賴永祥長老史料庫 Elder John Lai's Archives

澎湖花宅教會 (賴仁聲1941報)

賴仁聲報 「 澎湖教會略史 花宅 」《台灣教會公報》 671號 1941年2月 p. 13-15 原文是白話字。


  1. 花宅教會的由來:花宅教會代先設佇島嶼的上北,有一鄉叫做水垵的所在。原因是佇過去的明治33年(1900年),有一位兄弟名叫唱;姓高,目睭疼去台南醫館入院。同一彼年受醫好就倒來本鄉,將道理講予人聽。有一個叫做王哲賢(王賢),真致意求道,就紲將家己的家做集會的所在。聚集2年後,就宋忠堅牧師來巡。後來黃志誠(黃能傑)牧師對馬公來踮遮3禮拜盡力傳道,然後接續廉德烈,滿雄才chiah 的牧師;滿牧師娘,宋牧師娘來巡視。

  2. 教會的演革:無偌久(1909年)哲賢別世,伊的囝背道,厝毋借信徒聚集。彼時高唱以外閣有兩位熱心的會友,就是顏萬宗,(顏添德醫師的令尊 )。 到昭和7年(1932年),萬宗叔的囝(顏)添德君 (彼時袂做醫師),對(日本)內地聖潔教會的聖冊學院倒來,熱心傳道,教會一時大興。可惜家內有阻擋,就袂通接續這个工。添德君現時佇北門近七股庄開業;每月寄Y 10 00,一年Y 120.00倒來獻佇伊母會(花宅)。

王江(王興武傳道師的令尊)。江伯為修理旗後拜堂的牆,予牆硩死,彼時伊當旗後教會的任職,通講是殉職。) 按呢大家3人參詳,就起拜堂。當時起拜堂的時,王江伯不止盡力來拖磨。無奈會友真少,聚集真稀微。王江伯較常出外佇旗後。萬宗伯佇厝裡teh賣魚,真老實,賣魚兼傳道,人若叫伊講道理,規擔魚無賣無要緊。實在通感心。

到昭和8年(1933年)8月,王興武君佮宣道會交涉,也鼓舞戴逢年長老來踮遮款這个教會。無拍算,長老老閣紲ná勇健,受主幫贊就ná興起教會。彼時有劉振芳,吳天賜,黃俟命3位牧師接續來巡視,鬥鼓舞緣項;就佇昭和11年(1936年)10月還工再新起拜堂。Bé-siu合用,用the 的椅條,也修理宿舍,便所攏合用。隔年12年(1937年)6月24日,陳金然牧師佮賴仁聲先生來巡,就舉落成獻堂式。對昭和8年起到這霎,戴長老iáu-kú是不眠不休的著磨來佇遐牧會(長老已經60外歲垃 ,伊的囝戴耀閭氏,現任汕頭市政府的衛生課長,兼施療病院長)。咱真正著共伊說謝。

  1. 現在:有兩个長老,兩个執事。受洗禮大人約倚 30个。每禮拜出席,平均約80左右。獻金一年總數約200外銀。對有教會到今 30外年久,咱的當局猶毋捌派一名正式的教育者來任佇這个教會,我想了真毋甘;再來也真無時間通設法。到昭和15年(1940年),賴仁聲牧師去巡視,才加設一个長老,一个執事。若無再來是只有一個長老佮一个執事。也同時設小會記事冊佮小兒,成人的姓名簿。今幾份有較整齊。也得著女宣道會派呂玉蘭先生佇遮鬥幫贊兩年久。主日學佮女界方面加真進步。

可惜佇昭和15年,玉蘭女士換去自在東吉,chhun老長老一人,真正是真苦戰。請大家替祈禱,也向望有人甘願過來幫贊阮。(待續。)

此網站由李秀卿女士撰寫程式建置並義務作維護。如果您對本網站有任何建議或指正之處,請 聯絡我們。謝謝!

Copyright (C) 2007 年1月 [賴永祥長老史料庫 ]
修訂日期: 2013 年 01 月 28 日