吳來好的旅行記

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

 吳來好撰 「旅行記」 《台灣教會公報》904號 1963年2月p.14 [白話字原文,改為漢羅台文]  

咱的主筆愛我寫旅行感想,所以我寫淡薄。也我去訪問的宣教師所交代請安的話,我紲寫予大家知。
我對台北出發到香港蹛兩日,後來到泰國蹛一月日,有會三禮拜,以外的時間蹛佇曼谷鄭彰茂醫生的厝,怹有用怹的自家用的車 chhoā我參觀濟濟所在,也有看怹國家的展覽會;最深印象的,就是佗位去都有真媠的寺廟,和尚,是親像咱遮teh當兵的款式,逐个男的攏著去做兩年,抑是終身,連皇帝也去做兩月日,所以街路四界都看著幔金黃衫的和尚;透早就提一个鍋仔佇逐間厝的頭前teh分飯,各家庭攏著予怹食。和尚無煮飯,照聽怹5千人中只有一个基督教信徒nā-tiāⁿ,實在真可憐!草地濟濟所在攏無教會,阮teh赴會的中間著坐2,3點鐘的車才會通到教會禮拜。請佇祈禱中也數念怹。
我佇( 1962年) 12月9日有坐飛機直接到英國,到倫敦是12月初10,有去女宣道會的事務處共怹會失禮,因為飛機換時間慢飛,怹去接無;為著彰輝院長娘有交代著隨時到伊遐,所以有直接到伊遐(Seaford)蹛兩日才去揣蘭醫生娘,伊猶不止勇健,真數念台灣;伊準備咱100週年的慶祝會欲閣來。佇伊遐過一暝,後來對遐坐車去訪問早佇台南新樓醫館馬醫生的查某囝,伊是佇台南出世,現在50外歲,無結婚,teh教冊,彼暗阮有相佮去聽Messiah,是倫敦真出名的音樂館,5,6千人teh聽,樂隊佮teh吟的倚300外人,實在真好聽。佇遐過一暝,隔早起有佮吳姑娘約佇Westminster Abbey Church相見,伊有chhoā我看一間教會的內面佮國會議事堂,病院,因為落雪閣無甚麼時間,所以我無閣去伊的厝。隔日我有去劍橋蹛佇Dr. A. G. MacLeod的厝,事先有去訪問神學院長R. D. Whitehorn是現在佇玉山神學院的懷牧師的令尊、佮早佇台南神學書院教冊彼个 (F. G. Healey),希牧師佮牧師娘,in真數念台灣,也有去探長女巴姑娘的老母,伊真歡喜;問濟濟in千金佇台灣的消息。也有去參觀神學院的內面佮6間大學,佮一千外年的教會 猶過真堅固,看著街市細細大學20外間連連做伙,所在清爽,真正是世界tek的學校,真期待台灣濟濟青年到遐讀冊,這擺真可惜,我攏無拄著台灣人。看著英國的厝起真整齊,街路真清氣,人斯文予咱通學。
我為著愛看光景,所以有對倫敦坐火車到德國途中接船才 閣坐火車到德國的Essen坐14點鐘才到位,看著戰後的德國復興真緊,逐位的厝起真媠,街市大樓規十層,家庭濟濟攏有自家用的車,連作穡人也有,生活安定,無看著厝有鐵枝窗仔;失業者真少,西德5千外萬的人口。電視有兩千外萬台,家家戶戶都有。教會只有天主教佮路德會佔欲一半一半,我蹛的附近攏是天主教,所以我有去禮拜,in遐的禮拜方式佮台灣的較無相像,in開始猶原吟詩,祈禱,讀聖經,講道,獻金,只有祈禱的時跪;以外佮咱攏欲相款,會友也攏有聖經,詩;in無叫神父,叫傳道師 (Preacher)逐間拜堂都坐到滿滿,若慢淡薄去著徛佇後面;我也捌徛著。為著落雪寒,較袂通去真濟所在,所以1月23日就倒來到台灣。只有佇逐國一 月日nā-tiāⁿ。
下面是咱敬疼的宣教師愛共咱請安的話,我代寫的。
老蘭醫生娘的請安
親愛的兄弟姊妹平安! 這霎我有大福氣,來好姊佇我身邊teh相交陪。上帝的恩典真大,有揣伊來阮兜講台灣的消息予我知;這是我極愛聽的;袂免得予我大欣慕愛閣去台灣揣恁,當面佮恁相交陪;閣聽著教會有較進步,大家不止活動,我的心真歡喜感謝上帝,也愛共大家恭喜!向望恁繼續努力,予教會會那進步佇咱所囥P. K. U.的目標,佇100週年會通獻真好的果子予上帝收成,榮光伊的聖名。
我真向望恁做爸母的人,閣較關心佇咱的囝兒,引chhoā 怹熱心服事上帝,因為現在世界的青年漸漸teh墮落,佇英國也是按呢;真濟青年teh行危險的路,是因為爸母無關心的緣故;我想教會的進步抑是退步,是咱做序大人有真大的責任。佇遮講幾句共大家請安,也求上帝祝福恁所做的工,我佇遠遠的所在逐日真數念恁,時常替恁祈禱,向望無久咱有歡喜的相見。願上帝佮恁佇teh。平安。(12月13日)。
馬姑娘 (Meredith Maxwell) 的請安
敬愛的兄弟姊妹平安!
拍算恁濟濟人捌我的老爸馬醫生,1901-1923年伊有佇台南新樓做醫生,我是1905年出世佇台南,因為我的老母身軀無勇,姑不���將換去上海,總是我的爸母不時數念台灣,因為怹真愛蹛台灣。我離開台灣是1908年,因為我的老���較無閒通照顧我,閣我著去學校,到我22歲的時有去上海教冊,到1937 年日本佔領上海,我倒來英國,到這陣袂通去甚麼所在。我的爸母佇上海1923-1927年了後怹有去杭州,1937-1940年怹兩人倒來英國,蹛到 1949年閣去中國杭州的癩哥病院,後來佇1951年死佇杭州。 1952年阮老母倒來英國,搬濟濟所在最後搬來佇遮(Streathan London),到舊年1961年9月14日才過身,in雖罔離開台灣遐爾久,總是毋捌袂記得,常常數念,我也是真欣慕愛閣去看我出世的所在,聽著恁欲慶祝100週年,我真期待上帝開路予我去佮恁相見,今仔日我真歡喜,會通佮來好相見,聽著濟濟台灣的消息,可惜佇聖誕大家較無閒,所以袂通chhoā伊去看阮的婦人會的聚會,因為阮拄開始停兩禮拜,總是阮欲chhoā伊四界看看leh,向望後擺有機會通報伊知遮的活動工作。求主祝福恁大家。Meredith Maxwell。
吳姑娘(Miss J. W. Gault)的請安
親愛的兄弟姊妹平安!
今仔日真好機會通佮來好姊相見佇倫敦,我的心真歡喜,雖罔我貧惰攏無寫批,總是我不時數念台灣的兄弟姊妹,我有問濟濟恁的消息,知恁攏有平安,心真歡喜感謝上帝。我有chhoā來好姐去看幾若位出名的所在,也有chhoā伊看古早第一事先來英國設教千外年前遐的宣教師有關係的禮拜堂,袂免得感謝上帝,有差in來予阮得著道理,也差阮到恁遐傳道,通佮恁相識成做兄弟姊妹,也有聽恁猶原有差人去外國做宣教師,滿心歡喜!求上帝祝福in會結濟濟好的果子。致意請安女學的校友佮攏總的兄弟姊妹。 (12月15日)。吳瓅志
黃彰輝院長娘的請安
親愛的台灣兄弟姊妹平安!
我轉來英國三年久,攏毋捌姊妹來揣我,只有幾个男的nā-tiāⁿ,所以我見著來好姊的時,我心底的歡喜袂曉共恁形容,向望台灣有較濟的姊妹來揣我,予阮較有伴。
我的囡仔逐日都teh數念台灣,特別愛食台灣料理。我有聽著台灣的教會不止活動,真歡喜佮感激!我期待無久會閣倒去佮恁相見。求上帝祝福恁大家,我佮我的囡仔愛共大家請安。 (12月18日)。黃院長娘。    

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述