江進發談醫療團的事工

江進發撰 「醫療團teh做啥物？」《台灣教會公報》 1041號 1968年11月1日 p. 3-4

按：1960年，台灣基督長老教會嘉義中會成立 「基督教沿海醫療團」（Christian Mobile Coastal Clinic, Kagi Presbytery, Presbyterian Church in Taiwan）。 中會召集到32名基督徒醫師，32名傳教師。中會幹事江進發牧師兼駕駛員，牧師娘林湘琴是醫生，在嘉義沿海地區開拓醫療傳道的事工。

照大家所知，佇100年前（1865年）馬醫生（馬雅各, Dr. James L. Maxwell）為著欲傳福音，就佇台南看西街開始醫療工作，後來就開設新樓病院，這通講是台灣西醫的開祖。閣繼續到光復前約90年久，對台灣的醫學界非常大的貢獻；得著醫病來信耶穌的數額算袂了。親像按呢，醫療佮傳道實在有真密切的關係。

2000年前主耶穌遍行逐个城，逐个鄉社，宣傳天國的福音，醫治逐樣的病症。台灣開始傳道就是按呢，若看宣教史，未開化的地方閣較是按呢。有人講醫療毋是傳道的手段，總是我想醫療會通做傳道的階段。 醫生醫治患者是予伊肉體上得著平安，進一步，若報怹信耶穌，敢毋是予伊加得著靈魂上的平安。所以醫療若無兼傳道，彼个醫生的疼心無夠額，就是佮平常的醫生相像(相同)，只有是忠實佇醫學若定。

十年前（1960年），嘉義中會創設醫療團（基督教沿海醫療團）以來，予台灣的醫生加添提升社會服務佮傳道的精神。卻真早就有基督徒醫師個人的，佇伊職域上為主做好的見證；總是猶毋捌組織團體閣是全基督徒醫生差不多總動員參加的。遮的醫生願意放棄寶貴的的時間佮賺錢的機會，輪流出去巡迴醫療，甚至也閣獻金。這个醫療團對山地，沿海，偏僻的鄉村的平民，軟汫的人是偌大的幫贊，閣救怹偌濟的靈魂。這幾年來醫療團的工作毋但予濟濟人得著身體的平安，甚至也予醫生本身經驗著服務人的快樂佮傳道的使命；同時喚起其他濟濟基督徒會曉通過伊的職域向社會服務，為主做實際的的見證。閣一項歡喜的就是近年來濟濟中會創設醫療團，予閣較濟的工作。這个組織雖然無親像馬偕，仔是彰化病院規模遐濟的醫生有機會參加這个工作，總是用少少的經費佮藥品出去無醫生的鄉村巡迴，予濟濟偏僻鄉村的患者通得著醫治，通講是做實際社會福利佮傳道的方法。患者提錢去請醫生看，佮醫生出去免費共怹看，這若准有較粗俗，毋過對這个疼心的表現，會達成耶穌所講，「眾人欲對按呢知你是我的學生」(約翰13：35)。

近來基督教不止強調疼的實際見證，就是服務人群，佇現實來解決困難。過去醫療團有幫贊佇紲聽福音(馬太4：15，16)。照本人的理想，咱著閣進一步較徹底的服務，親像普及醫學智識，鼓勵整理環境衛生，發展預防醫學，符合來傳福音，按呢才會貢獻社會，廣闊上帝的國。

當這醫療傳道紀念日，向望大家益發關心醫療傳道的工作。佇後方為著這个工作代禱佮奉獻，救急藥 佮金錢；才免予去佇第一線咧服務的醫生腳酸手軟。按呢來相佮完成「遍行逐个城，逐个鄉社，宣傳天國的福音佮醫治逐樣的病症的理想。」