仔囝，來kā伊掠" 敝堂叔就走；主日就佮堂叔公去禮拜。

後來敝堂叔去娶嘉義教會陳有成傳道師的令妹（陳明鏡），是女學學生。有信心！好腦力！真勤儉！ 敝堂叔親像去娶著 "金雞母。"

兩翁某同心將hō͘人"摃翻頭，" 摃無了的一千外銀家伙，協力經營生理。主日店門關-teh， kā伊做長工的人， 著佮怹去禮拜。到起新店的時，紲將這間做福音堂，中晝也煮鹹糜 hō͘會友食。

了後大大發展，世俗所講："富貴財子壽。" 抑是講："財勢力" Thang講怹攏有。 新店的時，紲將這間做福音堂，中晝也煮鹹糜 hō͘會友食。

了後大大發展，世俗所講："富貴財子壽。" 抑是講："財勢力" Thang講怹攏有。

但是可惜倚 50年久，到末 m̄-bat看著敝堂叔， 堂嬸有歡喜平安的面。

佳哉佇這幾年來， 敝堂嬸佮伊的soah-尾囝（廖溫進）的信心大復興！ 敝堂叔beh 別世的時，有備辦一塊真好的拜堂地。也伊的尾囝有設計， 監督，獻錢來起一間真媠的大拜堂！ 起了錢無夠，敝堂嬸就賣伊5 分老本的田來鬥。

現時母囝攏當長老。伊的囝逐禮拜時，就對遠遠的寄留地 轉來本會做工。 薰（煙）也改起來，主日就將伊每禮拜的薰錢20 圓（khou）做禮拜獻金。

敝堂嬸前為tio̍h鼻tio̍h iah有食薰，幾-nā年前倚靠主的力，將伊的薰酒攏改。到舊年頭， koh將伊75年久所食的檳榔也改掉，續將伊每禮拜所食的檳榔錢6圓做禮拜獻金；以外伊一年所獻牧師謝金。是粟仔 1200 斤，也送hō͘會友主日中晝頓 煮鹹糜是200 金。

敝堂嬸佇幾月日前來高雄市， hō͘吳基福博士手術目睭。伊講， "若有5 分目mā好！ Thang讀聖經予人聽，佮 ha-tī thang備辦心見主！"

伊講， "若m̄是得著主的 in拯救。就伊佇幾年前，若無自殺，也的確失心！"

敝堂嬸早是芎蕉面！現時已經變做加兩面！雖然是82 歲 的老女長老， iáu-kú是活活動動！ Tiô-tiô跳跳！ 歡歡喜喜！ 若親像細漢囡仔。